#ورود_به_ماه_محرم بخش سوّم آلدِی خَبَر حُسین گلُوسَن بیردَه خِیمِیَه اِیتدِی اِشارَه باشِیلَه مَعناسِی لا گَلُور یَعنی آنام باجِی مَنِیم اوُلماز قِیتماقِیم اَمن اوُلسا آشیانِینَه مُرغِ قَطا گَلُور گِیتدِیم، گُوزُیوِی تِیکَمَه یُولا،یُول گُوزتلَمَه هِیهات بیردَه خِیمِیَه بُو مُبتلا گَلُور بُوردا گُورَنمَه سَن گُورَه سَن شَهرِ کُوفَه دَه باشِیم اوُلوبدِی زِینَتِ نُوکِ جِدا گَلُور زِینَب دِیدِی حُسین آنامِین وار سِفارِشِی اِیتسَن قَبُول قَلبِیمَه بی حَد صَفا گَلُور سُویلُوب اُپَم بُوغازِیوِی آخَر وِداعیدَه اُپسَم اَله رِضایَتِ خِیرُ النِّسا گلُور وِیردِی جَواب قِیل آنامِین اَمرِینَه عَمَل زَهرا رِضایَتی لَه رِضای خُدا گَلُور اُپدی اِجازَه سِیلَه حُسینِین بُوغازِینی بُوردا ظُهُورَه مَنظَرَهء غَم فَزا گَلُور بو صَحنِیَه باخُوردِی رُقیّه کَنارِیدَن گُوردِی بُو آیریلِیق گُوزَه پُر ماجَرا گَلُور بو حالتِیلَه کِه باباسِی آیرُیلُوب گِیدِر بیردَه چَتین خِیامَه شَهِ کَربَلا گَلُور گلدِی بَلالی عَمّه سِینُون دُوتدِی دامَنِین گُفتارَه عَمّه سِیلَه او نازلِی بالا گَلُور عَرض اِیتدی اُپدُون عَمّه بابامِین بُوغازِینی چُوخ پُر مَلال خاطِرَه بُو ماجَرا گَلُور سالدُون او حالِیلَه کِه بابامِی بِی بِی یُولا بُولدُوم مَحال بیردَه امامِ هُدی گَلُور مَعلُوم اوُلان کِه بیردَه قِیّتمَز مَنِیم بابام اوُندا بَلالی باشِی مِیزَه نَه بَلا گَلُور باش سِیز قالان عَیالینَه کِیم عَمّه باش چَکر کِیم لَر حِمایَت اِیتماقا اوُندان صُورا گلُور کِیم دَردیمَه یِتر، گُوزُیمُون یاشینی سِیلَر دَرمانِ دَرد اِیتماقا اَلدَه دَوا گلُور رَافتلَه کِیم چَکر مَنی آغُوشَه جان کِیمِی کِیم بُو شِکَستَه گُوگُلونی آلماق لِیقا گلُور اَلدَن گِیدُور وَفالی بابام، کِیم بابام کِیمی سایَه بَلالِی باشیمُون اوُستَه سالا گلُور کِیم نازِیمی چَکر، کِیمَه ناز اِیلرَم بُویُور کِیم غَم گُونُوندَه حالِیمَه دِلدَن یانا گلُور زِینَب بُویُوردِی مَن چَکرَم نازِیوِی اوُزُوم مَندَن نِیازِ ناز اوُلا سَندَن سَزا گلُور سَن ناز اِیلَه مَندَه سَنُون نازِیوِی چَکُوم ناز اِیتسَه نازدانَه نَه قدَری بِجا گَلُور بیکس بابان گِیدندَه سَنی تاپ شِیرُوب مَنَه عِیناً عَمل وَصِیّتینَه جا به جا گلُور سَندَن بیر آن گُل اوُزلی قِیزِیم گُوز گُوتورمَرَم مِنّتدی جانَه هَر نَه یُولوندا بَلا گلُور قارداش بالاسِین عَمّه لَر عالمدَه چُوخ سُوَیر بو عَرضِ حالِیمَه بِی بِیلَر آشنا گلُور مَن تَک وَفالی عَمّه اوُلار نَه جَهانیدَه سَن تَک نَه بیر وَفالی صَفالی بالا گلُور مَن تَک نَه دِل وِیرن اوُلی