‍ ‍ آی سحرین سویوق یئلی اسمه منه یارالیام اووچو ووروب یورولموشام من بو داغین مارالیام ای بو گویون لاچینلاری باخ یاریمی گؤر هاردادی تاپسان اگر دئه بی وفا، گل کی، باشی بلالیام آی اوجا داغلارین قاری، دام، اَری، آغلا حالیما فیکر ائله من بو زیروه نین دامه دوشن غزالیام سالدی منی قارا گونه، قارا گؤزیله سئوگیلیم هاردا قارالتی،گؤرجه یین، اوردا اونو قارالیام هی چالیشیر، سیزیلداییر، قالمیراورک یئرینده دای یاندی قارالدی سینه ده ، قانه دؤنوب  عزالیام سالما "تدین"ی  چؤله رحم ائله خسته جانیما دای دؤزه بیلمیرم یتیب، سون نفسیم، آرالیام ✍تدین

قاینار گؤزلریندن شوخ باخیشیندان عجایب فیتنه‌لر فئل لر گؤرونور صف صف دوران سیاه کیپریکلریندیر یوخسا کی گؤزومه میل لر گؤرونور آغزی پیاله‌سن قددی میناسان نئیچون اوتورورسان مندن یانا سن سن مگر کی یاشیل باشلی سوناسن سنده تر جیغالی تئل لر گؤرونور گئده‌ن گئتمه بیر بری باخ آی گئده‌ن گؤزوم دویماز سن تک گؤزه‌ل کیمسه‌دن گاه یاخادان شعله وئریر آغ بدن گاه اولور کی نازیک ال لر گؤرونور قددین طعنه وورار او سروِ نازا جان قوربان ائیله‌رم سن تک شهبازا اوزون کیمی زولفون کیمی تر تازا    نه لاله‌لر نه سونبوللر گؤرونور واقیف یاد ائت سنی یاد ائیله‌یه‌نی من سئویرم منه یاریم دئیه‌نی قویماز گؤز اؤنوندن سئوه‌ن سئوه‌نی کؤنولدن کؤنوله یوللار گؤرونور ✍ واقیف

دونيا ديلين چوخ شيريندی اوره يين آجی اوزووا غم داشی يامانا دونيا بير عؤمور باخميسان منه قيقاجی گلميشم اليندن آمانا دونيا بنزر اعتيبارين بير آخار چايا وار دؤولتين قيلماز هئچ كيمه وايا نه سنده شرف وار نه بيزده حايا دَيمزسن بير توربا سامانا دونيا حوسنون خياللاردا گَزن بير قوشدو كيم اونو چوخ سئودی چوخ غمه دوشدو مين ايلده ياشايان اينتيظار كؤچدو چاتسادا قوينوندا چوخ شانا دونيا مرده دوشمن اولدون نامرده آرخا سويون دوز آخمادی مردله بير آرخا كيم الين اوزالتدی قوردوغون چارخا سالدين مين تؤهمته بؤهتانا دونيا نسيل لر يئتيردي شن نسيل لری آچدی هر قاپيسی باغلی ديللری چوخ شئيی ده ييشن اينسان اللری سنی سالانمادی بير يانا دونيا اوزاقدير كامالدان عاغلين هوشوندا مين صيفت گؤرونور خيال قوشوندا عدالت گؤرمورم قورولوشوندا ساتيرسان ياخشينی يامانا دونيا قان اوسته قورموسان ايلك حاياتينی ياسا دؤنده ريرسن توی بوساطينی الده ايتی قيلينج ظولمون آتينی سورورسن زاماندان زامانا دونيا كيمه رحم ائتميسن نيشان وئر بيرين سنی دوغان ياتسين بير داشدا درين آغ دابان كندينده دده شمشيرين قويمادين يوردوندا نيشانا دونيا قالديردين گؤيلره دومان تك آهين صنعت مئيدانيندا آشيق ايمراهين صمد وورغون كيمی سؤز قيبله گاهين نئيله دين آپاردين هايانا دونيا ستّار ام قئيديندن بير يوللوق بوشام چوخ چتين حوسنونله بيرده من جوشام باشقا بير عالمين عشقيله خوشام بيرده باغلامارام بئل سانا دونيا ✍ستار گول محمدی

وصـل یـار اولمــاز میسّر هـر بلاکش عاشیقه من صداقتله بو یولدا چوخ مصیبت چکمیشم نـازنینلر وصــلینه من نـایل اولســام حــقلی یم چون کی چوخ مهپاره لر عشقینده زحمت چکمیشم

