گلخندان نقیللری
آی‌پاراسو(۳)
نقیل دییَن: رضا (روح الله) آغال
دیوین بَتَر آجوقو گلدی. دِئدی:
- عیبی یوخ! گِئدگینَن بوردا ارخ‌ده سو گَلیری، گِئد اُردا اَل اؤزؤیؤ یُو، اُننان گَل گِئد.
قیز گِئددی، هَلَه اِئلَه خَرَه سو گَلیردی، سویونان اَل اؤزؤنؤ یُودو. اَل اؤزؤنؤ یُوواندا آللوندان میریخ (نوعی زخم) چیخدی، چَنَه‌سیندن ماشارا (نوعی زخم).
گَلدی قویودان چیخدی، آی‌پاراسو گُردو بو قیز چوخ پیس اُلوب. داورلارو گُتؤردؤلَه گِئددیلَه کنده. نَنَه‌لیگی حیَط‌ده یول گُزلوردو که بولار گَلَه‌لَه، گُرَه قیزینینده آللوندا آی چیخمیش اُلا چَنَه‌سیندن اؤلدؤز. قیزلَر گَلدیلَه، گُردو که قیزینین آلوننان میریخ چیخیبدی چَنَه‌سیندن ماشارا. بیرآز که ترکیبی پیسی‌دی، بیرآزدا بَتَر اُلوبدو. داها هِئچ باخماق اُلمورو بیلَه‌سینه.
اُ اُلدو که داها آی‌پاراسونون گؤنؤنؤ قارا اِئلَه‌دی. اِئو ایشی‌نی که دِئیَردی گُرَگ سَن گُرئَی، بیرآزدا قاباخکین‌نَن آرتوخ بیلَه‌سینه اذیت اِئلَردی.
بیرگؤن دِئدیلَه که سَحَر کنددَه تویا دِئییب‌لَه، هی یوللانوردولا که گِئدَه‌لَه تویا، آی‌پاراسو دِئیِردی مَنَه‌دَه اجازه وِئرین گَلیم. دِئدیلَه که اُلماز. سَن گُرَگ اِئلَه گِئدئَی داوارلارو یایای. داوارلارو یایای که هِئچ، یؤنگ‌دَه گَرَگ آپارای اَگیرئَی.
آروادون قیزی نَنَه‌سینه دِئدی:
- اُلمویا که بو تِئز یونگؤنو اَگیره، گَلَه چاتا تویا. بو گؤن اؤچ گؤنؤ یؤنگ وِئر بیلَه سینه.
آی‌پاراسونون نَنَه‌لیگی بیلَه‌سینه دِئدی:
- سحر اؤچ گؤنؤ یؤنگ آپاررای! تؤکنمی‌یِنجه‌دَه حققئی یوخ داوارو گَئتیرئَی کنده.
نَنَه‌لیگ‌اینَن قیزی اِئرتَه یوللانولا گِئددیلَه تویا، آی‌پاراسودا یؤنگ‌لری گُتؤردؤ، داوارلارودا سالدو یولا، گِئددی چُلَه. گِئددی چُلدَه هی داروخوردو، آغلوردو، آللاها یالوارودو که بیردَن یادونا دؤشدؤ که دیو دِئمیشدی بیرموقع ایشئی اُلدو، اگر من کؤمَگ اِئلَه‌مَه‌لی اُلدو گَل دِء من کؤمَگ اِئلَه‌ییم بیلَه‌یَه.
آی‌پاراسو گِئددی قویویا، دیوه سلام وِئردی، دیوین اِئو اِئشیگینه چاتدو، بیلَه‌سینه دِئدی که بو جؤر اُلوب. نَنَه‌لیگ‌ایمینَن قیزی گِئدیبلَه تویا، من‌نه هرنَه یالواردوم که گِئدَم تویا، قویمادولا. بو گؤنده منه اؤچ گؤنؤ یؤنگ وِئریبله اَگیرم که گِئدیب چاتمویام تویا، داوارلارودا یایام.
دیو دِئدی:
- هِئچ ناراحات اولما! من همی یؤنگؤیؤ اَگیررَم، همی داوارلارویو یایارام. سَن گِئد تویا.
گَنَه گُردو قیز ناراحات‌دو. سُروشدو:
- گَنَه نِئیَه ناراحاتای؟
آی‌پاراسو دِئدی:
- منیم پالتاروم یوخدو. هرنَه قشنگ پالتاروم وارودو، نَنَه‌لیگ‌ایم گِئیدیریب اُز قیزینه.
دیو دِئدی:
- هِئچ ناراحات اُلما! منیم‌ده بیر قیزیم وارودو سَنئی یاشوینا، اونا من گُزَل گَزَل پالتارلار تیکدیرمیشَم.
