چکیلمیر یوللاردان فیکیر خیالم گؤرن بو چوللرده کیمیم وار منیم سازده کرمییه قوشولان سسیم کاماندا اینله ین سیمیم وار منیم کسیلیب قاپیمنان گلیب گئدنیم یوخ مطلب قانانیم قدیر بیلنیم دومانلار ایچینده یورگون کوهلنیم طوفانلار قوینوندا گمییم وار منیم حسین نئجه اولدو غنچه نییتیم داشلارا توخوندو ایلک محبتیم اؤزگه‌نی گؤلدرن سؤزوم صحبتم اؤزومو آغلادان غمییم وار منیم ✍ حسین عارف

گلمیشم مجلیسه من، کؤنلونوزو شاد ائله ییم نه کی بیهوده یئره ناله و فریاد ائله ییم کیمسه یوخ ساکیت اوتورسون، قوُلاق آسسین سؤزومه قالمیشام مات و معطل، کیمه ایراد ائله ییم توُتالیم عصرمیزین حضرت عیساسی منم بو سوخا سوخدا نئجه معجزه ایجاد ائله ییم؟ گلمه گیمدن غرضیم سیزلری شاد ائتمک ایدی آزا جیقدا اؤزومو غصه دن آزاد ائله ییم ✍ واحد

کیم کی ایستر اوزونی سرور ایام السین در میخاننی اوپسون طلبی جام السین آب کوثرده منیم هر نه نصیبیم وارسا دوندریب ربیم اونو باده ی گلفام السین یار گلدی هامی اوز دردینه مشغول اولدی قالمادی کیمسه منیم دردیمه انجام السین سن نه کوتاهیسن ای شام وصال دلبر حق منیم عمرومی کسسین سنه انعام السین اولسا ناکاملیغیم گر او پرینین کامی دلی دیوانمی حق دهرده ناکام السین سید اول زلف رخوندن کی حکایت سویلر ایستیر کین گونون اول وجهیله آخشام السین ✍ سید عظیم شیروانی

ای ساریبان آهسته گئت ، آرام جانیمدیر گئدن یار کونلومو چکمیش منیم، روح و روانیمدیر گئدن سعی ائیله دیم افسونیله، پینهان قیلام من دردیمی پینهان ایشیم چیخدی اوزه، سیریله قانیمدیر گئدن قالدیم بئله زار و ذلیل، بیچاره یم قلبیم علیل دوشدوم او دیلداردان اوزاق، آسوده یاریمدیر گئدن یوخ عهدینین بونیادی هی، بیتمز اونون بیدادی هئچ چیخماز کونولدن یادی هئچ، ان خوش زمانیمدیر گئدن بیر آن دایان ای ساریبان، قویما گئده بو کاروان اول سروه اویموشدور کونول، سروی روانیمدیر گئدن بیر دون گئری ای نازنین، گوز مسکنین اولسون سنین سن سیز بو سونسوز گویلره، آه و فغانیمدیر گئدن جان ترک ائدنده جیسمینی، اینسان آچار اوز حیسسینی یوخدی سوزون گورموش گوزوم، بو خسته جانیمدیر گئدن سعدی سنه لایق دئیل، یاردان گیلئی ای بیوفا چوخ گوردوم اوندان من جفا، صبر و توانیم دیر گئدن

دِ گوروم هاردان گلیسن، ائلینه قوربان، قارا گؤز. بیرچه دانیش شیرین-شیرین، دیلینه قوربان، قارا گؤز. زولفلرین گردندَن آشیـر، وصفینه دیلیم دولاشیر. سونا کیمی باشی یاشیل، گؤلونه قوربان، قارا گؤز. آشیق صمَد مَلوُل باخیر، ناز-قمزَن ایویمی ییخیر. دوز ییریشین، یانا چیخیر، تِلینه قوربان، قارا گؤز.

کیمده واردیر گؤزلیم ، سنده اولان جاذبه لر سنه دنیاده مگر ، عاشق اولان دا غم ائلر ؟ بس دیر اولدورمیه جکسن ، گؤزلیم دنیانی هر یوزی گؤیچک اولان دا ، بوقدر چم خم ائلر اینجیمه گؤز یاشیم آخسا ، سنی گؤردوکده گولوم گول آچیل دیخجا باهار فصلی بولود شبنم ائلر ناز و غمزه ن ، یئریشین ، شوخ باخئشین عالم دیر بیرده زولفون اوزه توکسن اودا بیر عالم ائلر حیف سن گزمه یاراشماز سنه ، بیگانه ایله او آچیب سرینی دونیایه ، سنی محرم ائلر واحدم عمرومو من ، عشقیله صرف ایله میشم عشق یا اؤلدورر آخیر ، یا منی آدم ائلر ✍🏽 واحد

