شهادت حضرت علی (ع)
احسان تبریزی
.
دنیانی ترک ائتدی بو گون شاه ولایت
سوندی جهاندا مشعل عدل وعدالت
ناله ائدیر ارض وسما
عالم اولوب ماتمسرا
مظلوم علی وای …
.
.
.
ائتدی اثر غم آب وآتش خاک وباده
درد وغم ومحنت اولوب حدّن زیاده
گویده ملک یکسر گلیب افغان وداده
نه یئرده وار نه گویده وار بو درده طاقت
ناله ائدیر ارض وسما
عالم اولوب ماتمسرا
مظلوم علی وای …
.
.
.
قالدی یتیم لر کوفه ده بی یار وهمدم
یوخ باش چکن بیر دیندیردن دیللرده وار غم
یول گوزلیور بیداد رسلر حالی برهم
بس هاردادور گلمیر ائدن بیزدن حمایت
ناله ائدیر ارض وسما
عالم اولوب ماتمسرا
مظلوم علی وای …
.
.
.
ایوای علی ئولدی دیور گویده ملک لر
ناله ائدن وقته ملک آغلور فلک لر
اوت دوتدی یاندی آتش غمده اوره ک لر
شیر خدا قبره گئدیر باشدا جراحت
ناله ائدیر ارض وسما
عالم اولوب ماتمسرا
مظلوم علی وای …
.
.
.
آخر نفسده زینبه حسرتله باخدی
زینب جهانی آهیله یاندیردی یاخدی
اولدوز کیمی قان یاش یوزه گوزلردن آخدی
باشه ووروب قان آغلادی آل رسالت
ناله ائدیر ارض وسما
عالم اولوب ماتمسرا
مظلوم علی وای …
.
.
.
قویدی فلک آغلار بو گون آل عبانی
تپراق آلوب آغوشینه شیر خدانی
دفن ایلییب لر نیمه شب شمس ولانی
زهرا کیمی قبری اولوبدی بی علامت
ناله ائدیر ارض وسما
عالم اولوب ماتمسرا
مظلوم علی وای …