دئدی حسین سنه قربان اولا بلالی باجون گلوب زیارتیوه شامدن یارالی باجون اسیر شام و مدینه غزالیام قارداش ئوزوم علی قیزی یاسلی عزالیام قارداش دیار کوفه و شام و حلب مُسافِریَم ایاقه دور نجه گور ماجرالیام قارداش گیدوب جلالیم الیمدن حسین باشیم آغاروب دینمورم نجه باشی بلالیام قارداش سزادی دولسا نوائیله نینوا دشتی من آغلیاندا، که نی تک نوالیام قارداش اسفلی شکوه‌لریم واردی مخبر شامم شکسته دور اورگیم نینوالیام قارداش گیدنده نعشیوی عریان قوم اوسته گورموشدوم کفنسیز اولماقیوا دفن، حالیام قارداش ئوزون بُلوردون اوگون باشدا معجریم یوخودی او عذرین ایمدیده غرق ملالیام قارداش یارالی گون قاباقیندا سنی قویوب گیتدوم هله او گیتماقین افسرده حالیام قارداش خانملیق ایلدیقیم کوفه‌ده نَلَر گوردوم باشون گوروردی نجه ابتلالیام قارداش یارالی باشیوی شمر ایتدی بیرگئجه مهمان اودور بیر عمریدی گریان لیالیام قارداش گلنمدیم او گئجه من یانان چادردِیدیم آنامدا گوردی نه سوز خفالیام قارداش سنون یرون او گجه خیلی نامناسبیدی اودور من ایندیده رنج و عنالیام قارداش صباح اولاندا باشون پیشوازیمه گلدی بُلوردی مملکت عشقه والیام قارداش گلنده سن دانیشوردوم کجاوه‌ده گوردون که نطقده نجه حیدر مثالیام قارداش دیردی کوفه لیلر مرتضی علی دانیشور اودور دئدیم او علینون من آلیام قارداش باشون اوگون منه گوستردی ایله لطف و نوال که حشر اولونجا رهینِ نوالیام قارداش او زینبم منی گون گورممیشدی بی پرده هامی بُلوردی آنام تک حیالیام قارداش سنون محبّتون ائتدی اسیر سالدی چوله محبّت عالمینون مه جمالیام قارداش هارا گیدوب باشون آردینجا گئتمیشم منده مقام عشقیده باخ گور وفالیام قارداش؟ آپاردی مجلس عامه بیزی زیاد اوغلی گوره‌گوره باشی قاندان حنالیام قارداش اسوبدی باخمادی گلزاریمه سموم خزان تصوّر ائتمدی عصمت نهالیام قارداش دانیشدیروب منی ووردی دوباره دیل یاراسی بیان ما وَقَعه نطق لالیام قارداش باشون دالنجا دوشوب شامه گئتمیشم بیر باش رموز عشقده مجنوندان عالیام قارداش وروبدیلار او قَدَر تازیانه کعب سنان هنوز جسمیمه باخسان یارالیام قارداش دولانمیشام باش آچیق شامیده محلّه‌لری خیال ائدردی گورن لااُبالیام قارداش گیرنده شامه منه نامناسب آد دیدیلر بُله بُله که پیمبر عیالیام قارداش دولاندوروردولا کوچه به کوچه قول باغلی خیال ائدردیلر چین و خطالیام قارداش توکردیلر باشیما کول دویردیلر بی جرم گمان ائدردیله جُرم و خطالیام قارداش گونوم او شهریده بختیم کیمی دونوب شامه اگر چه شمس حیا، مه لقالیام قارداش باشیمدا قمچی‌یری معجریم کیمی قرالوب ایکی قرائیله باشی قرالیام قارداش پوزوب خیالیمی بیر نحویله خرابه غمی دینمورم بوقدر وار خیالیام قارداش او قدر صبر ائلدیم صبر مندن اولدی ملول بو یولدا گور نه شهامت نمالیام قارداش دایانا بُلمدیم اما یزید بَزمینده سبب او بزمیدی چوخ غمفزالیام قارداش اگر او مجلسین اوضاعینی «حسینی» یازا اونا بُیوک صله ویرّم سخالیام قارداش #اربعین