مشکل گشای علی (ع)
فاطمه هردرد اولا درمان ائدر
ایستسه هر مشکلی آسان ائدر
مدعی لال اول خانمین فضه سی
ائتسه نظر تپراقی مرجان ائدر
بلیدی بیر ائوکی اولا وحی ائوی
خادمه سین حافظ قرآن ائدر
فاطمه بیر شخصیدی کی دائما
خدمت اونا بوذرو سلمان ائدر
عصمتینین لوحی اوخونسا اگر
باشرف عورتلری حیران ائدر
گورمسه ده گوزلری نامحرمی
فوری اوزون فاطمه پنهان ائدر
ائتمیوب ائتمز بو ایشی هیچ خانیم
بیر فقط اول مفخر نسوان ائدر
هانسی خانیم فاطمه تک طوی گونی
طوی لباسین سائله احسان ائدر
بو همان ارزنده خانیمدی بونون
مدحتینی خالق منان ائدر
منزلت و مرتبه سین آشکار
کوثریله سوره انسان ائدر
اوز آتاسی ام ابیها دییر
فخر آدینا ختم رسولان ائدر
بیر گجه گر قالسا گرو معجری
قوم یهودینی مسلمان ائدر
آلله اونا مریمی ائتسه کنیز
عیسی و موسانیده دربان ائدر
نوحی ده گر ائتسه خدا نا خدا
فاطمه نی منجی طوفان ائدر
فاطمه نین عشقینه ابراهیمه
آتش نمرودی گلستان ائدر
هرکیم اونی ایستسه آلله اونا
روز جزا لطف فراوان ائدر
فاطمه نون اولماسا امضاسی گر
خاکینی کیم ساکن رضوان ائدر
نغمات خاکی