اُنون پالتارلاروننان گَتیردی وِئردی، آی‌پاراسو گِئیدی، بویماخدان قُلباخدان سالدو، بیر جؤت‌دَه قشنگ باشماق گِئیدیردی، دِئدی:
- ایننی گِئد! آما توی ایسته‌دی تؤکَنَه تِئز قِئیید گَل!
آی‌پاراسو گِئددی تویا. تاماشا اِئلَه‌دی، قیزلَرینَن اوینادو، اُزو یالقوز اُینویاننا هامو آروادلار قیزلَر باخوردولا، تاماشا اِئلیردیلَه، هی دِئیِردیله:
- بو کیمنی بو گؤیچَگ‌لیگ‌دَه!
نَنَه‌لیگی قیزینه دِئدی:
- اُلمویا آی‌پاراسودو!
قیزی دِئدی:
- یوخا! اُنون پالتارلارونو که من گِئییب گَلمیشم. اُنوندا بوجور پالتارو یوخودو گِئیَه گَلَه.
توی ایستیردی تؤکَنَه، خالخ ایستیردیله داغولالا، آی‌پاراسو تِئز تویدان چیخدی، دؤشدو قاچاقا که گِئدَه قویویا. گِئدَه دیو یانونا. یولدا گِئدیردی، اُجَشگَن‌تَکی شاه اوغلودا گَلمیش‌ایمیش اُ دور وَردَه شکارا. شاه اوغلو گُرَر بیر دَنَه قیز گَلدی یانوندان گِئچدی، نیجه گویچَگلیگ‌ده قیز که اُگؤنَه‌جَه گُرمَه‌ییبدی!
چوخ سُودو قیزی. قیزه دِئدی:
- بیرآز دایان!
آی‌پاراسو بیر آزدا قُرخدو داهودا دؤشدؤ قاچاقا، گلدی اَرخ‌دَن گِئچَه، آیاخ قابولارونون بیر تایو ایلیشدی پالچوقا آیاقوندان چیخدی قالدو. قیز گُردو اَیَه قِئیِدَه باشماقونو گُتؤرَه، شاه اوغلو گَلَر چاتار. داها اِئلَه بیر تای باشماقونان قاچدو گِئددی گیردی قویویا. شاه اوغلودا گَلدی هرنه آختاردو، قیزی تاپمادو. اُ بیرتای باشماقو گُتؤردؤ گِئددی.
#گلخندان_نقیللری
#عظیم_سرودلیر
خواندنی های سرو
گلخندان نقیللری آی‌پاراسو(۳) نقیل دییَن: رضا (روح الله) آغال دیوین بَتَر آجوقو گلدی. دِئدی: - عیبی
گلخندان نقیللری
نقیل دِئیَن: رضا (روح‌الله) آغال
آی‌پاراسو (۴)
آی‌پاراسو گیردی قویو ایچینده تَززَه پالتارلارو چوخاددو وِئردی دیوه، اُزؤنؤن پاراپورا پالتارلارونو گِئیدی. دیوده اُنون یؤنگؤنو اَگیرمیشدی، گُتؤردو، چیخدی گَلدی داوارلارودا گُتؤردؤ گَلدی کَنده. کندده نَنَه‌لیگی‌اینَن قیزیننَن سُروشدو:
- گِئددی‌ایز تویا بیلَه‌ایزه خوش گِئچدی؟ توی نَجؤرؤدؤ؟
دِئدیلَه:
- هَیَه بابا توی اِئلَه‌ایدی، بِئلَه‌ایدی! بیر قیزده گلمیشدی، نَجور گؤیچَگ قیز! نَجور گُزَل اوینوردو! هی تعریف‌لَه‌دیلَه.
شاه اوغلو که بو قیزی گُرموشدو گِئدمیشدی، بونون عشقیندن نُخوش اُلموشدو. بیر مدّت اِئودَن یازویا چیخمَه‌دی. هرنه طبیب زاد گَتیردیله بو بار اُلا، باشا گَلمَه‌دی. طبیب‌لَر دِئدیله:
- بونون‌کی عشق نُخوشچؤلؤقؤدؤ. عاشق اُلوب. گَرَگ اُقیزی که دِئیِری گِئدَه‌ییز تاپایوز، آلایوز تا بار اُلا.
شاه آروادو بیله‌سیندَن سُروشموشدو که بو قیز کیمدی، دِئمیشدی فلان کند دور و ورینده اُ قیزی گُرمؤشَم. شاه آروادو آغ‌بیرچَگ‌لَری ییغدی اُ بیر تای آیاخ‌قابونودا وِئردی بیلَه‌لَرینه، دِئدی:
- بو آیاخ‌قابونو آپارون، هر کیمین آیاقونا اُلدو گُتؤرؤن گَتیرین قصره!
