بورا کوی وفادی وادی عشق و صفا زینب
همان جدیم دیین یئردی دیار کربلا زینب
بو یئر قارداشیوه مقصود و منظوره چاتان یئردی
حقیقت اوسته ایثار ائیلییب قانه باتان یئردی
بو توپراقین صفاسی چوخدی قارداشین یاتان یئردی
منه مدفن دی بو یئر رتبه ده عرش خدا زینب
بو یئرده گلمیشم اوز عشقیمی حقه ائده م اثبات
مباد سولدورا دین خدانین گلشنین آفات
باش اگسین اهل ظلمه من کیمی آزاده لر هیهات
اولا حتی بدن دن باشی ظلمیله جدا زینب
بو یئر آزاده لر باشیله جانیندن گئچن یئردور
منای عشقیده لب تشته لر قانین ایچن یئردور
آنالار اوز الیله اوغولونا خلعت بیچن یئردور
بورا جای عملدور نه حدیث و ادعا زینب
بو چولده قارداشین ایستیر بیوک بیر امتحان وئرسین
رضای حقه خاطیر قانلی گودال ایچره جان وئرسین
گرک عاشیق اولان معشوقینه عشقین نشان وئرسین
مقام وصل یاره چاتماقا اولسون فنا زینب
بو چول معبودیمله بزم وصل وعده گاهیمدور
عروج عشقیمه سرمنزلیمدور شاهراهیمدور
سپاهیم اولماسا یوخ غم علی اصغر سپاهیمدور
بو نهضتده منیله همقسمدور بو بالا زینب
بو یئر اهل جفا انصاف سر حدین ییخان یئردیر
سو تک دینین یولوندا قرمزی قانلار آخان یئردیر
بابا وای قارداشیم وای ناله سی عرشه چیخان یئردیر
یاخین دیر خیمه لر ظلمیله یانسین برملا زینب
یزید فاسقه باشیم ده گئتسه ائتمرم بیعت
شهادت اهلیینه هر بیر زماندا ننگ دیر ذلت
خوشام اولسا مرام اوسته منه جام بلا قسمت
رضای حقه خاطر ائیلرم سعی وصفا زینب
منیله بو مکاندا باش و جان قیدین آتان قالسین
کرگ عشق اهلینه بو نقطه دن عالی نشان قالسین
حسینین باشی ده گئتسه گرک دین جاودان قالسین
گرک روشن اولا بو یولدا وار هر ماجرا زینب
منه جدیم خبر وئرمیش بو دشتین ماجراسیندن
بو کوفه اهلنین رسم و رسومندن وفاسیندن
یوخوم قورخی بو سایسیز لشگرین ظلم و جفاسیندن
هدف آیدین دی، یول معلوم، مقصد آشنا زینب
اسیر اوز نفسینه اولماز اولان معبودینه بنده
بو چولده قانیمیله ساخلارام قرآنی پاینده
داریخما ائت توکل اللها آماده اول سنده
منه لازمیدی سن تک بیر شریک با وفا زینب
اوزون آماده ائت درد وبلا و محنته زینب
دوشرسن سنده بو نهضتده چوخلی زحمته زینب
ایکی عالم چاتارسان لیک عالی عزته زینب
چتین تکلیف دور صبر ائله تا آسان اولا زینب
بو یئر خاک شفادور گلسه هر کیم اخذ ائدرتوشه
اولار اهل وفانین کعبه سی بیر قبر ششگوشه
اگر قسمت اولا کرب بلا بیر یولدا
#مدهوشه
توکور باران کیمین اشکین یوزه ائیلر نوا زینب
#مدهوش
@hushmand