✳️ شعر مازندرانی " پَر دِنِه " شاعر : على حسن نژاد پَرْدِنِهْ سَنْگا، چِلا چُورِه تِه چِشْ خُونْدِنِه مِه نَديِه خُورِه تِه چِشْ مِنْ كِهْ تِهْ مَسْتِ چِشِ دِچارِمِهْ اَتّانا، هِزارْ هِزارْ هِزارِمِهْ مِنْ كِهْ شِه سايه ی جا، فِراريْمِه تِهْ چِشا، دَسْتا، دِلِ قِراريْمِه چارْ هِنيْشِهْ تِه پَلي چِهِلْ وونِه سِفْتِ سَنْگْ تِهْ بُوجِهْ زِنْدِه دِلْ وونِه خامْبهْ كِهْ سَرْدِ هِوارِه تَشْ هادی مِهْ تَنِ زَرْدِ قِوارِه تَشْ هادی خامْبِهْ تِهْ مَسْتِ صِدارِه دَپُوشِمْ تِهْ تَنِ سُوزِقِوارِه دَپُوشِمْ غِرْصِه رِهْ چُو بَزوئِن مِرِهْ وِنِهْ دِل ْبهْ دِرْيوبَزوئِنْ مِرِهْ وِنِهْ خاكا ،سَنْگا ،چِلاچُويه دَسْ اَسْيْر خِدْرِه پِرْزُو بَزوئِنْ مِرِهْ وِنِهْ مِنْ نِخامْبِهْ چِلْچلارِهْ پرْبُوجِنْ اوْجيآ،بچابچارِهْ سَرْ بُوجِنْ مِنْ نتومْبِهْ سَرْسَريشابْ بَزِنِمْ تُو‏‏رّهْ بَيْرِمْ،اِفْرارِهْ لابْ بَزِنِمْ خامْبِهْ كِهْ سَنْگا شْيشِه رَفِقْ بُوئِنْ تُور ا اِفْرايه ريْشِه رَفِقْ بُوئِنْ مِنْ نِخامْبِهْ مِهْ چايي شْيرينْ بُوئِه اينْ وَرْ اونْ وَرْ كِراتِ پَرچين بوئه خامْبِه كِه مِرْدِمِ نُونْ خِرِشْ دارِه لابْ بَزِه خِشْكِ زَمينْ وارِشْ دارِه خامْبِه شَو روزِ گَلي رِه نَجوئِه دَسْ نَشِسْ تازِه هَلي رِه نَجوئِه مِنْزِلِ اَشْنيْكا گَلْ كِجاييْنِه اينْ هَمِه گَتْ گَتِ للْ كِجاييْنِه اَمِهْ تيمْ جارْ چِه هَمِشْ وَكْ كَفِنِه كِرْكا سيْكايِه كِلي كَكْ كَفِنِهْ خامْبي بيصْدا بَووشيْمْ ، نِلِنِّه وِلّا هَيْرا هَيْرا بَووشيْمْ، نِلِنِّه وِلّا اينْجِه اونْجِه كيْلُومي، كِنِسِّه بَوِّمْ خامْبي دِرْيا بَووشيْمْ، نِلِنِّه وِلّا اينْ هَمِه مَرْدِمِ بي پِلا كَچِه اينْ هَمِه بِرْمِه ي مارونا وَچِه اينْ طَرِفْ صِدا صِدايه لُو بَئيْتْ اونْ طَرِفْ بَمِردِ گَنْدآ،بُو بَئيْتْ اينْتي سازِ پِشْتي كِه سما نَنِه گُومْ بَئي كِلي جِه كِه دَرْ وا نَنِه اينْ گَتِ خِرابه هيچْ كَسْ دَنييِه خِدا هَمْ مَرْدِمِ وْنگْ رَسْ دَنييِه صَحْرا-آ دَشْتا،دَمِنْ بَمِرْدوئِه اينْ هِوارِه دِلْ نَونْ بَمِرْدوئِه دِلْ مِهْ خِشْكِ هِسْتِكارِهْ مُونْدِنِه بي كَساكارِ نِشارِهْ مُونْدِنِه غِرْصِه آ، دَرْدا،غَما،بَپيسِّ تَنْ اينْ هَمِه خَنْجِرا، اَتّا ميسِّ تَنْ شِهْ چِشْ دِلِه پِناهْ هادِهْ مِرِه سييو شُو دَكِتْمِهْ راهْ هادِهْ مِرِهْ تابِهْ كِي خِرابِه مِنْزِلْ تاريْكي وا هاكِنْ خِنِهْ رِه راه هادِه مِرِه اينْ دُومْبه كِهْ مِهْ جا دورِهْ تِهْ چِشْ اِشْنُونِه مِهْ برْمِهْ بُوره تِهْ چِشْ اينْتي كِهْ تَهَيِّه بَيْتِه سييو شُو دَكِّلامْ نَوِنِه مارْ بُورِه تِه چِشْ #شعرمازندرانی #علی_حسن_نژاد 🔰 به کانال اخبار #لفور بپیوندید 👇👇 @akhbarelafoor 👆 با ما همراه باشید

