آرزوی زیارت در اربعین اثر :مدحی ‍ یاحسین درگهونده گدایم دردمندم اوزوم بی دوایم من نه بیگانه ام آشنایم عاشقم عاشق کربلایم یا حسین یا حسین یاحسین جان سالموشام باشیمی من بلایه بیرنظرقیل من بینوایه ایسته شاها گلاق کربلایه دردهجرانه من مبتلایم یاحسین یاحسین یاحسین جان قبرپاکونداوارچوخ شرافت انبیالرایده لّرزیارت قویمادللرده قالسون بوحسرت رحمقیل سن منه بینوایم یاحسین یاحسین یاحسین جان نی کیمی گَلّم ایله فغانه قویموسان بیزلری یانه یانه آخدی بوگوز یاشیم دوندی قانه شهریاراقاپونداگدایم یاحسین یاحسین یاحسین جان قبرپاکون سنون باصفادی خیمه گاهون ولی غم فزادی وردذکریم منیم کربلادی هرنه گلسه بویولدارضایم یاحسین یاحسین یاحسین جان سن حبیب حق لم یزل سن شأنیده رتبه ده بی بدل سن هرگوزلدن حسین سن گوزل سن اصغره اکبره من فدایم یاحسین یاحسین یاحسین جان اولموسان دینه قربان یارالی تشنه لب ویرموسن جان یارالی یاتموسان اوچ گون عریان یارالی سویلدون دینمه من فدایم یاحسین یاحسین یاحسین جان باشلادون سن اوگون کشف رازه شکرقیلدون حق بی نیازه وردون عزّت اوگونده نمازه سویلدون عهدیمه باوفایم یاحسین یاحسین یاحسین جان کونی حیران ایدوب عشق صافون صاقدی حسرت اَلیله مطافون کیم بهشته دَیر بیر طوافون یول اوزاقدی اوزوم لنگ پایم یاحسین یاحسین یاحسین جان "مدحیم"نوکرم شاه دینه بیرنظرقیلسابودل غمینه دعوت ایلرمنی اربعینه اوندامهمان شاه وگدایم یاحسین یاحسین یاحسین جان #اربعین_

اربعین محیر اردبیلی .. .. .. .. .. ای تربیتینون عطری سمایه اوجالان یر وی نازیله قارداشیمی آغوشه آلان یر .. .. آرامیمی ای مرقد ششگوشه آلوبسان خوش ساخلا منیم روحیمی آغوشه آلوبسان .. .. .. .. .. الماس بلا شیشۀ صبریمی کسردی یاپراق کیمی هجرونده منیم قلبیم اسردی مدّتدی سنی گورمه گه زینب تله سردی ای جان جهان جسم سیه پوشیوه قربان جان اوسته سنون زینت آغوشیوه قربان .. .. .. .. .. سینونده یاتوب نازیله بیر فدیۀ اعظم زهرا دلینون بندی جگر گوشۀ خاتم واردور نه غمون شأنوه حسرت چکر عالم (زوّاریلره کعبۀ آمال سن اى قبر) اقبالیوه قربان نه خوش اقبال سن ای قبر .. .. .. .. .. لوحونده حقیقت یازیلوب حق سوزی واردی سینونده سنون مظهر حقّون اوزی واردی اجلالیوه باخ سنده بهشتون گوزی واردی ممزوجیدی چون خون خداوندیله خاکون هر درده دوا اولدی سنون تربت پاکون .. .. .. .. .. یردن اوجادور قدّون ایا قبر مطهّر شکلون گورورم کی یخلان خیمه یه بنذر أوز شأنیوه لایق سنی تعمیر ایدن ایستر شاهلار هامی صحنونده گرک اگلشه بسته درگاهوه ساری سورونه صحنی یوز اوسته .. .. .. .. .. جدیم بویوروب معجزه آثار سوزینده ظلمون