قارداش بالاسِینَه سَن تَک نَه عالَمَه دِل آلان دِلرُبا گلُور بِیلَه اوُزون اِیتُورمَه هَلَه عَمّن اُلمِیُوب غَم لَر سَنی تاپاندا بِیبُون غَم زُدا گلور زَهرا باخِیشلی گُوزلَرُون آز دُولدُورُوب بُوشات سَن آغلیندَه نایِ دِلیمدَن نَوا گلُور اِی مَه جَبِین سَنی گُوزُوم اوُستُوندَه ساخلارام سَنلَن اِیشیق بُو گُوزلَرِیمَه مَه لَقا گلُور گِیتمَه گُوزُومدَن آهُوی چِین و خَتای عِشق گُوز تِیرینَه نِشان اِیدَه اَهلِ خَطا گلُور سَندَه بَلالی سان بالا مَندَه بَلالیم سَندَن مَنه صَفا، مَنه سَندَن وَفا گلُور کَرب و بَلا بَلاسی یِتَر باشَه، باشِیوَه شاماتِیدَه وَقایِعِ وِیران سَرا گلُور #تائب تَدارِکَ اِیلَه مُحَرّم عَزاسِینی آمادَه اوُل عَزایَه کِه ماهِ عَزا گلُور #تائب بُو دِل لَری سَنه دِل صاحِبی وِیرُوب عِلّت او دُور سُوزُون قَلمَه چُوخ رَسا گلُور آغلار حُسینَه صِدقِیلَه دُنیادَه آغلاسان مَحشَر گُونی شَفاعَتِیُوَه مُصطفی گلُور اِلتِماس دُعای فَرَج #زنده_یاد_تائب_تبریزی_رحمة_الله_علیه

بار المیله بوکولوب قامت زهرا یتدی بوکولن قامتیله رحلت زهرا گوزدن گوزل اطفالینی مین دردیله آتدی اوز زینبین آناسیز قیزلارا قاتدی دولدی گوزی اولدی یوزونون رنگی پریده عمری گونی باشه یتشوب قدی خمیده دنیادن او مظلومه خانم گیتدی شهیده گیتدی اوزی قورتولدی غمین دللره سالدی دنیاده هامی درد و بلا زینبه قالدی سیرین قوتاروب چرخ حیا بدر کمالی گون تک یتشوب اول شب عمر زوالی باش ویردی او دم زبنبینون غصه هلالی باشلاندی بلالی خانمین درد و بلاسی باجادی دیسم یتدی غم کرب و بلاسی خلقتده ایدوب وضع خدا مهر بناسین گل اوسته چکر صاحب گل، خار جفاسین ایستر آنالار قیزلارینی، قزلار آناسین قز اوز آناسیندان آنا قزدان دونه حاشا خاصه آنا زهرا اولا، قز زینب کبری قزلار آنالاردان دونه بولمزله، بو دوزدی زینب ال اوزوب فاطمه دن بس نجه دوزدی الله ئوزی عالمدی ال اوزدی نجه اوزدی اوزدی الینی دوزدی شرار غمه یاندی جسمیندن ایله بولدی که روحی آرالاندی اهل دله گزلین دگی واضحدی بو مطلب صبر ایتدی آنا آریلقیندا نجه زینب نه نوع آنا تابوتینی سالدی یولا زینب سالدی یولا تابوتی دالینجا گوزی قالدی قلبینده آنایه دیمه لی چوخ سوزی قالدی حقلیدی علم اوج مصیبتده ساچیدی حقلیدی پوزوب حالین اگر باشین آچیدی تابوت دالنجا آناوای دلده قاچیدی نه سریدی یا رب نه خانم باشینی آچدی دوزدی آنا تابوتینون آردینجا نه قاچدی زهرا قزی دوزدور که دونمزدی آنادن آردینجا گیدنمزدی ولی کثر حیادن آغلار گوزیله حسرتله سپردی سو قفادن قالموش متحیر ایکی مشکل آراسندا جاگیر ایکی حسرت اودی بیر دل آراسندا دوردی دولی گوزلی