امّ‌المصائب حضرت زینب (س) زینبم من ئولمه‌میش دنیاده محشر گورموشم گوز آچاندان قلبیمی هر گون مکدّر گورموشم دورد یاشیمدا آتش ظلمه یانوب درگاهیمیز پشتِ در ده ناله ی جانسوز مادر گورموشم یرمی‌بش ایل غصّه‌دن دلخون اولوب مظلوم آتام عاقبت رُخسارینی قانیله احمر گورموشم اوندا که زهر جفائیله حسن مسموم اولوب لخته‌ لخته طشتده خونِ برادر گورموشم کربلا ده اولدی بیر طوفان که قان دریاسنه کشتی آل محمّد سالدی لنگر گورموشم آلتی قارداش قاره‌سین بیرگونده سالدیم باشیمه ئولمدیم قالدیم خدایا گور نه گونلر گورموشم شیر خواره اصغرین قانه‌ باتان قنداقنی قطعه ‌قطعه پیکر شبه پیمبر گورموشم من هیچ اوز اوغلانلاریمدان ایتمورم صحبت ولی قاسمون گول پیکرین یئر اوسته پرپر گورموشم گیردی دریایه ابوالفضلیم ولی سو ایچمدی سو کنارینده دوشن قولسوز دلاور گورموشم اللرینده بوش سو جامی دیللرینده العطش دختران حضرت ساقیّ کوثر گورموشم چون حسینی اهل‌ کین یخدی یارالی توپراقا سینه اوسته قاتلین من الده خنجر گورموشم اود دوتاندا خیمه‌لر قوپدی قیامت باشیمه آتش نمرود ده بیمار مضطر گورموشم غارته ال آچدی دشمن نازدانه قیزلاری وا علیّا وا حسینا دیلده از بر گورموشم قتلگاهه بیرده گلدیم دیده ی خونباریله دوره‌می دوتموشدی دشمنلر سراسر گورموشم اوندا که چکدیم کناره نعشی اوستن داشلاری سجده حالنده دوشن بیر جسم بی سر گورموشم ایستدیم بو سینمه بیرده قویام قارداش الین ظلمله اولموش جدا پیکردن اللر گورموشم کربلا دن آیریلاندا اود دوتوب اودلا نمشامم گون قباقنده قالان عریان بدنلر گورموشم قول بویون اولدی آتاسیله سکینه دورمادی تازیانیله آیردی قوم کافر گورموشم کوفه‌ده بش ایل خانملیقدان صورا یاللعجب قوللاریم باغلی باشیمدا کهنه معجر گورموشم شامده وا محنتا دروازه ساعاتده آشکارا انتقام بدر و خیبر گورموشم بوینوموزدا ریسمان بزم شرابه چکدیلر نانجیب اشخاصدن طعن مکرّر گورموشم حضرت سجادی قول باغلی غُل و زنجیریله حاکم جباریله دورموش برابر گورموشم بیر خرابه اولدی منزل عترت پیغمبره خشتی بالش ایتدیلر توپراقی بستر گورموشم جان ویروب اوردا رقیّه یاندیروب یاخدی منی یَثرِبه حسرت قالوب اول ماه منظر گورموشم بو بلالر حق یولوندا چوخ گوارا دور منه انهدام باطلی سنگر به سنگر گورموشم چون بیزه نوحه یازوب (( مشتاق )) سوز و آهله منده جنّتده اونا بیر قصر اخضر گورموشم 🌿🌿🌿🌿🌿🌿🌿 #محرم_۱۴۰۳ #حضرت_زینب_سلام_الله_علیها