يئنه، يا رب، نه غمگین دیر منیم بو شاد اولان کؤنلوم، روموز عشقدن آگاه اولوب، اوستاد اولان کؤنلوم. گؤروبدور ياری اغياره، اولوبدور محو-نظاره، ائدیبدیر سینه ‌سین پاره، منیم آباد اولان کؤنلوم. نیيه پيمانه‌دن کئچدین، نیيه زنجیردن قاچدین؟ نه‌دندیر چؤللره دوشدون، منیم برباد اولان کؤنلوم؟ فراغین روز-محشردیر، سراسر محنتی-غمدیر، او زولفون کیمی درهمدیر، منیم آزاد اولان کؤنلوم. باخین بو ناتوان زاره، گونو بختیم کیمی قاره، گزر مجنون تک آواره، منیم ناشاد اولان کؤنلوم. ✍🏻 خورشید بانو ناتوان

آے ایشیغے، بولاق باشے، گؤے چمن، بیر دونیامیز، بیر سن اؤزون، بیر دہ من پرده-پردہ گاہ آغلایان، گاہ گولن- نفسینلہ اوخو گؤزل! قوے سسین- اوره‌ییمدہ ڪامان ڪیمے تیتره‌سین. ڪاروان-ڪاروان گؤیدن اولدوزلار ڪؤچور اؤز بختینہ هر ڪس بیر اولڪر سئچیر قوجالیریق...، عؤمور ڪئچیر، گون ڪئچیر اوخو گؤزل، اوخو گؤزل! قوے سسین- اوره‌ییمدہ ڪامان ڪیمے تیتره‌سین. جان ائویمہ سیغیشمایان آرزولار- بیر دونیادا نئچہ دونیا آرزولار. محبّتین نہ ایلڪے، نہ سونو وار اوخو‌ گؤزل، اوخو‌ گؤزل! قوے سسین- اوره‌ییمدہ ڪامان ڪیمے تیتره‌سین... ✍ صمد وورغون

پشیمان اولساندا آختارما منی گزدیغین یر لری چوخ دولانمیشام طعنه لی سوز لره گیزلی یانمیشام باهاریم قورتاریپ قارلی بیر قیشام پشیمان اولساندا آختارما منی چیخارام دوزلره داغلارا سن سیز گزرم داغلاری دومان سیز چن سیز گز دولان دونیانی گز دولان منسیز پشیمان اولسان دا آختارما منی بیلمدین قدریمی ترک ائدین منی نئجه پس اونودوم اولوب کئچه نی سن کی تانیمادین دوستی دوشمنی پشیمان اولسان دا آختارما منی

▫️بيلمم بو نازنين کيمين ایستکلی ياری‌دير، يا هانسی بختيارلارين بختياری‌دير.   آچديقجا گول جمالينی، ائللر فرح‌لنير، گويا، گؤزللیک عالمينين نوباهاری‌دير.   دونيا بو نازنين مله‌يين حسرتين چکير، خلقين سئویملی آفتی، هم شهرياری‌دیر.   يوز دفعه يانساق عشق اودونا، قورخو بيلمريک، چونکی دياريميز بيزيم، اودلار دياری‌دیر.   بير واخت سجده‌گاه ايدی آتش‌پرستلره، شهرِ صبا کی، مرکزی دريا کناری‌دير.   قان ائتمه ساقی باغريميزی، باده تئز گتير! دولدور قدحلری، گئجه‌ميز کئچدی، ياری‌دير.   هر کيم دئييرسه: «سئومه بو رعنا گؤزللری!» بيلمير کی، سئوگی عالمِ بی‌اختياری‌دير.   بير گون گلر کی، من گئده‌رم، خلق سؤيله‌ير: بيچاره «واحيد»ين بو غزل يادگاری‌دير... ✍🏻 علی آقا واحد

