#زبانحال خواهر حضرت رقیه (س) #مرحوم معزی اردبیلی بانوای:#کربلایی_منوچهر_حسن زاده آی شامیده گوز یاشلی ئولن قافله گیتدی اوچ یاشدا اولان غرق مُحن قافله گیتدی . سس ویر سسیمه حالی پریشان باجوام من آغوشه آلان قبریوی گریان باجوام من سنسیز گونی قاره ئورگی قان باجوام من آغلاتما منی شامه گلن قافله گیتدی . ویرانه ده قوینوندا قالان اللره قربان قاره کفن ایچره بوکولن تللره قربان قبرونده اویان یاتما شیرین دیللره قربان گوزلر سنیده اهل وطن قافله گیتدی . دوشدی یولا غم قافله سی من دالا قالدیم الله بیلوری گلدی یرون نه حالا قالدیم تا عطریوی بیر یولدا مشامیم آلا قالدیم گلدیم سنه خاطر بورا من قافله گیتدی . ویرانه ده یاندیم سسون افلاکه چخاندا آخشام چاقیلار قلبیوی غم غصّه سخاندا دیواره قویاردون یوزوی چوخ داریخاندا محبوبه ی سلطان زمن قافله گیتدی گورسندی آغاج یاره سی عالی قوناقوندا پیشوازینه چخدون گیجه چاقی اوطاقوندا ئولدون قوناقین قانیوا غنچه دوداقوندا ئوز معجری دفنینده کفن قافله گیتدی . غسّاله یوواندا سنی احوالیوه یاندی اللرده ئولوبدور دیدی غسلونده دایاندی عمّه م بویوروب قمچیه مدّتدی نشاندی آی کرب و بلادن دؤیولن قافله گیتدی . لایلای گیجه قانین بابامون زلفه یاخان قیز لایلای یوزونه گوز یاشی یوللاردا آخان قیز لایلای قوجالان عمَّه مَه حسرتله باخان قیز روشن گونوزی شامه دونن قافله گیتدی لایلای بدنی شمع مثالی ارییَن قیز لایلای من آجام عمّه مه گیزلنجه دیین قیز لایلای بابامون خاطرینه قاره گیین قیز قالما باجی ویرانه ده سن قافله گیتدی