قرنقوش قوشلار قوشلار آ قوشلار قارانقوشلار  آ   قوشلار چه چه وورون هاوادا گاه یئرده گاه یووادا قونون بو تک بوداغا چوخ گئتمه یین اوزاغا آ قوشلاریم گئتمه یین منی غمگین ائتمه یین قوشلار نئچون گئدیرسیز یوخسا کی سئیر ائدیرسیز بیر سس گلیر اوزاقدان ائشیدیرم بایاقدان قیش گونلری یاووق دیر سیزین یئرلر سویوقدور وار ایستیجه اؤلکه لر قیشدا سیزه خوش گلر صبر ائله قوی یاز اولسون بیر قار یاغیش آز اولسون سوقات گتیرر قوشلار بیزه گؤزل ماهنی لار 🐦🐦🐦 سن گلنده قرنقوش بو ایللره یاز گلیر دالینجا قطار قطار دورنا گلیر قاز گلیر گیتمه اوزاق قرنقوش سینه سی آق قرنقوش چوخ اولکه لر گزمیسن اوخو نغمن شیرین دی دنیادا ان گوزل یئر اوز یوانیز یئریزدی خوش گلمیسن قارانقوش قالمیشدیم نگران قوش یاز قوشو سن گلنده آچیر نرگیس یاسمن نغمه دولور قلبیمه سوز قوشورام سیزه من قرنقوش آی قرنقوش گورمه شخته بوران قوش

شعريم وار طبيعت اوغلويام طبعيم جوشاندا داغا شعر يازارام گوله شعريم وار ياريلقانلار اوچوب توز قوپاراندا عؤمور قوشي اؤچَن چؤله شعريم وار آق سقّالار گئديب جوان قالاندا اوبالار كوچدوقو يوردي داناندا اجل گَليب بير بير جانلار آلاندا چمنه شعريم وار گوله شعريم وار غافل انسانلارا جاهل اولانا عقباني اؤتوروب دونيا دوتانا آخرتين مالا پولا ساتانا خزانه شعريم وار يئله شعريم وار دره‌لردن سئللّر شيرشير گئده‌نده دوشلرينده بنفشه‌لر بيتنده تراكتورلار مرجميزي اكنده اؤرگه شعريم وار ديله شعريم وار مصطفي چيچگي چمن اورتَنده گول پرچملر يونجالاري اوپَنده سارماشيقلار آغاجلاري سؤونده بهاره شعريم وار گؤله شعريم وار انسانلار عؤمري تك بوغدا يئتَنده اجل اوراقلاري اوني بيچَنده چشمه‌لردن تميز سودان ايچنده عؤمورلر بنزيیر يئله شعريم وار «بخشي» سن شعريوي ياز گوله گوله وزنين قافيه‌سين دوز گَله گَله صداقتله گتير سؤز گوله گوله سؤيله گول وطنه ائله شعريم وار استاد میرزا محمد بخشی

سحر حمیده رئیس زاده شعر خزان گئنه نیسگیل لئچگین سالدی خزان اچمامیش غنچه لری چالدی خزان منی ده جایناغینا آلدی خزان یاشیل احساسلی چمن ساخلا منه .. یالانا دوزلوک اوخو ائتسه اثر گول بیتیب ، غنچه گولوب ، آچسا سحر بیرده گؤرکملی اوره ک گؤرسن اگر او اوره کلرده وطن ساخلا منه .. سؤزلرین سینه لره کؤز قالادار دویغونون توشگولو کؤزدن جالادار اونداکی سؤز گونشی چالخالادار سؤزده اولدوز کیمی دن ساخلا منه . دایاغ عونوانلی داغ آواره سی یم قارا گونلرده آغ آواره سی یم بیر گولوشلوک دوداغ آواره سی یم غملره قارشی گولن ساخلا منه .. دئمیرم خوشلوغا یاد ائت یادا سال غم اؤنونده آدیمی فریادا سال منی ده غم بؤلوشنده آدا سال بیر اوره ک پایلی محن ساخلا منه .. بیر دایان ، ذیروه یه دیز قوی گلیرم سانماکی خسته یم ، ایز قوی گلیرم بیر چاناق سؤزده دئنیز قوی گلیرم بیر دؤیوش مئیدانی چن ساخلا منه .. اوجالیقلاردا ایزین وار دئیه رک چیخارام داغلارا یار – یار دئیه ره ک گله رم غربت ائوین دار دئیه ره ک وطن عونوانلی کفن ساخلا منه

دلبـــرا من سندن آیرےتنده جانے نینیرم تخت و تاجے ملك ومالے خانمانے نینیرم ایستیرم وصل جمالین تا قیلام درده دوا من سنین بیمارینم اؤزگه دوانے نینیرم اے مسلمانلار بیلین کی یاریله خوشدے جهان چونکے یاریم گئدے الدن من جهانے نینیرم چوخ دعا لار قیلمیشام من خالیقین درگاهینه چون مورادیم حاصیل اولماز من دعانے نینیرم دلبر آیدیر اے نسیمے اول اتمه فغان من بو گؤن صبر ایله سم داد و فغانے نینیرم عمادالدین نسیمی