‍ هئچ بیلمیرم من سنی، هاچان، هاردا ایتیردیم. یاغیش یودو، یوخسا کی، کولَک آپاردی سنی؟ بو سئوگی ناغیلینی، من بیر یوللوق بیتیردیم. آختارمیرام، آختارسام، یقین تاپاردیم سنی. دونیادا بیرجه قورخوم، سنی ایتیرمک ایدی. سن یوخسان، بو دونیادا داها منه قورخو یوخ. آما سنسیز ائله بیل، هر شئی شیکست‌‌دی ایندی. ساعاتیمین عقربی، چاینیکیمین قولپو یوخ. یئل ووردوقجا یئل‌لَنیر، پئنجه‌ییمین اَته‌یی. پئنجه‌ییمین سونونجو- دویمه‌سی‌تک قوپموسان. باری چوخدان سووولموش- آغاجین اوستونده‌کی- ان سونونجو، ان شیرین- مئیوه‌سی‌تک قوپموسان‌. «دردلی‌لر اؤز دردینی، سویا دئیر» دئییبلر. یاخشی کی، سو دا گلدی، دردیمدن آزاد اولدوم. «آرمودون یاخشیسینی، آیی یئیر» دئییبلر. گئتدین هانسی آیینین، داماغیندا داد اولدون؟! سنسیز ائله بیلمه‌ کی، کئفه باخیرام، کئفه! سن یادیما دوشنده، داریخیرام هر گئجه‌. اوشاق واختی هاچان‌سا- عؤمرومده بیرجه دفعه، پیشی‌ییمیز ایتَنده، داریخمیشدیم بئله‌جه. داها اوشاق دئییلم، هر ایتَنه آغلایام. راحات یاتیرام داها، یوخوم دئو یوخوسودو. ...کیمدی بو گئجه یاری، قاپیمی جیرماق‌لایان؟ بو نه سس‌دی؟ دئیه‌سن، پیشیک مییولتوسودو. ✍ رامیز روشن

نیسبت سنہ اے شوخ ! زلیخا اولا بیلمز بو عئشوه‌دہ ، بو غمزه‌دہ ، لیلا اولا بیلمز آهوے ختن سندن آلیب طرز نیگاهی گول برگ لبین تڪ گول حمرا اولا بیلمز ائتمه‌م گؤزونو نرگیز شهلایہ برابر زولف سیه‌ین تڪ شب یلدا اولا بیلمز جان نقدینہ بیر بوسہ ڪرم قیل سنے تاری داهے دئمہ « ال چڪ ڪے بو سئودا اولا بیلمز» مندن سنہ عجز ائیله‌مڪ اولسون گئجه- گوندوز سندن منہ هے ناز ڪے « حاشا اولا بیلمز» بس ڪے منے گؤرجَڪ، منہ وحشے ڪیمے باخدین ایندے داهے مجنون منہ همتا اولا بیلمز چوخ عشقہ دوشن عاشق بیچاره‌نے گؤردم هئچ بیرے نباتے ڪیمے شئیدا اولا بیلمز ✍ حڪیم نباتی

ایسته‌سن كؤنلوم كیمے زولفون پریشان اولماسین، اول قـدر ناز ائت مـنہ، آہ ائتـمك امـكان اولماسین! درد عشقـین قصـد جان ائتدی‌سه، من هم شاكیرم، ایسته‌رم‌جیسمیمده‌درداولسون،دخی‌جان‌اولماسین قویمـا اغیـار ائیله‌ســین كویونـدہ جولان، اے پری! اهــرمن‌لــر  مـــالك  مــلك  سلیمـــان  اولماسیــــن آتــش رویونـــدہ افـــعے تـك یاتیـــب گیســولرین، طُرفـہ جـادودور كـی مـار آتشدہ سوزان اولماسین دئرلــر عاشـق‌كش نیگاریــم قتلیمـــہ آمـــاده‌دیـــر آللاہ آللاہ، بیـر سبـب قیـل كـی پشیمـان اولماسین! مبتــلاے درد عشقـــم، ال گــؤتور منـــدن، طبیــب! ائیلــه بیـر تدبــیر ڪـی، بــو دردہ درمـان اولماسین! "صابــر"ا امّیـــد وصـــل ایلــہ غـــم هیجرانـہ دؤز! هانسے بیر مشكلدو كے صبر ایلہ آسان اولماسین؟ ✍ میرزا علی‌اڪبر صابر

