رجزخوانی حضرت مسلم(ع) گریز به احوالات کوفه کوفیان بی خرد من مسلمم ، ابن عقیل ذاتیمیز یکسر مطهّر ،نسلیمیز پاک و جلیل فخر ائدر درگاهیمیزده سائل اولسا جبرئیل میوه ی قلب عقیلم ، مرتضانین جانیم رهبریم تنها حسیندی تابع فرمانیم مسلمم من جان فدای خاندان حیدرم حامی دین مبینم خادم پیغمبرم کوفه شهرینده سفیر پادشاه محشرم مرتضی تک کوفه ده تنها قالان مسلم منم دشمنین جان شیشه سین داشه چالان مسلم منم من عقیلون اوغلیام تک باشیمه بیر لشکرم باشیمی قرآنه وئرّم ظالمه باش اگمرم من حسینون دیرناقین مُلک عراقه وئرمرم باشیمه یاغسا بلا ،ثابت دوران مسلم منم عزت آل یزیدی سیندیران مسلم منم مسلمم یکسر فلکلر تحت فرمانیمده دی مصطفانین جرأتی روحیمده، بنیادیمده دی فاتح خیبر علینون قانی چون قانیمده دی لوح عشقیمده حسین آدین یازان مسلم منم نقشه و تدبیر ظلّامی پوزان مسلم منم من وفا نسلیندنم حیدر کیمی آزاده ام هم کلاس رزم عباسم، حسینچی زاده ام بولمرم قورخی ندی چون غیرتین همزاده ام خنجریله سینه ی ظلمی سوکن مسلم منم آل سفیان باشینه تپراق توکن مسلم منم دوره می دوزدور آلوبسوز قورخمارام نام آورم من زنازاده یزیده دست بیعت وئرمرم شاه دینون دامنیندن دوتموشام ال چکمرم مرتضی دشمن لریندن جان آلان مسلم منم رزمگه ده تک باشا طوفان سالان مسلم منم وار یقینیم سیزلره تأثیر قیلماز سؤزلریم نور چشمان خانیم زهرایه قربان گوزلریم هم عم اوغلومدی حسین هم رهبریم هم سروریم هم امامیمدور مقامین مفت و ارزان ساتمارام هئچ تعصبدنده باخسان من حسینی آتمارام دعوت ایلوبسوز بیلورسوز کی حسین هاردان گلور؟ لبلری خندانیدی یاگوزلری گریان گلور؟ وای سیزون احوالوزه زینب بورا مهمان گلور خاکی ام من، روحیم افلاکی، ئوزوم کوکبچیم راه غیرتده حسینچی، عشقیده زینبچیم آسمان عشقیدن سوزموش یره کوکب گلور شهروزه مهمان رقیه مثلی شیرین لب گلور بو ایکیمجی دفعه دور کی کوفیه زینب گلور عم قیزیم غیرتلیدی حیثیّتین سیندیرمیون یاخشی تحویل آلماسوزدا لااقل دینذیرمیون آه او ساعت کوفیه وارد اولوبدور جان عشق اهل بیتی ناقه ی عریانیده ویلان عشق منبر ائتدی نیزه باشین حضرت سلطان عشق گون چیخوب نوک جدایه توز باسوب اولدوزلارین کوفه اهلی باغلیوبدور ریسمانه قیزلارین کوفه نین دروازه سینده گورسنوب حق جلوه سی ائتماق اولماز زینبون حالین او حالدا بررسی نیزه باشیندان اوجالدی ناگهان قرآن سسی تا کی قانلی باش جدا اوستونده قرآن باشلادی کوفه اهلی باشلاری سر نیزه اوسته داشلادی تا حیاسیزلار قوجاقه جمع ائدوبدور داشلاری بو جنایت قانه دؤندردی بوتون گوزیاشلاری سنگ باران ائتدیلر ظلمیله قانلی باشلاری داشلاناندا گون، باخوب اولدوزلاری آغلاشدیلار شاه دینون آلنی سیندی قیزلاری آغلاشدیلار سنگ باران صحبتی عالملری یاندیردی چوخ داش نه داش سانکی دگوردی باشلارا اوچ شعبه اوخ بولمورم اصغر باشی سرنیزه دیدی یاکی یوخ های کی دوشدی داشلانور باشلار، اورک بولدی رباب سهل سانما گر دئسم غش ایلیوب ئولدی رباب نه روادی سویلدی غم قلبیمی بولسون علی بیر دانیش تا دردووی بو بینوا بیلسون علی داش وورولّار باشووه بیکس ننون ئولسون علی کیم گوروبدور صودامر باشی جداده داشلانا باش سینوب رخسارینه پیوسته قانی داشلانا کوفه ده بوقلبیمی گورنه بؤلوللر اصغریم سن پیمبر زاده سن بی شک بولوللر اصغریم هم ووروللار باشوه داش هم گولوللر اصغریم غم قوجالدار باغبانی سولسا لاله گل، بالا دوره ده دشمن گولور سنده اقلّی گول بالا باغبان و گلشن و آلاله قربان اصغره بی گمان مدیونیدور اسلام و قرآن اصغره اول سبب خامم یازار شعر فراوان اصغره چونکی روح و پیکر و هم جان سنوندور اصغریم