قسمت دوم: اسوه ایثار حضرت عباس علیه السلام
گلدی تل اوستونه عباس جوشان غیرتیله
باخدی بیر دوشمنه حیدر بیه نن هیبتیله
دئدی کس نحس سسین آغزیوی یوم خفتیله
گله لعنت سنه حقدن بئله بیر دعوتیله
باعث اولدون اولا شرمنده مولا عباس
آغزیوی یوم نه دئیورسن سن ایا دوشمن دین
یئمیشم عومر بویی حضرت زهرا نمکین
قویارام من گوزومون اوسته حسینین قدمین
دالی باخسون اولاجاق دیر جسدین نقش زمین
لبه ی تیغیه اگر ائیله سه نجوا عباس
گئت دایانسان بیلیسن قانیوه غلطان ائه دره م
سنی بو گلماقا اذن اولسا پشیمان ائدره م
من حسین نوکری ام عالمی حیران ائدره م
اولا مین جانیم اگرشاهیمه قوربان ائده رم
ائیلییوب باشینی بو عشقیله سودا عباس
اگه اول راه سعادت دی تولا قاپوسی
منه جنت دی شرافت دی بو زهرا قاپوسی
تا وارام باغلیدی ارذل لره مولا قاپوسی
گئت آچیقدیر سنه ده جیفه دنیا قاپوسی
قلعه عشقه محافظ دی چو عنقا عباس
احسن عباسه که اوز وارلیقین ایثار ائیلدی
دوشمن فاطمه نی همتیله خوار ائیلدی
دل وئریب دلبرینه دوشمنی انکار ائیلدی
چکدی عشقین محکه عالمه معیار ایله دی
شاه دین نوکریدی عالمه اقا عباس
عشق عباسه عجب وقتده امداد ائیلدی
اهلبیت حرمی غصه دن آزاد ائیلدی
دوشمنی خوار ائلییب قلبلری شاد ائیلدی
دوشمنین باشدا افکارینی برباد ائیلدی
گورمیوب گورمیاجاق بیرده بو دنیا عباس
کربلا دشتینه باخ هیبتینی آل نظره
گوز تیکیب هر ایکی لشگرده او صاحب هنره
قدرتی وار سالا هر صاحب نامی خطره
صبحه جک وئردی کشیک عترت خیرالبشره
دیللره نور سالیب ماه دلارا عباس
گلدی سعد اوغلی سپاهین بوله آواره قالیب
واریدی قورخوسی لشکر نقدر کی چوخالیب
بیر نفر دوردی ایاقه دانیشا فرصت الیب
دئدی یئتمیش نفر آیا جانیوا قورخی سالیب؟
دئدی یوخ قورخی سالیب جانیمه تنها عباس
وار مقابلده اگر هر نفره نئچّه نفر
تا ابوالفضل سلامت دی بیزه یوخدی ظفر
یوخ دی میداندا حریفی گله دعوایه اگر
بیله سردار نه دنیایه گلیب دی نه گلر
مام دنیا دوغا بیر دفعه ده حاشا عباس
آه او دمدن که اولوب کر ب و بلا، کرب بلا
دوره سین آلدی حسین خیمه سینین قوم دغا
دوشدی بو فکره قشون غائله نی تئز قوتارا
سو یولون باغلادیلار تشنه قالیب آل عبا
یاندی شرم آتشینه ساقی و سقا عباس
یوم عاشور گلیب تنگه او سردار حرم
شاهیدن اذن آلیب رزمگهه قویدی قدم
دایانیب عرصه ده چوخ هیبتیله الده علم
تا حریف ایسته دی قورخوشدوی هامی اهل ظلم
ائتدی آزاده لیقی دشمنه معنا عباس
به به عباسه گوزل عشقینی اعلان ایله دی
ییخدی ماردلری میدانیده طوفان ایله دی
سو ال تاپدی ولی نفسینه حرمان ایله دی
قارداشا شوقیله اوز جانینی قربان ایله دی
مشکی دولدوردی سودان ایچمدی اما عباس
ائتدی عباس او گون عزت نفسیله قیام
عشق فتواسینه نهرین سویینی ائتدی حرام
باش وئریب اگمدی اغیاره باشین وئردی پیام
دفتر وشعر و قلم اولدولا مدهوش تمام
یازیلیب قلبینه عاشقلرینین یا عباس
@hushmand