اثرى قالمیاجاقدور یر اوزینده گور مثلی اولار تربتون آفاق گوزینده تپراقون ایدر جمله گوزللر گوزه سرمه سوقات آپارالّار عوض اطلس و ترمه .. .. .. .. .. هر وقت حسین کوچه و بازاری کیچنده یر فخر ایلیردی اونا نعلینی دگنده باخ کرب و بلا سنده کی اقبال بُلنده سالدی ایکی اوغلیلان اوزی سینه وه ریشه پاتخت ایله دی تپراقوون اوستین همیشه .. .. .. .. .. زهرا قیزینون قلبیده آرتدی هیجانی گوزده ایله دی منظره گلزار وفانی بو دللریله سسله دی شاه شهدانی ای شمس هدا برج محبّتده باتوبسان خوش حالیوه جدّیم بویوران یرده یاتوبسان .. .. .. .. .. ای سدّ ایلین صبری جفا سیلینی قارداش ذکریله صباح ایلین هر لیلینی قارداش دور گتدوم اؤزوملن حرمون لیلینی قارداش هجرونده توکر اشکینی ای شاه خجسته سرمیش آغاران زفلرینی قبریون اوسته .. .. .. .. .. ای محیى الأنفاس بو بی روحه نفس ویر دلدن دوشن اطفالیوه بیر ذوق و هوس ویر قویما اولا افسرده باجون زینبه سس ویر گلدی حرمون دیدیوه دینجلدون حسینیم دور ایله باجون زینبه خوشگلدون حسینیم .. .. .. .. .. آگه سن اؤزون زینبوون هر هدفیندن شرمنده دی بیر خوردا ییز اسکیکدی صفیندن باشون صاق اولا نازلو رقیّه طرفندن چون ایتدی سنون حقّیوی پاینده حسینیم قویدوم قیزوی شامه نماینده حسینیم .. .. .. .. .. شکر ایلیورم اولدی نصیبیم گینه دیدار نور آلدی وصالوندن حسین دیدۀ خونبار بو محنتیوه آغلارام عمریم نقدر وار تأثیر ایلیندور غمون هر شخص بصیره هانسی ئوله نون نعشینی بوکمیشله حصیره .. .. .. .. .. یارون چوخیدی ای شه محشر سینون اوسته آیا گینه وار زخم مکرّر سینون اوسته نازیله یاتوبدور على اصغر سینون اوسته هجرینده ربایین گونوزین قاره ایدوبسن اوخ یاره سی اوستین اونا گهواره ایدوبسن .. .. .. .. .. مظلومیتون دردیمه عنواندور الیمده تشریح مصیباتیمه برهاندور الیمده بو قانه باتان کوینگون اعلاندور الیمده کافرده همان کوینکه باخسا سنه آغلار هر کیم سنه آغلار ایله بُلَّم منه آغلار .. #اربعین_

زبانحال حضرت زینب (س)بعد شهادت حضرت رقیه گریز به کوچ از خرابه دیلدن دوشدون ای خسته بلبلوم ظلمیله آخر سارالدون گولوم یات بالا آسوده مقصدیوه چاتدون قانلی باشی گوردون عمّه وی سن آتدون قالدی یوزونده بعضی علامت یوخدی دوگن یات قبریده راحت لایلای بالام (۲) لایلای عزیزیم یات .لایلای عزیزیم یات دائم بولود تک رقیه دولدون یاشاماقدان جهاندا یورولدون زجر ایلیوب سندن زینبی شرمنده چولده قالان گوندن دوشدی دیلون بَنده فاطمه تک بالا چوخ دوگولوبسن قمچی لر آلتیندا سن ئولوبسن لایلای بالام(۲) لایلای عزیزیم یات..