قان اولان سو
عالم امکانه وئرمیش رونق و سامانی سو
دونده رر باغ و گلستانه قوری صحرانی سو
هر نیین اولسا حیاتی حق سودان احسان ائدیب
زندگی ممکن دگیل گر اولماسا بیر آنی سو
سو وئرر رونق گلستانه اگر گلسه خزان
ائیلییر سرزنده هر بیر تشنه لب انسانی سو
جنگیده گر ایچمسه سو پهلوان دیلدن دوشر
کربلاده سالدی دیلدن تشنه لب سقانی سو
مشکی سالدی چیگننه آلدی اله شمشیرینی
گوردی تا سالدی ایاقدان عترت طاهانی سو
گلدی میدانه مخاطب ائتدی قوم کافری
بیلمیسز حق ائلییب مهریه زهرانی سو؟
مرد اولان دعوا ائدر کسمز اوشاق لاردان سویی
اولسا انصاف ائیله مز هر مطلبه میزانی سو
من علمدار حسینم گلمیشم سو آلماقا
تا اولا دونیا بویی سقالیقین عنوانی سو
من حسینسیز نیلیریم بو دار دنیا لذتین
ایچمرم بیرقطره سین دوتسا اگر دونیانی سو
عترت زهرا یانیر گول تک سولوب اهل حرم
وار نه خیری ائیلسه سیراب اگر صحرانی سو
سالدی پیچ و تابه عطشانلیق علی اصغری
نیلسین آیا اناسی اولماسا احسانی سو
رحم و انصاف ائیلیین هر سمت دن اوخ آتمیون
اولسا گر بیر مشک اولار بو دردیمن درمانی سو
هر طرف دن اوخ گلیب سعی ائتدی مشکی ساخلاسین
قالدی بو مهر و وفانین واله و حیرانی سو
آخ او دم دن مشک اوزی آغلاردی سقا حالینه
اوخ دلیب سو آخدی سیراب ائلیییب هریانی سو
اولدی سو اوسته قلم بیر جوت اوزون قول سیندی باش
آغلادار تا روز محشر حضرت زهرانی سو
سسله دی گل داده قارداش اوخ توخاندی مشکیمه
هارداسان گل قتلیمه ووردی منیم امضانی سو
اولمادی قسمت اولا تکمیل مامورییتم
گور نئجه سالدی گوزومدن عالم امکانی سو
گل ولی اما دئنن زینب ربابه سویلسین
ائیله دی شرمنده اصغردن سوسوز سقانی سو
دوازدهم محرم1400
#محمد_هوشمند
#مدهوش
@hushmand