تویدا نازلا سوزن گوزل نازیننان خبرین وارمی قاش گوزونو سوزن گوزل گوزونن خبرین وارمی اوجا بوی سان اینجه بیل سن چاتما قاش سان شیرین دیل سن ائله بیلدیم قیزیل گل سن یازیننان خبرین وارمی باخیشینلا سوز دییرسن نه دییرسن دوز دییرسن صبرین اولسون دوز دییرسن دوزومنن خبرین وارمی زلفلر دوشوب چینین اوسته گوزل یوخدو سن هوسده اهلیمانی سالدین خسته سازیننان خبرین وارمی

نعشه لندیم گوزلرینن دونن گئجه تویدا گوردوم دنیانین هر گوزللیغین اوقامتده بویدا گوردوم ماتام عشقین طرزینده من اونون حد مرزینده من بیر ساعاتین عرضینده من قیشدا گوردوم یای دا گوردوم گورسه نیردی سوبوغازدا تام شیرینلیک دیل آغیزدا یازیلمامیش آغ کاغیذدا سوی دا گوردوم بوی دا گوردوم گوزوم قالدی جوت خالیندا اوزوم دالقین خیالیندا اونون پارلاق جمالیندا گون د گوردوم آی دا گوردوم قربانام یازی یازانا حسنونن بلبل یازانا عدالت تکین اوزانا یئتمز اوننان فایدا گوردوم ✍🏽 عدالت دومان

اولارام درده همدم سنی غملی گؤرنده ساچلاریما دوشر دن سنی غملی گؤرنده بوران اولار قار اولا ر ایشیم آه و زار اولار دونیا منه تار اولار سنی غملی گؤرنده او گونش اوزونو غم بورومه سین دومان چم ساچلاریما دوشر دن سنی غملی گؤرنده بوران اولار قار اولار ایشیم آه و زار اولار منه دونیا تار اولار سنی غملی گؤرنده اسر کولک دایانار گؤیلر قارا بویانار عاشق اودلارا یانار سنی غملی گؤرنده بوران اولار قار اولار ایشیم آه و زار اولار منه دونیا تار اولار سنی غملی گؤرنده

دئدیلر: "عهدینی دانیر او دلدار" دئدیم: "یالان اولار"؛ من اینانمادیم دئدیلر: "قیش گلیر، قاییت بو یولدان!" اسدی یئل؛ یاغدی قار؛ من اینانمادیم دئدیلر: "گل اونوت او گول یاناغی" دئدیم: "سینم اوسته چکمه یین داغی"! دئدیلر: "تویودور بو آخشام چاغی" اؤتدو تار؛ دیندی ساز من اینانمادیم او گونن قلبیمی تک لیخ سیخسادا اوزگه بیر گوزلی سالمارام یادا مقصّر سن اولدون؛ یاریم دونیادا، سونرالار هیچ کسه من اینانمادیم ✍ حسین عاریف

آی اوزلو نگاریم کیمه مهمان اولاجاقسان بیر سویله کیمین شانینه شایان اولاجاقسان شاهلیق چتری وار باشین اوستونده بو آخشام عنبر چترینله کیمه سلطان اولاجاقسان شکر دئمیرم من سنه اوندان دا شیرین سن دلبر نئجه بیر بختوره جان اولاجاقسان ظلمت گئجه سن نورلی چیراغ ، پیس گوزه گلمه ای آب حیات سن کیمه جانان اولاجاقسان گئتدین نئجه بس تاب ائله سین هجره نظامی او خسته ایکن ، سن کیمه درمان اولاجاقسان ✍ نظامی

آغلادیم من ، هیجر یاریله گوزوم ، دینجلمه دی سانکی داشدان دی ، اونون قلبی ، او هئچ کوورلمه دی اوخلادی مژگان اوخیله ، دم به دم ، بو سینه می دَی دی اوخلار ، هم قییتدی ، سینه می هئچ دلمه دی صاف تمیز عشقیله ، سئودیم من ، او یاری ای کونول تازه قالدی عشقیمیز ، هئچ بیر زمان ، کهنَلمَدی ییخدی نامردلر منی ، بیر پله ، آرتسین رتبه سی لیک منن پیس ییخیلدی ، هئچ زمان ، یوکسلمه دی اینجی لیخ بیر بخشیمیش کی ، انسانا وئرمیش زمان چون گوبودلار ، چوخ چالیشدی اینجه له ، اینجلمه دی سائلا آماده اول ، چون عمره یوخدی اعتبار غرّه لنمه ، بوش نفسدی ، گئتدی بیردن گلمه دی