لایلای عزیزیم یات آتمادون اکبر فکرین باشوندان دامنون ایسلاندی گوز یاشوندان عمّه وی بو نسگیل ایلیوب آواره گیتدی قولاقوندان غارته گوشواره هی دیدون اکبر هاردا قالوبدی تُحفه سینی غارتگر آلوبدی لایلای بالام(۲) لایلای عزیزیم یات...لایلای عزیزیم یات یاندوردون،اوت ووردون سن دیل لره هر زمان ، لایلای چالدون اصغره حرمله ظلموندن قلبون اولوب شأن شان سن تک عزاداره خسته بی بون قربان هیچ دیمورم باخ ،آل ترابه دور بالا سس ویر غملی ربابه لایلای بالام(۲) لایلای عزیزیم یات..لایلای عزیزیم یات ای اولان پرستوی مدینه رقیه عازموخ اربعینه قسمت اولوب گویا محضر ثارا... گویلون اگر اولسا دور بالا بسم ا.... لنگه وروبسان غملی قطاری سال یولا باری زینب زاری لایلای بالام(۲) لایلای عزیزیم یات...لایلای عزیزیم یات #اربعین_

زبانحال حضرت زینب (س) در کوچ از شام مرتضی اسکندری (ساعد زنجانی) دور ای سه ساله قهرمان رقیه جان رقیه جان گیدور بو غملی کاروان رقیه جان رقیه جان بیبون ئولسون ائللروندن اولدون آرالی مزاره گیتدون ایاق یاره قول یارالی یوزوندن سیلی ووران اللر شل اولیدی آنام زهرا تک اولوبسان باشی بلالی قلبیمون قراری گیدور غم قطاری خدا بیلور که غم منیم قراریمی آلوب نجه دوشوبدی یادیمه منیم آنام شهید اولان گیجه آنامین که سینه سین مسمار ایتدی یاره یاراسین من باغلادیم گلدیم آه و زاره او گوندن بو قاره مندن آیریلمیوبدی فلک سالدی بش یاشیمدان باشیمه قاره قلبیمون قراری گیدور غم قطاری سنی گورنده آی بالا ننم دوشردی یادیمه یوخومدی ایندی بیر نفر چاتا بو غمده دادیمه نه واردور اکبر نه عباس سرو قامت ربابه ویرسونله بو غمده سر سلامت چتیندور بی کس ربابون چیخسون یادوندان فراقون سالدی ئورکلرده نه قیامت قلبیمون قراری گیدور غم قطاری یاخوندی اربعین قیزیم قوشول بو غم قطارینه گیدور بو غملی کاروان حسینیمون مزارینه سراغون دوتسا اگر مندن شاه خوبان خجالتدن گوزلریمدن جاری اولار قان سنی تاپشوردی منه میدانه گیدنده فراقوندن گور نجه قدیم اولدی چوگان قلبیمون قراری گیدور غم قطاری #اربعین_

‍ سینه زنی اربعین (سبک : برکشتگان کربلا اربعین آمد) عالم اولوب غرق عزا اربعین گلدی اربعین گلدی کرب و بلایه زینب دلغمین گلدی دلغمین گلدی آزاد اولوب شاماتیدن عترت طاها قورتاردی جور و ظلمیدن زینب کبری قید اسارتدن چیخوب دختر زهرا دشت بلایه الغرض چوخ حزین گلدی قرخ گوندی انصار خدا قانه غلطاندی شاه شهید کربلا قانه غلطاندی عباس دریای وفا قانه غلطاندی نعشی عباده خیمیه اکبرین گلدی قرخ گوندی تیر غم هامی دیللره دگدی داغ مصیبت مهجه حیدره دگدی تیر سه شعبه حنجر اصغره دگدی اخیامه اول دلداده آخرین گلدی قرخ گوندی قاسم طوی دوتوب قان حناسیندن هم