عرض ارادت به ساحت مقدس امام حسین ع یا حسین عشق آیه سین عالمده تفسیر ایلدون تپراقا تفسیرینی قانیله تحریر ایلدون ایلدون تاسیس ازل دانشگه حریتی ثبت نام ائتدون سورا بیر عده عالی همتی بی‌درنگ آلدون اله حکمتله کلک حکمتی دفتر هر طالب ایثاری تسطیر ایلدون گوردون ایلور دینی اوز میلیله تبلیغ اهل کین بیر جرائدخانه آچدون تا اولا دینه معین نشر قیلدون اول جرائدخانه ده احکام دین گون به گون تیراژینی دنیاده تکثیر ایلدون گر قیامون سرّینی ایستیر بوله هر کیمسه تام امر بر معروف و نهی از منکره ائتدون قیام بو مرام اوستونده ائتدون جان و دلدن اهتمام خیره امر و شریدن هر خلقی تحذیر ایلدون دولت ظلمین گورنده کینه ی دیرینه سین مجلس شورای حقده مطرح ائتدون کینه سین رأی آلیب منحل قیلدون بیر به بیر کابینه سین دولت حق طرح و تشکیلینده تدبیر ایلدون دشت محنتده سنی محصور ائدنده هر بلا هر بلاده گورسنیبدی جلوه ی قالو بلا تا اولوب منظور قلبین فتح دشت کربلا کربلانی لشکر عشقیله تسخیر ایلدون اگنیوه گیدون بلا وقتینده همت جامه سین طرح قیلدون متصل آزادگی برنامه سین شوقیله آلدون اله لوح و شهادت خامه سین هم یازیب هم اوز مرامین خلقه تقریر ایلدون تا بنای دینه گوردون ضربه وورموش اهل کین آز قالور مخروبه اولسون خانه ی دین مبین قویمادین چاتسون مرامه تیشه ی قوم لعین خشت جانیله بنای دینی تعمیر ایلدون بند بندیدن گورنده دین وجودون منفصل آتش محنتدن اولدی مجمر دل مشتعل قان آخیبدیر پیکروندن حلقه حلقه متصل متصل قانیله ظلمی بند زنجیر ایلدون باغ آیین پیمبر گوردون اولموش بی ثمر سو وئرن یوخ آز قالیر سولسون سارالسون سربه سر باغبان اولدون او باغه ای شه خونین جگر هر گولون هر نخل پاکین قانیله سیر ایلدون جدوین رویاده گوردون غصه لی سیماسینی گوستریب یول بو یولون فاش ائت دئیوب معناسینی کربلایه تا یئتشدون جدوین رویاسینی نکته نکته خاصه کرداریله تعبیر ایلدون ایلدون افکار قوم ظالمی دنیایه فاش ووردی فکرون شیشه ی فکر جفا و جوره داش اقتداریله دایاندون اگمدون ظلامه باش باش اوجالدیب فرقه ی اوباشی تحقیر ایلدون بیر جلالیه سمند عزته اولدون سوار سرعتیله باشلادون یول ایلدون عزم شکار الده پیکان محبت چوخ دولاندون بی قرار تا کی بیر بیر ضیغمان عشقی نخجیر ایلدون مرکز میداندا دوردون لشکر ائتدون نگاه بیر نفر یالقیز یارالی سن ولی سایسیز سپاه تاپمادین بیر یارویاور چکدون آهون اوسته آه آتشین آهیله داغلی قلبی دلگیر ایلدون خیملردن آیریلاندا قلبیوه اوز وئردی غم حنجریندن ئوپدی ناگه زینب زهرا شیم آغلادی یاندی دئدی ای پادشاه محتشم باعث اولدوم عفو قیل یول اوسته تأخیر ایلدون گوردون ایلولر عداوت اشقیا قرآنیله بیر به بیر مأنوس اولوبلار آل بو سفیانیله ایلدون سینه سپر قرآنه بو برهانیله سینوی یکسر نشان نیزه و تیر ایلدون ائتمسن بولدون فدا گر جانیوی جانانیوه دشمن بی دین تعرض ایلیر قرآنیوه البشارت بو مرام اوستونده وئردون جانیوه شوقیله جان طعمه ی پیکان و شمشیر ایلدون قانیله آلدون وضو مقتلده دلده یا ودود باش قویوب محراب عشقه ایلدون حقه سجود تا مصلای جدایه سجده دن ائتدون صعود نی ده تکبیریله روح دینه تأثیر ایلدون چکمه دلپاک ال مرام حقیدن بیر ثانیه تا کی سندن راضی اولسون امّ زینب راضیه بیرده گوردون مصدر اولموش سوزده بعضی قافیه بو سبب اهل ادبدن عذر تقصیر ایلدون