آغ‌بیرچَگ‌لَر گَلدیله، کَندی دُلاندولا، قیزلَرین هاموسونون آیاقونا گِئدیردیلَه. بیرینین آیاقونا بُیوگ گَلدی، بیرینین‌کینه کؤچؤگ، تا گَلدیلَه تاجر قاپوسونا.
تاجر آروادودا گُرمؤشدؤ که بولار گَلیبدیله کنده، تِئزلیگجه، آی‌پاراسونا داوارلارو وِئرمیشدی، دِئمیشدی گِئد چُلَه.
آروادلار گَلَننَه، نَنَه‌لیگ اُز قیزینی گَتیردی، گؤجؤنَن آیاخ‌قابونو گِئیدیردی آیاقونا، آروادلار دِئدیلهَ:
- یوخ! بونادا داردو بونون آیاقونا اُلماز.
داها هامو یِئری گَزدیله، اومودلارو کَسیلیب گِئدیردیلَه، گُردؤلَه تَپپه اؤستونده بیر قیز داوار یایورو. دِئدیلَه:
- بیزکی بو یِئرَه‌جه گَلمیش‌ایگ، گِئدَگ بو قیز آیاقونادا گِئیدیرَگ گُرَگ نَجؤردو.
گِئددیلَه، آی‌پاراسونون آیاقونا آیاخ‌قابونو گِئیدیردیله، گُردؤلَه اِئلَه بونون آیاقونادو. سَروشدولا:
- سَن کیمین قیزی‌یَی؟
دِئدی:
- من تاجر قیزی‌یَم. نَنَه‌لیگیم اَلی آستوننایام.
آغ‌بیرچَگ‌لَر قیزی تانودولا، گِئددیلَه شاه آروادونا خبر آپاردولا:
- اوغلوی گُرَن قیز تاجر قیزی‌دی.
شاه آروادودا اوغلونا خبر وِئردی که قیزی تاپموشوق. ناراحات اولما. اوغلان بار اولدو. شاه آروادو آغ‌بیرچَگ‌لَری گؤننَردی ایلچی‌لیگه. دِئدی:
- گِئدین گُرون نَمه ایستیللَه، نَمَه لازیم‌لَریدی، آپارون وِئرین، سَحَر ایستیریگ توی دوتاق.
گِئددیلَه دِئدیلَه، آی‌پاراسونون نَنَه‌لیگی دِئدی:
- بیز هِئچ‌زاد ایسته‌میریگ. فقط یاروم باتمان سارومساق، یاروم‌باتمان سوغان ایستیریگ، بیردَه بیر شرطیم‌ده وار که اُز قیزیمی‌دَه آلایوز وزیر اوغلونا.
آغ‌بیرچَگ‌لَر دِئدیله:
- سارومساقونان سوغانو وِئرریگ، آما اُز شرطی‌یی گَرَگ بیز گِئدَگ دِئیَگ، اَیَه قبول اِئلَه‌دیله، گَلَلّه اُز قیزیئی‌دَه آلاللا وزیر اوغلونا.
آغ‌بیرچَگ‌لَر گِئددیلَه دِئدیلَه شاه آروادونا، شاه آروادو گِئددی شاها دِئدی که قیزین نَنَه‌سی بوجور شرط قُیوب‌که اُزؤنؤننَه قیزینی آلاق وزیر اُغلونا. شاه‌دا وزیره دِئدی. وزیرده مجبور قالدو اطاعت اِئلییَه. قبول اِئلَه‌دیله.
اُگونون سحریسی یاروم باتمان سوغانونان یاروم باتمان سارومساقو گَتیردیله وِئردیلَه آروادا، دِئدیلَه:
- قیزی آمادا اِئلَه. ناهاردان سورا گَلَه‌جَه‌ایگ گلینی آپاراق.
نَنَه‌لیگ‌دَه بیر آش پیشیردی، ایچینی دُلدوردو سوغانونان و سارومساقونان. آی‌پاراسونا بیر چاناق وِئردی ایچدی، بیر اِننی پارا پالتاردا گِئیدیردی بیلَه‌سینه، یولا سالدو.
گِئدیردیله قصره سارو، آی‌پاراسو آغ‌بیرچگ‌لَره دِئدی:
- منیم بو قویودا بیر نَنَه‌م واردو، اجازه وِئرَه‌ییز گِئدَم اُنا بیر باش وُرام.
دِئدیلَه:
- فقط تِئز گَلگینن!
گِئددی قویویا، گَنَه دیوه سلام اِئلَه‌دی. دیو دِئدی:
- هارا گِئدیرئیَ؟
قیز تعریف‌لَه‌دی که نَجور اُلوبدو. دِئدی:
- الان گلینم من. منی آپاروللا.