نوعروسیندن گچوب هم آناسیندن تاب و توان آلدی بو غم آل یاسیندن گویدن بو ایثاره اوگون آفرین گلدی قرخ گوندی گلزار علی ظلمیلن صولدی باغ و چمن بو ماتمه چون خزان اولدی قلب محبان بو غمه قانیلن دولدی دنیایه داغ محنت بی قرین گلدی زینب اوزین قارداشینون قبرینه سالدی سسلندی گور قارداش باجون نه حالا قالدی الدن حسین آرامیمی فرقتون آلدی آچ گوزلرین گور باجوی بی معین گلدی اهل عیالون شکر اولا سر سلامتدی قارداش منی پیر ایلین آیری محنتدی نازلی رقیوندن باجون چون خجالتدی دفن ایتدی زینب شامیده اخترین گلدی یوخدور سالام قبر اوستونه ترمه و شالیم گیتدی اساسیم غارته دوندی احوالیم قوی قانلی کهنه کوینگی قبرووه سالیم باجون ئورکده محنت آتشین گلدی زائر اولار جمله سنه پیر و جوانلار قبرون اوپر کامه چاتار آزاد انسانلار درد اهلی دردینه آلار عمده درمانلار ششگوشه قبره شکرایدور (( آذرین)) گلدی ** کربلایی ودود آذرین خلخال ✨ اَللّهُمَّ عَجِّل لِوَلیِّکَ الفَرَج✨💫 #اربعین_

✅روضه رحلت رسول اکرم(ص) ✅گریز به قتلگاه (پیغمبرین قاپسی دویولدی خانم زهرا گلدی قاپی دالینا کیمسن؟ بیر عربم اوزاخ یولدان گلمیشم پیغمبرین زیارتینه خانم بیوردی گیت صورا گلرسن بابام دانشمیر دا منیده دانشدیرمیر بیر آز زمان صورا قاپی دویولدی من فی الباب همان عربم گلمیشم پیغمبرین زیارتینه خانم آغلادی بیوردی مگر دیمدیم بابام دانشمیر گیت صورا گلرسن بار سوم قاپنی دوینده پیغمبر گوزلرین آچدی قیزیم قوی گلسین ایوه بالا. بابا جان مگر کیمدی؟ آقا بیوردی هر قاپنی دویمز هر قاپیدان اجازه آلماز بو سنین قاپوین حرمتیدی. باباجان کیمدی؟ اورگیم اسدی نه غملی صداسی وار پیغمبر آغلادی دیدی قیزیم دده نی بالادان آیراندی بو قابض الارواحیدی . وارد بیت رسول الله اولدی الی اورک باشندا پیغمبره سلام عرض اله دی امام زمان آقا پیغمبر گوزلرین آچدی بیوردی قیزیم چاغور بالالاریم گلسین ) حسن صاقندا حسین صولدا باشی اوسته علی ایاق طرفده بتولین اوجالدی افغانی حسین اَلین گَتیروب قویدی سینه سی اوست ه گَتوردی درده همان حال شاه مردانی دیدی گوتور الیوی سینه سین آغیرلاتما اوغول حسین گوروسن جدّیوین چخور جانی ویرنده جان بو حسین یاعلی اولیدون کاش گورِیدون اورداکی اوضاعی قانلی میدانی آغوردی شمرون ایاقی و یا حسینون اَلی نه نوع شرح ایلیوم بو ملال عظمانی عزیز فاطمه نون شمر چخدی سینه سینه یارالی سینه سینون باخمادی آخار قانی امام گوزلرین آچدی بویوردی ای ظالم چخوب بو سینیه تیترَتمه عرش رحمانی یارالیم اُلورم بی مروّت اینجیتمه سوسوز بو چولده گَل اُلدورمه بو لب عطشانی شمر ظالم الکی خنجرین آلدی الینه حوریلر جنت آرا زفلرین آلدی الینه فاطمه یومدی گوزون معجرین آلدی الینه (قبل از آنیکه او ظالم یارالی باشین بدنینن آیرا زینبین الین کسدی) آفرین سسلدی ابلیس او دنی کینه سینه عشقیده ویردی بها عاشق دیرینه سینه باجینون قانی آخور قارداشینون سینه سینه قان دیور بو توکولور کرببلانین یرینه فاطمه ویردیگی صودی قاریشیر بیر بیرینه #اربعین_

