#مرثیه_غم ورود به مدینه محمد باقر دائمی اردبیلی یثربده سس دوشوبدی گئدن کاروان گلور آل علی بو قافله ده نیمه جان گلور قلبی سینیق حسینون عزالی حرملری سمت عراقیدن وطنه باغریقان گلور پوزقوندی قافله هامی نی تک سیزیلیدیور ائتسون نظاره نالیه پیر و جوان گلور الدن وئروبدی دخت علی یدّی قارداشین اولموش کشیده قامتی غمدن کمان گلور دفن ائلیوب رقیه نی کنج خرابه ده قبریندن آیریلوب وطنه ناگران گلور محکم باسوبدی سینیه بیر قانلی کوینکی ناله ائدنده نالیه هفت آسمان گلور اکبر فراقی لیلینی مجنونه دوندریب گوزدن عذاره سیل سرشکی روان گلور قاسم طویی عزایه دونوب،نو عروسیلن بیکس آناسی نی کیمی دلده فغان گلور دشت بلاده صودامر آهوسی اوخلانان داغلی اورکده دردین ائدوبدور نهان گلور بیمار کربلا بت جانداری سیندیروب شمر و یزیده فاتح اولان قهرمان گلور بیداد شمریدن قوتاران آل عصمتی زنجیر ظلمیدن قوتاروب ناتوان گلور غارت اولان اثاث آلینوب اهل ظلمیدن ایل و تبارینه شهدادن نشان گلور کلثوم الینده پاره لنن آب مشکیلن امّ البنینه قانلی علم ارمغان گلور غم کاروانی چاتدی جوار پیمبره زینب اورک سوزون دئمگه آچدی منظره جدّا ملال و محنتیمون یوخ نهایتی بیر گونده گئتدی زینبون الدن جلالتی دنیاده من کیمین اولا بیلمز بلا چکن الگودی عالمه قیزوین استقامتی دوزدی مزاره گئتدی آنام سینه یاره لی چوخدی بو قلب زاریمون اوندان مصیبتی تا جان واریم بدنده یادیمدان چیخارتمارام آل امیّه ائتدیگی ظلم و جنایتی هانسی مصیبتمدن آچوم من دئیوم سنه قان ائلیوبدی قلبیمی غملر حکایتی سنکی حسینُ منّی اَنا مِن حسین دئدون اوغلون حسینه قائل اولوبسان بو حرمتی سیندیردیلار او حرمتی اشرار فتنه گر ئولدوردیلر جفائیله سالار امّتی رنج اسارتیم منی دلدن سالانمادی دلدن سالوب حسینمون امّا شهادتی قارداشیمون باشی کسیلن وقتده تشنه لب کرب و بلاده گوردوم او گون من قیامتی انگشتر اوسته بارماقینی کسدی ساربان بیر قانلی خاتم اولدی اونون سهم غارتی زیبا جمال گُللرین پرپر اولدیلار گلزار عترتون گئدوب الدن طراوتی اکبر کی چوخ شبیهیدی حسن و کمالوه دوغراندی قان ایچینده نهان اولدی طلعتی عباسیمی سوسوز، سو کنارینده یخدیلار خولسوز دوشوبدی تُپراقا اول سرو قامتی گتدی حسین کی خیمه لره قانلی پرچمین آل اللهی پوزوبدی اونون درد و محنتی زلفیم آغاردی دردینه،قان آغلادی گوزوم امّ البنینی ئولدوره جک رنج فرقتی روشنگر بو مسئله دور زمان اولوب زینب او شهریده گون تک عیان اولوب امّ البنینه همدم اولوب غم مدینه ده غملر ائدوبدی قامتی خم مدینه ده ماتم سرایه دوندی بنی هاشم ائولری عرشه اوجالدی زمزمه ی غم مدینه ده قلبی شکسته زینبیلن هم نوا اولوب قوردی حسینه مجلس ماتم مدینه ده هر اوخشاما دیینده اول وا حسین دئدی قان آغلاشوبدی عترت خاتم مدینه ده دورد خیردا قبری ائتدی بنا هرگون آغلادی دردی آغارتدی باشینی کم کم مدینه ده گاهی دئدی ائویم یخلوب سینه داغلیام محنت اساسیم اولدی فراهم مدینه ده دنیاده دورد اوغول آناسیدیم عزیزیدیم خوش گونلریم کئچردی دمادم مدینه ده ای یثربون خانملاری اوغنلاریم ئولوب چشمیم اولوبدی چشمه ی زمزم مدینه ده بوندان صورا چاغرمیوم امّ البنین منی ائتدی فلک جلالیمی برهم مدینه ده زهرا مثالی غصّه لی بیت الحزن قوروب جانیم چیخینجا نالیه گللم مدینه ده عباسیمون نشانی منه یادگار اولوب بیر قانلی مشکیله پرچم مدینه ده بیلدیم دگوبدی اوخ گوزونه قوللاری دوشوب محشر گوزومده اولدی مجسّم مدینه ده خیردا مزاریده اوجا بویلی بالام یاتوب تاب ائتمرم بو محنته ئولم مدینه ده بیر حاله قالدی حالینه دشمنلر آغلادی ئوز دردینه تاپانمادی مرهم مدینه ده اوغلوم دییردی دردوی دلدن آتانمورم گوندوزلر آغلورام گئجه لرده یاتانمورم هرگون غمونده نی کیمی نالان اولوب ننون دلدن انیس آتش هجران اولوب ننون دریای درد و غمده سینان کشتیلر کیمین بی کس اسیر پنجه ی طوفان اولوب ننون هانسی مکاندا بیر اوجا قامت جوان گوروب یاده ائلیوب ملالوی گریان اولوب ننون بیجا یئره باجون کیمی قدّی خم اولمیوب دورد اوغلنون غمینده عزا خوان اولوب ننون واضح دئیوم اوتوز نئچه ئیل هر زمان سنون باخدوقجا مه جمالوه حیران اولوب ننون ای مشکی اوخلانان قولی تندن قلم بالا سنسیز وطنده بی سر و سامان اولوب ننون سنسیز خرابه منزله بنذر ائون بالا بو غملی دودمانه نگهبان اولوب ننون گاها کی قانلی پرچموی گزدیروب بالون اوّل باخاندا شاد و خرامان اولوب ننون بیر آز کی یول گئدوب علمون لنگر ائلیوب رعشه دوتوب وجودینی لرزان اولوب ننون فورا دوشوبدی یادینه قولسوز یخلماقون غم صحنه سین گورنده هراسان اولوب ننون غم قاصدی وئرنده بشارت ورودوزه جویای حال شاه شهیدان اولوب ننون بیلدیم حسین ئولوب سنی اصلا سوروشمادیم سندنده چوخ حسینه پریشان اولوب ننون بیر علّته بقیعده حسینه چوخ آغلورام زهرا یئرینده غمکش دوران اولوب ننون