🌹 شعر مازندرانی درباره شهدا " مه دله غم دپیته غم دپیته " : مه دله غم دپیته غم دپیته إفرادار بیمه و بهیمه پیته إفرادار بیمه و بشکسه چله غرصه سیو چادر بزو مه دل دله غرصه غرصه غرصه خروار به خروار غرصه إنه إنه قطار به قطار بورم صحرا بورم جنگل بورم دشت پسره بورده راه ره بزنم گشت آهای مزیره مرد،چی کار هاکردی مه ره سر بیشتی و تینار هاکردی دو ساله بوردی و دیگر نموئی پاره بیه منه جیگر نموئی چند ساله راه دارمه تا ته دگردی دست به دعا دارمه تا ته دگردی مره بکوشته ته چشم انتظاری رفاقت این تیه بوری تیناری؟ در که صداکنه گمبه بیموئی ته مار دعا کنه گمبه بیموئی ته ماره برمه واره کور هاکرده ونه دله ته داغ ناسور هاکرده مه دست و مه دل و صدا بمرده برمه نکمه،مه دل باد بکرده شه مزیره ریکای دوربگردم نومزه گیره ریکای دور بگردم ته تازه نوج بزه ریشه بلاره ته رج دره مه سرپیشه بلاره شه می ره چم دایی ته دور بگردم غرصه ره رم دایی ته دوربگردم أشون ته عکسه می ره چم هادامه ته عکسه شیشه ره شبنم هادامه دل ره خربزه واری قاچ هادامه تا قد داشتمه عکسه ماچ هادامه امسال ننی کر ره کوفا هاکنی بینجه هپاچی و سما هاکنی إمسال ننی تره داماد هاکنم دوست و رفیقونه دلشاد هاکنم دامادی رخت ره هر روز بو کشمبه ورمه وره بازار اتو کشمبه پنج شنبه نماشون مه گس کفنه غرصه ورگ وونه و مره لفنه شومبه مزار ته ره پیدانکمه دله قرار تره پیدانکمه بورم جبهه سنگر به سنگره بگردم داد بکشم پسر پسر بگردم اینجه جنگه اینجه خون و تفنگه اینجه جنگه اینجه شونگ و شونگه مه سر تیر و تفنگ ، مه سرگلیله اینجه خون روش بیته کیله به کیله اینتا لینگ کنه شه چه راه نشونه صاحاب کوبه ونه همراه نشونه اینتا دست کنه شه که دم هادائه حلقه دارنه گمونم نو زوماهه کوتر إسپه بال ته ره ندیمه بیمومه ته دنبال ته ره ندیمه گننه ته ره اروند او بورده گننه ته ره کوسه ماهی بخرده گننه تانکه زنجیره بن، راستیه؟ دشمن توپ و تیره بن ، راستیه ؟ مسلمانون مسمانون ، مه سینه  مه دل که دل نیه، کینوئه کینه مه ره تور بزه چو هاکرده دشمن کوتره پر پتو هاکرده دشمن مه سره تش دچینه من شه دومبه مه کوتره پر بچینه من شه دومبه مه صدا لو نینه چه چی بهووم مه چشم سو نینه چه چی بهووم ته پوتین و پلاک ره راضی بیمه تنه بپیسه ساک ره راضی بیمه ته هسکائه جا مه دل رضائه دل ره راضی کمبه ته هسکائه شعر از علی حسن نژاد #شعرمازندرانی #شهید وشهادت #علی_حسن_نژاد 🔰 به کانال #اخبارلفور بپيونديد 👇👇 @akhbarelafoor 👆 با ما همراه باشید.