کوچ از خرابه ی شام (کربلا ای کوی جانان) ای آنام زهرا نشانی عمّه وین یوخدور توانی سندن اوتری باجیلارون لنگه وردی کاروانی طاقت بولوسن منده قزیم یوخدی فراقه ای زینبین آرام دیلی دور بیر ایاقه قیزیم ----- عمّن ئولیدی گوزلریم ایسلاندی یاتما دور باجون گریاندی یاتما عازموخ دشت بلایه کاروان یولاندی یاتما بو شام خرابی بالا ترک ایلییروخ بیز دور سنده گداخ کرب و بلایه گدروخ بیز ای پرستوی مدینه رحم ایله بو دل غمینه آز قالور ای روح زینب اربعین شاه دینه مندن بالا کوسمه بولوسن گیتمه لیم من بو غربت ایچینده سنی ترک ایتمه لیم من توپراق آتدا یاتموسان سن اَشکی قانه قاتموسان سن بو یول اوستونده رقیّه عمّه وی آغلاتموسان سن ویرانه نی عمّن بولوسن ترک ایده بولمور مشگلدی بو هجران بالا سن سیز گیده بولمور قلبیمی یاندیردی دشمن غصه دن دینجلمه دیم من غارت اموالین بولَنده قالدی یرده گوشواره ن قلبیم آلیشوب سسلدیم ای وای بالام ایوای زهرا یادما دوشدی ددیم‌ وای آنام ای وای گلشن عمرون سولاندا گوزلر اشکیله دولاندا زینبی درده سالوبسان اصغره مهمان اولاندا ای اصغره لای لای چالانیم دور بیر ایاقه آغوشیمه گل قافیله یولاندی عراقه لطف ایدوب خلّاق سبحان (بیکَس) اولدون سن نواخوان روز محشرده دوتار اَل نوکره شاه شهیدان شهلر قاپیسیندان بلی قوومازلا گدانی ایسته گینه قسمت ایلیه کرب و بلانی #اربعین_

((الیمه قاره علم – آللام حسین)) ✍مصیبی تبریزی .. الیمه قاره علم – آللام حسین یول گوزل مرقدیوه – ساللام حسین قید عشقونده سنون – قاللام حسین .. (سنه من آغلاماسام – ئوللم حسین سینمی داغلاماسام – ئوللم حسین) .. .. .. .. من او خوان و خدمین-حسرتیَم آلتی گوشه حرمین – حسرتیَم اوردا یاشیل علمین – حسرتیَم .. (سنه من آغلاماسام – ئوللم حسین سینمی داغلاماسام – ئوللم حسین) .. .. .. .. سینه وه غم یاخانون – وای گونونه قلبیوه اوخ تاخانون – وای گونونه قاپیوا چپ باخانون – وای گونونه .. (سنه من آغلاماسام – ئوللم حسین سینمی داغلاماسام – ئوللم حسین) .. .. .. .. قانه غلطان باشیوا – آغلامیشام گوزده کی قانیاشیوا – آغلامیشام اوجا بوی قارداشیوا – آغلامیشام .. (سنه من آغلاماسام ئوللم حسین سینمی داغلاماسام ئوللم حسین) .. .. .. .. یاز قاپوندا منیده – بنده آقا سنه نوکر یازیلوم – منده آقا سائلم دوت الیمی – سنده آقا .. (سنه من آغلاماسام- ئوللم حسین سینمی داغلاماسام – ئوللم حسین)✨اَللّهُمَّ عَجِّل لِوَلیِّکَ الفَرَج #اربعین_

