اسم القصيدة :جنك طحت ياجبل اسم الشاعر : #وسام_الشويلي اسم الرادود : #محمد_الجنامي المناسبة الليالي الفاطمية 1442 المكان بغداد / مدينة الصدر / هيٸة مدد يامهدي عج 🏴🏴🏴🏴🏴🏴🏴🏴🏴 نسأل علي ها ياعلي وينه ضوی اعيونك ياخاطف اوجوه الزلم ليش انخطف لونك بيك الزمان اشعمل چنك طحت ياجبل _ ياعلي حالتك حيّرت فكرنه انشوفك ونعتقد مشكله ابنظرنه لان انت علي ونعرفها اوصافك طولك مشيتك شمرات اطرافك گبل من تلتفت بسمه علی اشفافك وحمل الدنيا كله تشيله بچتافك هسه اشعجب محني الظهر مشية هضم تمشي وجهك يسولف ياعلي چن ضيعت كلشي ماباقي عندك امل چنك طحت ياجبل _ ياخبر واصلك منبرك تركته واليشوفك صرخ انت ماهو انت تركض وأبدموعك ياعلي تعثر وگوه اتشيل روحك يالشلت خيبر عفت اعمامتك بالگاع ياحيدر تطلع روحك وترجع وتتحسر شنهو اللذي ابيتك حصل يابا الحسن احچي كلما نسألك ع الخبر بچية هضم تبچي من عينك الدم نزل چنك طحت ياجبل ياجبل شو طحت حالتك عجيبه اشصاير ابفاطمه الغاليه الحبيبه ندري ياعلي وأعيونّه اتلمحك بس افراگ فاطم يگدر ايطيحك مادام الشماته اتعاين وتضحك يعني الزهره راحت وانذبح صبحك وكت الظهر بس الحزن ليل وترس عينك معناها شمسك ميته وإتلاشت اسنينك وجه السعاده رحل چنك طحت ياجبل چم گلب ناشدك من سمع عويلك فاطمه الراحله^ لو بده رحيلك عله وجه الزچيه ياأثر شفته گالوا تهل دمعتها وإهي ميته شلون الورد للمغتسل من شلته ذبلان ابكثر ما إيد ساطرته من غسلتها بالدمع ابونة هضم ونّت يمكن ضلعها المنكسر ايدك اله وصلت وإنصيح بالمغتسل چنك طحت ياجبل _ چن شلتلك جبل من شلت نعشها دمعتك جن جمر ياعلي تطشها انت اول بشر بيده دفن عمره جسمك باقي بس روحك اويه الزهره تكتب عالگبر بدموعك الحمره علي مات وبقی عايش عله الذكری هذا انت دافن فاطمه ومادافن اجروحك والمنزلك راجع جسد يمها عفت روحك والفرگه مثل الاجل چنك طحت ياجبل ياعلي ابيا وضع تستمر حياتك فاطمه من مشت اخذت امنياتك راحت عنك الچانت مثل روحك وظلت يمك الشمات واجروحك الهجر مثل السهم وبگلبك ايلوحك وبعد عشرة الزهره عاشرت نوحك اي ياعلي عن فاطمه متعوضك اصحابك بالدنيا يااحباب الك والزهره احبابك هي السند والاهل جنك طحت ياجبل 🏴🏴🏴🏴🏴🏴🏴🏴🏴