بیر آنا آردیجا باخدی هجران اودی یاندیردی یانان قلبینی یاخدی یاندی اورگی گوز یاشی گوزدن یوزه آخدی حسرت الی قوینوندا او مظلومه قیتدی یوزده آناسیزلیق توزی پوزقون ایوه گیتدی اولدی ایوه وارد غمیله مظهر زهرا گوردی که یریندن یغیلوب بستر زهرا بوش گورجاق آناسی یرینی دختر زهرا ایله پوزولوب نالیه گلدی او دل افکار احوالینه قان آغلادی مطلق در و دیوار زهرا دولانان یرلری گوردی او وفالی غم ایتدی گلوگیر آخوب اشک زلالی ایوده دایانا بولمدی چخدی او بلالی گلدی قاپونون دوردی دالیندا اوزی سوزلی گوزولوب آتاسیله حسنینی دولی گوزلی دوردوقجا پوزولدی دیمه احوالی دوزلدی یولدا گوزی تیر غمیله قلبینی دلدی ناگه آتاسیله ایکی قارداشلاری گلدی گوردی حسنین اشگی وورور موج گوزونده وار گرد یتیمی اولارین سولموش اوزونده باخدی آتیه، دوندی گوزی بیر دولی ابره آغلار گوزیله عرض ایدوب اول معدن صبره تاپشوردون آنامی باباجان سن نجه قبره؟ زهرا سنه بیر جانیدی، جاندان نجه دویدون؟ دوزدون نجه سولموش یوزونی توپراقا قویدون؟ بیر عمر یانام واردی یری گر بو سوز اوسته یاتدی نجه توپراقلارین آلتندا او خسته ال یاره، قولاق یاره لی، پهلوسی شکسته نیلی یری وار قامتینون صاق و صولوندا سیلی یری یوزده، اثر قمچی قولوندا بیر گنج حیا ایلموسن ای بابا مدفون هیهات گوره مثلینی بو دیده گردون مین گوهر غم دلده گیدوب قبره او دلخون دلخونیدی مین لر اورگی قان ایلیوبدی چوخ دللری قان، گوزلری گریان ایلیوبدی بولمزدیم آنام گون کیمی آخشام باتاجاقدی بولمزدیم آنام تز منی گوزدن آتاجاقدی تک قبرین ایوینده نجه من سیز یاتاجاقدی حسرت زده ایلوب ئوزونه قاتدی علینی اودلی ئورگین داغلادی، آغلاتدی علینی شاه آغلادی شهزاده لری داشدیلا بیردن هم ناله اولوب سس چکوب آغلاشدیلا بیردن دلده آناوای ذکری قوجاقلاشدیلا بیردن بیر سمتده زینب ئورگین تیر غم اویدی بیر یاندا حسینیله حسن یوز یوزه قویدی... مرحوم #تائب التماس دعای فرج

زینبی درد فراقون گتیروب جانه آنا گجه گوندوز ایلیوب دردیله همخانه آنا سن الیمدن گیده لی دوره می درد و غم آلوب درد و غم مونس اولوب زینب نالانه آنا. من هارا بو آناسیزلیق هارا آز سنّیمیله بیر بیله غصّه هارا اُف بیله دورانه آنا قیز عیالی آناسیز قالسا اوشاقلیقدا یانار آناوای دلده ایدر ناله یانا یانه آنا منده دائم دیرم وای آناسیز جانیم وای آناسیزلیق آپارار صبریمی تالانه آنا سن که گیتدون ایویمیزدن قاپیمیز باغلاندی آشنالرده دونوب اولدولا بیگانه آنا بیز غریب وطن اولدوخ بابامیز شهرینده غربت احساس ایدروخ یوز دوتاخ هر یانه آنا چوخ غریبانه سنه شام غریبان دوتدوخ نه بیله یاس اولی نه بیله عزاخانه آنا