شهریار عالمین ای جان جانان یا حسین ای قویان عالملری عشقینده حیران یا حسین ای گوزل آدی اولان هر چاره سیز درده دوا سن حبیب لم یزل سن شافع روز جزا کشتی امید سن عشاقه مصباح الهدا بحر عشقین ائیلوب دیللرده طوفان یا حسین كيم گليب درگاهیوه تاپدي جلال و اعتبار كوي عشقیندن گدالر اخذ ائدر عزّ و وقار سفره جودونده اولموش اهل عرفان ریزه خوار درگهین دارالکرم دی کوی احسان یا حسین اولماسا گر عشق، يول تاپماز سنه عقل و خرد کوکب اجلالیوی خامه ائده بیلمز رصد قالميشام حيران اليمدن دوت اوزون ائيله مدد مكتبونده اولموشام طفل دبستان يا حسين سن طریق عشقده هر سالکین منهاجی سن تاج خلقتسن قويوبسان باشه قاندان تاجي سن روز محشرده اولارسان اهل عشقه ناجی سن قویماسان قالسونلا محشرده پریشان یا حسین آدم و حواني چكدین ساحیله بحرانيدن جان عيساني قوتاردین فتنه دونانیدن كشتي نوحي آپاردين مقصده طوفانيدن سن خليله ائیله دین ناري گلستان يا حسين بحر صبرین داشمادی هر قدر موج ائتدی بلا عهدیوه ائتدین وفا چون البلاء للولا ائيله دین کرب و بلا توپراقيني خاك شفا تربت پاکوندی هر بیر درده درمان یاحسین حق یولوندا ائتمیسن ایثار، ثارالله سن سن حقیقت اهلینه هم رهنما هم راه سن کایناته حکم ائدن یالقیز یارالی شاه سن تحت امریندور سنون بو کون و امکان یا حسین قتلگهده ائیلدون معبودیله راز و نیاز قانلي محراب ايچره قیلدین شوقیله قانلی نماز سن شفاعت امرینه آلدون چوخور یئرده جواز بلکه سوزان ائتمسین عشاقی نیران یاحسین نیزیه چیخدی باشین حق اهلینه یول گوستره باشلادی قرآن يارالي ديللره تسكين وئره وئردی تاریخه ندا ذلت یاراشماز بیز لره آخدی قان ناحقّه چکدی خط بطلان یا حسین بیلمیرم محشر نمایان اولمادی آیا ندن اوندا کی کسدی جفاییله باشین قوم فتن قالدی اوچ گون پیکرین توپراق لار اوسته بی کفن تاپمادی زینب او چولده بیر مسلمان یا حسین اون بیرماه محرم گلدی زینب مقتله گوردی نعشین یئرده دی باشین دوشوب الدن اله آز قالیب دی خرمن صبرین خانیم وئرسین یئله سسلدی جانیم اولا بو جانه قوربان یا حسین جان زینب دین یولوندا تشنه قانه باتمیسان باش و جانیندن گئچیب الحق مرامه چاتمیسان وای منه گونلر قباقینده نه راحت یاتمیسان وار یئری ائتسم اولونجه داد و افغان یا حسین اولموشام #مدهوش شاها عشق پاکیندن مدام فخر قیلام شاهلارا اولسام بو درگهده غلام دوت الیمدن قیل کرم ای پادشاه ذوالکرام سائیله سیزدن اولار لطف فراوان یا حسین ای شفاعت ائیلیین قنداق ایچینده فطرسی قورتاران ظلمات دریادن جناب یونسی بیر اشاره یله قوتار محشر گونی بو بیکسی منده هر آن اولموشام عشقونده نالان یا حسین