#ورود_کاروان_حضرت_امام_علیه_سلام_و_کاروان_دشمن_به_کربلا زَهرا قزی زِینب یِتیشُوب کَرب و بَلایه عَرض اِیلدی قارداشنا دوشدوخ نَه بَلایه فَرمایش اِیدوب بِیلَه صَفالی چَمن اُولماز آخر مَنه بُوردان صُورا اُوزگه وَطن اُولماز جَدّیم بُیُوروب بُو یِرین اُوصافنی بیر بیر بو عَرصهء مُحنَتدَه منیم تَک ئولَن اُولماز جِسمیمدَن آخان قانیم اِیدر بُو یِری گُلگُون باشیم کَسیلَر جِسمیمَه اَمّا کَفن اُولماز غارت اُولی جِسمیمدَه اُولا جُمله لباسیم گُونلَر قاباقیندا مَنه بیر پیرَهَن اُولماز اَنگشتیمی اَنگشتَریمیلَه آپارولّار اَیّامِ سُلیمانیدَه بُو اَهرَمَن اُولماز دوغرالّار علی اَکبریمی قَطعه به قَطعه شام اَهلی کیمی اُمّتِ پیمان شِکَن اُولماز آتلار اَیاقی آتدا قالار قاسمِ ناکام بیر کیمسَه دِیمَز بیر بِیله وَجه الحُسن اُولماز اَصغر قانی پیرایه وِئرَر عَرشِ بَرینَه بیر رَنگیلَه که رَنگِ عَقیقِ یَمَن اُولماز باش سُهلدی قُولسُوز یخلار تُوپراقا عَبّاس هر کس باخا سُویلَر بِیله قُولسُوز بدَن اُولماز زِینب بُو بیاناتی اِیشیتدی دِیلَه گَلدی آخر آنام اُوغُلی بِیله غَملی سُخن اُولماز زِینب نِجه صَبر اِیلیَه بیر بِیلَه بَلایه قُربان سَنه قارداش بِئلَه دَرد و مُحَن اُولماز قارداشی باجی قاننَه غَلطان گُورَه بیلمَز اِیوای مَنه بُو کِشمَکشَه صَبر اِیدَن اُولماز #علومی