اخیامیدن آیریلدی، زهرانون او دلبندی
/بیر خیرداجا قیز قاشدی دالدان بابا سسلندی
/ای قلبیمون آرامی، گور دیده ترم بابا
/بیکس بالووام گوزدن قان یاش الرم بابا
/گئتمه سو آدین واللاه، بیرده دیمرم بابا
/هی سسلدی جان بابا، قوللارین آچیب قاشدی
/گلدی او کفن گئیمیش سلطانه یاخونلاشدی
/راکیب بویانوب قانه، مرکبده آچوب شهپر
/سرعتله گیدور باشدا، وار شوق علی اکبر
/بیر سس ایشیدوب سالدی، کشتی خدا لنگر
/دوندی دالا بیر باخدی، یاشیله دولوب گوزلر
/گل آغلاما جان بالا، مندن سورا آغلارسان
/باشسیز بدنیم گورسون میداندا قوجاقلارسان
/گلدون نیه بس گلدون اولما بالا عطشانسان
/سو یوخ بابا دردیم وار، چیخمیش عطشیم یاددان
/آیا ندی؟ بس دردون ده باغریمی ائتدون قان
/عرض ایلمرم بابا تا دوشمهمییسن آتدان
/شاهین اتگین دوتدی عرض ائتدی یانایانه/
گوز یاشلی قویوب گئتمه، رحم ائت من نالانه/
دوشدی آلوب آغوشه اوپدی قوری لبلردن
/بو اوپدی او القانی، پاک ایلدی پیکردن
/بیر سوز دئدی یاش توکدی کیپریک سانی گوزلردن/
یاندیم باباجان یاندیم، ای وای بو بلالردن/
گئتسون منی دوشمنلر یالقوز گورجئک بابا
/وای قمچی‌لر آلتیندا شمر اولدورجک بابا
/دردین دیوب آغلاردی اول قانلی کفن پوشه
/شاهون غمی دریا تک موج ائتدی گلوب جوشه
/توپراق ایده اگلشدی محکم باسوب آغوشه
/ناگه یومولوب گوزلر، دینجلدی گیدوب هوشه
/بیردن دوروب عرض ائتدی، دردون آلارام بابا
/مانع دگولم واللاه، گئت آغلامارام بابا
/الدن منی قویموردون ای دردی اولان دریا
/ایندی دیوسن دور گئت نه اولدی سبب بابا
/عرض ایلدی اینجیتدیم عفو ایله منی بابا
/الان یوخودا گوردوم گلمیشدی آنام زهرا
/امر ایلدی اینجیتمه مهمانیمی قوی گلسون
/آغلاتما یول اوستونده جانانیمی قوی گلسون
✍مرحوم استاد منعم اردبیلی
#وداع_حضرت_سیدالشهدا
#حضرت_رقیه_سلام_الله_علیها