اولمادی شام غریبانه گلوب شرکت ایدن تسلیت ویرماقا بو جمع پریشانه آنا گلن اولسِیدیده اشرار یولی باغلادیلار گلنی قویمادیلار شام غریبانه آنا الی قوینوندا بابام آغلادی بیز آغلاشدوخ همصدا اولدوخ او شاهنشه دورانه آنا دولانوب سن دولانان یرلری عطرون آلارام جان فدا عطریوه پیغمبره ریحانه آنا گه لباسون دوشرم رسم عزائیله، سنی یاده سالّام توکرم اشکیمی دامانه آنا جانمازون دوشرم گاه مصلّاده سنون عطرون آلّام توکرم اشکیمی دامانه آنا آیریلیق دردی یامان درد اولی من بولمزدیم کاش بطلان وورولا کلمه ی هجرانه آنا قیز عیالی آناسیز قالسا اُلونجه آغلار یوزی گولمز قالی حسرت لب خندانه آنا قول قانادسیز قوشا بنزر آناسیز قیز ایوده گوزیاشی آب اولی خون جگری دانه آنا آنالار نائبه سی قیزلار اولار رسمیدی بو خاصّه من تک قیز اولا، سن کیمی فرزانه آنا جانشینم سنه آز سنّیمیله بو ایوده سرپرستم بو نچه دیده سی گریانه آنا فاطمی لر علوی لر قاریشوب بیر بیرینه هره بیر یاندا گلر ناله و افغانه آنا ایوده مظلوم بابام شمع عزا تک یانوری بیزده اولّوخ یانا یانه اونا پروانه آنا بوینی چیگنینده حسین دلده آنا قان آغلار سالوری ناله سی آتش بو دل و جانه آنا قوپارار حشر آلاندا اله عمّامه سینی برملا لرزه سالار طارم کیوانه آنا حسنینون قویوری یوز یوزه غوغا یارادور شور و شیون اوجالور قبّه ی کیهانه آنا آناسیز ایولرین عالمده صفاسی اولماز اولی غمخانه صفا اولماسا کاشانه آنا. خورداجا سنّیله اولدوم آناسیزلار آناسی مهر مادر ایدرم جمع یتیمانه آنا خاصّه چوخ شیون ایدر شوریله بو خوردا باجیم یاندیرور قلبیمی باخدوقجا یانا یانه آنا اسدی سندنصورا بو گلشنیوه باد خزان ایویمز دوندی داخی گلشن ویرانه آنا لحنی دوندردی خزان دیده اولان بلبل لر دولدی الحان فراقیله بو گلخانه آنا اورگیم درده گلور نسگلیوی یاد ایدرم باغریمی دوندری مظلومه لیقون قانه آنا نوبهاروندا خزان اولماقیوی یاد ایدرم گذریم دوشسته منین طَرفه گلستانه آنا مین بهار اولسا اگر مینلریله گل آچسا آناسیز قلبی آچیلماز قسم اول جانه آنا باغری قان اولماقیوی من ایدرم مدّ نظر دوشسه گلشنده گوزوم لاله ی نعمانه آنا برگ گل اوسته اولان شبنمی تشبیه ایدرم گل یوزونده اوتوران دانه ی مرجانه آنا. دوشه سن یاده یارالی یخلان حالتیله سروری گورسم یخلوب صحنه ی بستانه آنا. گوسترر نقشه ی سیلی رخ گلنارونده لکّه ی ابر دوشنده مه رخشانه آنا. آغلارام محسنیوین حالینی من بنزدرم شاخ گلدن قیریلان غنچه ی عطشانه آنا روشنایی سالی هر بیر ایوه #تائب آنالار بنزر ایولرده اولان شمع شبستانه آنا مهریله باخماقی ایو اهلینه عنوان سرور وای اگر قهر ایلیه یوز چویره یانه آنا .