بسم الله الرحمن الرحیم احوالات اربعین ‌✍️⁩‌✍️⁩‌✍️⁩‌✍️⁩‌✍️⁩‌✍️⁩‌✍️⁩‌✍️⁩ قرخ گون هجران نظریمده ایله بیل قرخ ایلدی شرح ایدم قرخ گونون احوالین هامی نسگیلدی شکر اولا زینبه اما کرمون شاملدی چکدی آغوشه مزارون اورگی قان زینب ‌✍️⁩‌✍️⁩‌✍️⁩‌✍️⁩‌✍️⁩‌✍️⁩‌✍️⁩ نه یاتوبسان گوزون آچ بیر پوزولان حالیمه باخ دوشموشم مشگله تاراج اولان اجلالیمه باخ اولموش آزرده خیالیم اویان احوالیمه باخ منه سس ویر سسیوه بیرده دیسون جان زینب ‌✍️⁩‌✍️⁩‌✍️⁩‌✍️⁩‌✍️⁩‌✍️⁩‌✍️⁩ باجی درده دوشه قارداشی اونون گویلون آلار باجینون قارداشی ئولسه ایله رنگی سارالار غم احاطه ایلیر دوره سینی تیز قوجالار دور دوشوب درده گلوب قبریوه نالان زینب ‌✍️⁩‌✍️⁩‌✍️⁩‌✍️⁩‌✍️⁩‌✍️⁩‌✍️⁩ غم هجروندن حسینیم نه عجب ئولمه میشم باجون ئولسون گوزون آچ گور نئجه سنسیزله میشم قبروین اوسته بیله اوز باشینا گلمه میشم علت عشقوندی گلوب قبریوه مهمان زینب ‌✍️⁩‌✍️⁩‌✍️⁩‌✍️⁩‌✍️⁩‌✍️⁩‌✍️⁩ قبرین اطرافین آلان بیر سوری آهودی ملر شکوه ایامیدن ایتساخ اورگین درده گلر گور ربابی گزور آهوسین اوزه اشکین الر نئجه بو درد ربابه ایده درمان زینب ‌✍️⁩‌✍️⁩‌✍️⁩‌✍️⁩‌✍️⁩‌✍️⁩‌✍️⁩ خاطریمده یاری یانمش چادرون منظره سی بسکه ناله ایلمیشدی هامی باتمشدی سسی باجیوین حالینی چوخ پوزدی رباب اوخشاماسی حال زاریله دوتوب شام غریبان زینب ‌✍️⁩‌✍️⁩‌✍️⁩‌✍️⁩‌✍️⁩‌✍️⁩‌✍️⁩ دویولنلر سویولان قیزلارا سویلردی سوزون گورسدیب بیربیره زخمی ایاقین نیلی یوزون هیچ دانشمیردی رقیه چون ایتیرمیشدی اوزون قیزلارون حالینه اوتلاندی کماکان زینب ‌✍️⁩‌✍️⁩‌✍️⁩‌✍️⁩‌✍️⁩‌✍️⁩‌✍️⁩ بیری سویلردی قاچاندا چوله یاندی اتگیم بیری سسلردی جفادن اولوب القان اورگیم سویلدی بعضی بولوردوم داخی یوخدور کمگیم قیزلار احوالینی ایلور سنه اعلان زینب ‌✍️⁩‌✍️⁩‌✍️⁩‌✍️⁩‌✍️⁩‌✍️⁩‌✍️⁩ ایندی بومن بو مزارون بودا یورقون بالالار هاله تک دوره لیوب قبرین اوغولسوز آنالار اوغلی قارداشی ئولنلر سسی عرشه اوجالار سس سسه ویرمیش اوغولسوزلارا الان زینب ‌✍️⁩‌✍️⁩‌✍️⁩‌✍️⁩‌✍️⁩‌✍️⁩‌✍️⁩ سیئاتیله دولی نامه اعمالیله من زلفی ام وار سنه چوخ عشقیم ایا شاه زمن نولی ششگوشیه بیرده منی دعوت ایده سن بیر دعا ایله ایده مشکلی آسان زینب #اربعین_

