اهنگ :اویان ای یار وفا داریم اویان
نوحه حضرت علی اصغر (ع)
✍️ شاعر علیرضا علوی زنجانی ✍️
روز شب ذکریم اولوب ای وای اوغول
چالیرام من سنه هی لای لای اوغول
گجه لر بُوش بشگین ترپدیرم
گوزومون یاشی اولوب قان آی اوغول
ای گل نازیم علی
خیردا سربازیم علی
سن سحر اولدوزو تک باتدین علی
بیله گوزدن آناوی آتدین علی
ظلمیلن قانه بویاندین سن علی
کربلاده منی آغلاتدین علی
ای گل نازیم علی
خیردا سربازیم علی
هارداسان غنچه ی عطشانیم اوغول
منه سس ویر قُوزی قُربانیم اوغول
حرمله بیچدی بوغازین اوخولان
بوغازی یاره لی طرلانیم اوغول
ای گل نازیم علی
خیردا سربازیم علی
اوخ آتان اَلری شَل اولسون علی
گُلشن عُمری اونون سُولسون علی
گورم الله اونی نابود ایلسین
قاتلین ریشه سینی یُولسون علی
ای گل نازیم علی
خیردا سربازیم علی
یارالی گویلره معراج الدین
عرشی سن قیرمیزی منهاج الدین
گویلره سپدی آتان آلقانیوی
یری اوز قانیوه محتاج الدین
ای گل نازیم علی
خیردا سربازیم علی
اوخا باخدین ایلدین خنده علی
آنان اولدی اودی شرمنده علی
آتان آغوشی اولوب قتلگهون
قرانی ایتدی قانون زنده علی
ای گل نازیم علی
خیردا سربازیم علی
یُولادیم سن گیدسن سُو ایچه سن
نه بیلیدیم گیدوسن گلمُویَسَن
قالدی دیرناق یری سینمده نشان
آرزو ؛ ایلردیم ؛ اوغول یُول گیدسن
ای گل نازیم علی
خیردا سربازیم علی
گون کیمی کوکبه برپا الدین
قانلی میداندا تجلّا الدین
اوخا گولدون سن اودم نازلی بالا
اوخ آتان قاتلی رسوا الدین
ای گل نازیم علی
خیردا سربازیم علی
سن سیز اوغلوم اورگیم اودلانیری
تَب مُحرقده بو جسمیم یانیری
هارداسان اصغریم آی سود امنیم
گُل کی سینمه ده سُودوم جُوشلانیری
ای گل نازیم علی
خیردا سربازیم علی
سن سیز آهیله اورک داغلیورام
اوزومه قانلی یاشی باغلیورام
سن سوسوز قانه بویاندین گوزلیم
من یانان خیمه ده قان آغلیورام
ای گل نازیم علی
خیردا سربازیم علی
✍️ شاعر علیرضا علوی زنجانی ✍️
۹۷/۶/۲۰