قسمتی از منظومه مامئیلی تقدیم به شما گرامیان💐
مامئیلی! ائل، سون باهاری، گلنده
بولوت گوءیدان،یاغیش یئره جالانده
گون قیسیلیب، گئجه لر، اوجالانده
تویلارونو قورغون، اله آلدولان
آشیقلارو ساز،کوءکلیوب،چالدولان
🌲
یای فصلی تئز،گئتماقا،بئل باغلادو
میزان آیی، بولوت گلوب، آغلادو
قوس ایچیندا،دیخانلار،بندباغلادو
سویوخ گلدی،ئیلان تکین،چاخماقا
ادون چله ی قورولدو، اود یاخماقا
🌲
سون بهارداگون چیخمیوب باتاردو
چوپان چولیق، یاتاقلاردا، یاتاردو
چیلله گئجه، ییغیشمایا چاتاردو
ئوبیر ئیله، یابیرفلک! کیم اولسون
کیم اولماسون،کیم ئولماسون کیم ئولسون
🌲
یاتاقچی لار، یاتاقلاردان گله ردو
نوبر اوچون، دله مه، گتیره ردو
چیلله پایو، قونشولارا، وئره ردو
قیش باشیندا،داواردوغما،دئولیدور
مهر و محببته گوءرا، یولیدور
🌲
او زاماندا، نه رسملر، واریدور؟
دَبدان چیخان،هرکیمسیه عاریدور
اللر آچیق، دونیا اگر، داریدور
خانم گلین،آخشام کی گون باتاردو
بایراملیقا، شالونو، ساللاتاردو
🌲
غیناتالار، حالینی سوراغلاردو
غینانه لر،کوءمیش سیککه باغلاردو
هرایککیسی، ارمان چکیب، آغلاردو
گلین قیزلار غیناتادان، قاچاردو
نئچه پولا، یاشماقونو آچاردو
🌲
چیلله گئجه، قاششوقلاری چالماغا
قاپو وروب، چیلله پایی آلماغا
گزه ردولان، قاپولاردا، یوز چاغا
محببتلر چوخ، اللری بوشیدور
بیر قیسیم کیشمیشا، اوءره گ خوشیدور
🌲
چیلله گئچه سویوخ اولدو،کندیمیز
لاله تکین، آچیلدو، لبخندیمیز
اوره گ لرده، سویا دوءندو،قندیمیز
آتالارین چوخ شوکتلی، سئوینا
اوشاقلارو، ییغیشدولان ائوینا
🌲
قاری ننه، اینکدن سوت، ساغاردو
بوینونده لئتتار، الیندا تاغاردو
ئینی باشیندان، محببت، یاغاردو
آرتیق ئتسون، آلله اونون، شانونو
یامان بلادان، ساخلاسون، جانونو
🌲
چیلله گیجه، قورقا تالخان، یارماقا
ال دئییرمان آلاردولان، بارماقا
توت شیره سی، پرخودا آختارماقا
گلین باجی چیراغ، اله آلاردو
قاری ننه، دببه نی، آختاراردو
🌲
کاتا بابا ئو دوءروندا، چوءنوبدور
ناخوش اولوب دونیاسیندان دوءنو بدور
دئدی کی،قارپوزسامانا،گوءموبدور
ایندی اوغلان!گتیرقارپوزپوزولسون
اوشاغلارا چیلله پایو، دوزولسون
🌲
بو گئجه ده، بئله ایشلار، اولار دو
مممد عمی، ساز الینه، آلار دو
عمه خانیم، بشقابینی، چالاردو
خان قاقامیز، اصلی کرم، اوخوردو
گلین باجی،ایپک دسمال، توخوردو
🌲
گلین قیزلار، سوفره لری، سرماقا
چیلله پایی، اوستلاریندا، در ماقا
بوساغادا، تنققول آختارماقا
کاتا ننه، صاندوقونو، آچاردو
چاقالار، قورقا یئماقا، قاچاردو
🌲
اوشاغلار اویناب، هریانا چاپاردو
ایگیت لر،تاپماجیق دئیوب، تاپاردو
هرکیم بیر تاپ، اتیشه یه، یاپاردو
باجیناقلار سیندیروردو، جاناقو
خوشحاللیقین،هئچ اولمازدوساناقو
🌲
ارمان!ارمان! اوئیللردن یاداولسون
چیلله گئجه،اورگلریز،شاد اولسون
دیللریزده"سئودادان"بیرآداولسون
دونیا بیزدن، عومرآلوب، گئچه دی
بیرکیمسیه، دئمز حالین، نئجه دی
علی کوهستانی اسیق سو(سئودا)🌹
موزه مجازی حمام قلعه
۱۴۰۲/۹/۳۰
https://t.me/hammamghaleh
https://eitaa.com/moozehmajazi