پریشان کونلومه لایق پریشان روزگاریم وار قرارسیز دونیادا آنجاق روان بی قراریم وار نه یولداشدان وفاگوردوم نه دوشمندن کرامت من یولون آزمیش جماعتدن غریبه اینتیظاریم وار گوروبسن اوز دیاریندا غریب اولموش بیر انسانی منم من بی کس و یالقیز نه غمخواریم نه یاریم وار اگر گلراز عومرومده سارالمیش یارپاغام یئرده ولی عشقین مقامیندا چیخارلی اعتباریم وار دئیین شیرازه چوخ فخر ائتمه سنده حافظین واردیر منیمده شعر مولکونده دیرلی شهریاریم وار میانالی

اوتاغیمدا؛ آغاجی چوروموش، شیشه‌سی سینمیش، بیر پنجره وار!         ایل‌لردی او پنجره‌نین؛ بوتاییندا من، اوتاییندا...! اوجسوز-بوجاقسیز بیر یول... نه زاماندیر ایکی گؤزوم؛ یولچوسوز بو یولا تیکیلی قالدی! هر کیم دئسه دوز دئییب، اینتظار اؤلومون یولداشیدیر!  اَلی قیریلسین؛ پنجره‌نی دوزلده‌نین... کاتب اوغلو

‌‌‎‌‌‌‎‌‌‌‌‌‌‎‌‌‌‌‌‌‎‌‌‌‌‌‌‎‌‌‌‌‎‌‌‌‎‌‌‌ دؤولتلی‌یه ساخسی لازم اوْلاندا وۇرۇب سیندیرمیشیق اؤز کۆزه‌میزی چیخدیغیمیز قێنێ بَیَنمه‌میشیک بیز ائلی آتمیشیق ائل آتیب بیزی، ائلیمیزه نه گۆن آغلامیشیق بیز؟ باغین شاختا وۇرۇب بوْستانی یانیب ائل بیزه نئیله‌سین نه گۆن آغلاسین؟ آغزی قیفیللانیب، دیلی باغلانیب بۇ گۆن من سهندم، سن شهرییارسان گل باشێن اۇجالداق قوْجا تبریزین بیر کره یادلارین داشینی، آتاق چَکَک قایغی‌سینی، اؤز ائلیمیزین اؤزگه چیراغینا یاغ اوْلماق بس‌دیر دوْغما ائللریمیز قارانلیق‌دادیر یانیب یاندیرمایاق یادین اوْجاغین ائویمیز سوْیۇقدۇر، قێش‌دێر شاختادێر بولود قاراچورلو(سهند) ‌‌‎‌‌‌‎‌‌‌‌‌‌‎‌‌‌‌‌‌‎‌‌‌‌‌‌‎‌‌‌‌‎‌‌‌‎‌‌‌‌‌‌‎‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎‌‌‌‎‌‌‌‌‌‌‎‌‌‌‌‌‌‎‌‌‌‌‌‌‎‌‌‌‌‎‌‌‌‎‌‌‌‌‌‌‎‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‎‌‌‌‎‌‌‌‌‌‌‎‌‌‌‌‌‌‎‌‌‌‌‌‌‎‌‌‌‌‎‌‌‌‎‌‌‌‌‌‌‎‌‌‌‌‌‌‎‌‌‌‌‌‌‎‌‌‌‌‌‌‌‌‌‌‌‌

منی جاندان اوساندیردی ، جفادان یار اوسانمازمی؟ فلک لر یاندی آهیمدان ، مرادیم شمعی یانمازمی؟ هامی بیمارینه جانان ، دوای درد ائدر احسان نئچون قیلماز منه درمان ، منی بیمار سانمازمی؟ غمیم پنهان توتاردیم من ، دئدیلر یاره قیل روشن دئسه م او بی وفا بیلمم ، اینانیرمی؟ اینانمازمی؟ شب هیجران یانار جانیم ، توکر قان چشم گیریانیم اویادیر خلقی افغانیم ، قارا بختیم اویانمازمی؟ گول رخسارینه قارشو ، گوزومدن قانلی آخار سو حبیبیم فصل گول دور بو ، آخار سولار بولانمازمی؟ دگیلدیم من سنه مایل ، سن ائتدین عقلیمی زاییل منه طعن ائیله ین غافل ، سنی گورجک اوتانمازمی؟ فضولی رند شئیدادیر ، همیشه خلقه روسوادیر سورون کی بو نه سئودادیر ، بو سئودادان اوسانمازمی؟ فضولی