اربعین شاعر ؟! بیر اربعین حسین سنه وار دیلده غم سوزوم قرخ گوندی آغلیرام سنه، گولموب بیر آن ئوزوم آگاهسن اورکده وفا تخمی اکمیشم الله بیلور بو قیرخ گونی قارداش نه چکمیشم بنیاد صبری سیل ملالیله سیخمیشام قلبیم سینوب حسین منی دیندیر داریخمیشام سنن صورا سویولوبلا منی چوخ پوزولموشام اولسون قسم بو قبریوه قارداش یورولموشام قیرخ گوندی گوزیاشیم یوزومه بی قرار آخیب قلبینده کی یارا باجووی یاندیریب یاخوب غارت اولان لباسیوی اللردن آلمیشام الله بولور بو پیرهن اوسته قوجالمیشام طوفان غم دیمه که دایاندیردی زینبی اما بو باش داشین ایله یاندیردی زینبی اما رقیه دن سنه قارداش ویرو خبر قالدی خرابه شامیده اول فاطمه سیر بیر جوت بالان یاناندا خیم قالدی خیمه ده امکانی اولمادی باجیوین تاکنار ائده قارداش یاناندا خیمه لرون منده یانمیشام غارت اولاندا منده بو چولده تالانمیشام بیر نقطیه دوشوب گوزی عرض ایتدی دیده تر قارداش بورا رقیه قاچان یر دگول مگر؟ فکریم فقط بو مدتی قارداش ربابیدی قارداش رباب هامودان ارتوخ کبابیدی لایلای دیور نواسی بیزی یاندیرور یاخیر ال سینسینده قبریوه قارداش دوروب باخیر مندن مکدر اولما که نوحه م روان دگول بوکوینگین خیالی باشیمدان چیخان دگول چخماز یادیمدان آتش هجرانه یانماقون نوک جداده کوفه ده قانه بویانماقون غمله اگرچه قلبینی اهل حرم سیخیوب اما ربابین اغلاماقی ائومیزی یخلوب بو قانلی کوینک اوسته گونوم گوزده قاره دی جسمون کیمی بو پیرهنون پاره پاره دی بیر عمر گلوب نظرده گلنده بو یولاری گورست منه هایاندا ابولفضل قولاری قارداش امان او مرحله سنگساریدن هر نیندیم آلام باشیوی نیزه داریدن قارداش رباب گورنه فراته باخیر یانور سو موج ایدنده قلبی یا نور اوتدا اوتلانور گوز موجی طعنه بو یوزی قاره سویا وورور اصغر یادیلا سینه سینی هی اوغوشدورور یولدا اوقدری ناله ایدوب آغلیوب رباب باخما حیا ایدور اوجادان آغلامور رباب قارداش امان او مرحله سنگساریدن باشین سنوب دوشوبدی باجون اختیاریدن هی آغلیوب دیردی اوغول هاردا قالموسان؟؟ باخ گور آناوی سن نجه احواله سالموسان قارداش بو کوینکون، سپه کینن آلمیشام شال عزا یرینه بو قبر اوسته سالمیشام ای نازلی دلبریم گل آنان سود وئره سنه کوسمه انانان اغلاماقین خوش گلر منه این ابیات از شاعر دیگریست : هی آغلیوب دیردی اوغول هاردا قالموسان؟؟ باخ گور آناوی سن نجه احواله سالموسان ای نازلی دلبریم گل آنان سود وئره سنه کوسمه آنانّان اغلاماقین خوش گلر منه #اربعین_

زبانحال حضرت زینب (اربعین) اربعینه گلموشم الده وئرن جان یاحسین آلتی گوشه قبریوه زینبدی قربان یا حسین دور ذبیحا"من قفا. قبریوه زینب فدا کوچ ائدنده کربلادن گورموشم باشسیز بدن پاره پاره جسمیوه کهنه حصیراولدی کفن قبرین اوسته سالموشام قانه بلشمیش پیرهن بورداگوردیم باشیوی ذبج اولدی دالدان یاحسین دورذبیحا"من قفا. قبریوه زینب فدا(۲) قرخ گون اولدی گورمیشم ایستی