اسم القصيدة : وداعا ياحبيبي اسم الرادود : #محمد_الجنامي اسم الشاعر :#كرار_حسين_الكربلائي المناسبة : استشهاد النبي محمد صلى الله عليه وآله محرم الحرام 1443 المكان : النجف الأشرف/ هيئة الزهراء للعزاء المركزي 🏴🏴🏴🏴🏴🏴🏴 وداعاّ حبيبي وداعاً يغالي عفتني وخيالك يعيش ابخيالي .................. آنه حيدر يابعد عيني وضواها اجنازتك تتراكض ادموعي وراها ياعضيدي اجروحي بس انت دواها ريت اخذني الموت من گبلك يطاها يعمري ابوداعك الصخر هم بچالي ................ تروح انت وتكبر بروحي المصيبه واعله خدي ادموعي تنزل شيبه شيبه ياحبيبي الراح يتلاگه ابحيبه وآنه اعيش ابدنيا من بعدك غريبه حياتي ابوداعك سواد الليالي .................. ابعيني راح ايصير كل الكون اسود وجمرة افراگك تظل هيهات تبرد انت اول جرح بين اجروحي تنعد وداعة الله ياحبيبي يامحمد عفتني بنحيبي ودمعتي تلالي .................. چنت من اعطش تصير ابعيني غيمه ويابعد بيتي چنت فوگاي خيمه والهضيمه المنها ماتحصل هضيمه يامحمد فاطمه صارت يتيمه الزچيه يتيمه ابحزن ماله تالي ................ فاطمه بعدك يطاهه تبچي وتنوح وعندي دمعتها مثل ماتطلع الروح راح اگضي كل حياتي اجروح بجروح والفگد مثلك يعيش ابعمره مذبوح نحيبي وعزائي ابغيابك حلالي ................ يامحمد سولفتلي هاي الأخبار فاطمه يحترگ چفها ابجمرة النار فاطمه محسنها يهوى ابعتبة الدار وفاطمه ويلي ابصدرها ايفوت بسمار ايتكسر ضلعها وضلعها انحنالي 🏴🏴🏴🏴🏴🏴🏴