اوسوبودو ها اوسوبودو اوکیشی منیم دوستومودی گئتدی سفره گلمه دی یایلیغیمی دا وئرمه دی یایلیغیمین اوجو قره یوللادی پیغمبره پیغمبر بدل بدل بدلی اولدوردولر آغا بالا گئدیردیلر آغا بالانین پیچاغی دمیردن ساچاغی ووردوم یخدن آچیلدی اینجی مرجان سئچیلدی اینجی مرجان فیل فیلی گل اوخو بیزیم دیلی بیزیم دیل اوروم دیلی اورومنان کئچن آتلار چرخین پیچاغین قاتدار

من، آی له له، بو جیرانا یانماییم؟ اصلی خانین جئیرانیدی بو جئیران، اینصافدیمی احوالینی بیلمگیم؟ اصلی خانین جئیرانیدی بو جئیران. گولله دییب بو جئیرانین اوزونه، قان تؤکولوب توپوغونا، دیزینه، گؤزو بنزر خان اصلینین گؤزونه، اصلی خانین جئیرانیدی بو جئیران. زالیم اووچو بونو الدن سالیبدی، دؤرد یانینی قارا قانلار آلیبدی، کیمسه سی یوخ، ملول، موشکول قالیبدی، اصلی خانین جئیرانیدی بو جئیران. یارالاری کؤهنه دئییل، تزه دی، سییاه سورمه آلا گؤزه مزه دی، بو جئیرانی کیم آل قانا بزه دی؟ اصلی خانین جئیرانیدی بو جئیران. کرمم، دوشموشم من قوربت ائله، جئیرانا چیخمیشدی جئیرانی چؤله، اغلارام، سیزلارام من بوندان بئله، اصلی خانین جئیرانیدی بو جئیران. ✍ اصلی کرم

اول باشدان سنین عاغلین اولسایدی. قاچیرتمازدین بدویلاری، قوشلاری. اویماز ایدین سن کئشیشین فعلینه، اغلار قویماز ایدین تای-توشلاری. سن خان اوغلو اؤز یئرینده قالسایدین، گنجه گؤزه لی نین بیرین آلسایدین، اونون قاداسینی جانا سالسایدین، ایندی چکدیرمزدین اینجه دیشلری. ✍ اصلی کرم

انوتما سوگولوم ، منه آیریلیخ اولمنن بترمیش اولومه نه وارکی سن دئدین آیریلاخ دیلیم هه دیدین آغریان اورک دی دیله نه وارکی سیویرم دییدین کاش ساغ اولاندا قبریمین اوستونه گلمه نه وارکی

گلنده صبح زامانی صداسی بولبولومون آلیر بو جانیمی شورو نواسی بولبولومون فداسیدیر اودا من تک گول اوزلو بیر گؤزلین بو خسته جانیم اولایدی فداسی بولبولومون بلایه صبر ائده بیلمیر، شکسته خاطیردیر نه وارسا، قوی منه گلسین بلاسی بولبولومون منیم کیمی اودا بیچاره دیر، فلکزه ده دیر نه وار طبیبی، نه درده دواسی بولبولومون همیشه کنجِ قفسده اسیرِ محنت دیر نه دیر ثبوت ائله ین، یوخ جزاسی بولبولومون محبت اهلی بلادان اؤلونجه قُورتارماز باشیندا چوخدور هله ماجراسی بولبولومون جمالِ یاره باخیب، واحد، هر سحر یالوار کی، مستجاب اولور هر بیر دعاسی بولبولومون ✍🏻 واحد