قوم اوسته پیکرین اولما میشدی دفن ائدن قارداشلارینلان یاورین قرخ گون اولدی سویدولار آل عبانین زیورین غارت اولدی خیمه لراولموشدی سوزان یاحسین دورذبیحا من قفا. قبریوه زینب فدا(۲) قرخ گون اولدی دوغرانوب گوردیم علیِّ اکبرین قرخ گون اولدی اوخلانوبدور شیرِخواره اصغرین قرخ گون اولدی شمرملعون ذبج ائدیبدی حنجرین قرخ گون اولدی غسلیوی گوردوم وئروب قان یاحسین دورذبیحا"منِ قفا. قبریوه زینب فدا(۲) قرخ گون اولدی زینبین قارداش گلوب دیلده نوا قرخ گون اولدی باشیمه قمچی یری اولموش قرا وارایکی قاره باشیمدا ای شهیدکربلا کاروانیم خسته دی دور گور گونن سن یاحسین دورذبیحا من قفا. قبریوه زینب فدا(۲) قانلوباشین شاهدیدی ئولدی اللرده بالا اوچ یاشی زهرایه بنزر قچلاری اولموش یارا ئوزده سیلیدن نشان هرگون دیوب هاردابابا صاحبیلن اولموشام من دیده گریان یاحسین دورذبیحا"من قفا. قبریوه زینب فدا(۲) ✍بقلم حاج عباسعلی دهقان(صاحب)۱۴۰۴/۵/۱۳ #اربعین_

احوالات کوچ از خرابه شام   ای غمی آغلار قویان کون و مکانی دور گِئداخ کربلایه یوللانور غم کاروانی دور گئداخ   ای مدینه بلبلی ترک وطن ائتدون نَدَن عاقبت اولدی سنه بو کنج ویرانه وطن ایندی یثربده باجون جانی چخؤب اندیشه دن قویما قالسون منتظر او بینوانی دور گئداخ   عمرون آز اولدی غمون چوخ گوشۀ ویرانه ده چوخ اذیّتلر سنه یتدی بو ویرانخانه ده قویمادی شمع غمون تاب و توان پروانه ده یانموسان یاندورموسان جان جهانی دور گئداخ   ای وفا روحی رقیّه اِیْلیروخ نقل مکان کربلایه عزم ائدوب بو دلشکسته کاروان همره اول بو کاروانه یاتما نازیله اویان ایستوری گؤیلون اگر کرب و بلانی دور گئداخ   کربلا صحراسی ایندی باصفا گلزار اولوب گل آچوب باشدان باشا،دامانی عطریله دولوب دور گیداخ سنله او صحرایه دئمه گل لر سولوب ای او گلزارین خوش الحان نغمه خوانی دور گئداخ   عمّه لر یکسر آلوب ایستکلی قبرون دوره سین تک به تک اهل حرم عرشه اوجالدوب ناله سین نسگلون قان ائتدی آخر باغرینی بو بی کسین حسرت ایچره قویما سن بو کاروانی دور گئداخ   دولدوروبدور داد و شیوَن گوشۀ ویرانه نی آیریلور سندن حرم لر،دلده داد و شیونی عمّه وه مشکلدی چوخ قویسون قیزیم یالقیز سنی ای بنات مصطفانون مهربانی دور گئداخ   گؤرمه دون خوش گون،اجل بیر وئرمدی مهلت سنه ئولدی قارداشون آتان،یوز وئردی هر محنت سنه اولدی بو دنیای روشن شامده ظلمت سنه ایله سنده ترک بو ظلمت سرانی دور گئداخ   آتمادون باشدان وطن ذوقون وئرینجه جان قیزیم ازبَر ائتمیشدون دلونده یثربی هر آن قیزیم ایندی نه گلدی سنه چخدی وطن یاد دان قیزیم ای غمی قان آغلادان کون و مکانی دور گئداخ مرحوم ذوقی #اربعین_