دیو دِئدی:
- بو پالتارونان!
آی‌پاراسو گلدی چیخه گِئدَه، دیو گُردو بونون آغزودا قُرقُرقُخورو. بیر آز مشک و عنبردن و گلاب‌دان زاددان گَتیردی وِئردی اوتدو، دِئدی:
- بیر دست پالتار من تیکمیشدیم اُز قیزیمه، حریردَن و ابریشم‌نَن، لاپ یاخچو پالتار.
اُلارو گِئددی گَتیردی گئیدیردی بیلَه‌سینه، تایار اندازا اُلدو، بوخچا زاد وِئردی بیلَه‌سینه، یولا سالدو. دِئدی:
- گِئدیرئَی، تویدان سورا گَل منه باش وُر!
آی‌پاراسو دِئدی:
- عیبی یوخ!
#گلخندان_نقیللری
#عظیم_سرودلیر
خواندنی های سرو
گلخندان نقیللری نقیل دِئیَن: رضا (روح‌الله) آغال آی‌پاراسو (۴) آی‌پاراسو گیردی قویو ایچینده تَززَه
گلخندان نقیللری
نَقیل دِئیَن: رضا (روح‌الله) آغال
آی‌پاراسو (۵)
آی‌پاراسو قویودان چیخدی، گَلدی گِئددیلَه قصره. شاه آروادو دِئدی قوی گِئدیم باخوم گُرؤم بو نَجور قیزدی که منیم اوغلوم بونون عشقیندن نُخوش اُلموشدو. گَلدی بونون شالونو وُردو یوخارو، گُردو چوخ گویچَگ قیزدی. آللوندان بیر آی چیخیب، چَنَه‌سیندن اؤلدؤز، اُزوده گلاب و مشک و عنبر قُخوسو وِئریری. چوخ خُشو گَلدی. بیردَنَه مروارید بویماق گَتیردی سالدو آی‌پاراسونون بوینونا.
نَنَه‌لیگ گلدی گُردو آی‌پاراسونون بوینونا بیر مروارید بویماق سالوبلا، سُروشدو:
- نجور اُلوبدو که بو بویماقو سالوبلا سَنئی بوینویا؟
آی‌پاراسو دِئدی:
- اُ آشو که پیشیرمیشدئی، بولارون چوخ خُشو گَلدی. اُناگُرَه بو بویماقو سالدولا منیم بوینوما.
نَنَه‌لیگه دِئدیلَه:
- سحرده گَلَه‌جَه‌ایگ سَنئی قیزی‌یی گَتیرَگ. قیزی آماده اِئلَه.
آرواد گِئددی گَنَه آش دؤزَلددی. ایچینی دُلدوردو سارومساق و سوغانونان وِئردی قیزی ایچدی. قیزینین اؤزؤننَه‌کی ماشاریونان میریخی‌دَه چِئکدی دستمالونان باغلادو، ایلچی‌لَر گَلدیله گَلینی آپاردولا. وزیر اوغلو گَلدی قیزین شالونو وُردو یوخارو، گُردو بو بیر بد‌ترکیب قیزدی، آللونناکی، چَنَه‌سینده‌کی شاللارو آچدو، گُردو بیر میریخ آللوننا، بیر ماشارا چَنَه‌سینده، آغزودا که سارومساقونان سوغان قُخوسو وِئریری، دیبدَن بیلَه‌سینه یُوخون گِئدمَگ اُلمورو.
گَلدی نَنَه‌سینه دِئدی. نَنَه‌سی‌دَه گَلدی باخدو گُردو لاپ هدر بیرزاددو، گِئددی شاه آروادونا دِئدی، شاه آروادو شاها دِئدی، اُدا وزیره دِئدی، بیربیری‌اینَن شورلاشدولا، قیزی قِئیتَردیلَه گِئددی. آی‌پاراسونادا توی دوتدولا، شادلوق اِئلَه‌دیله.
اؤککوج گون تویدان سورا، آی‌پاراسو دیزینی قوجاخلایوب اُتورموشدو، شاه اوغلو سُروشدو:
- نمَه اُلوبدو که ناراحاتای؟
آی‌پاراسو دِئدی:
- منیم که بیر کسیم یوخدو. آتام که گِئدیب سفره، نَنَه‌م که رحمته گِئدیب، بیرکس وار منه چوخ یاخچولوق اِئلی‌ییب، اَیَه اجازا وِئرسئی، گِئدَگ اُنا بیر باش وُراق.
شاه اوغلو خبر آلدو:
- کیمدی؟
آی‌پاراسو تعریفله‌دی که دیو مَنه چوخ یاخچولوق اِئلی‌ییب. دوردولا دوشدولَه یولا گِئددیلَه قویو باشونا،گیردیله قویو ایچینه، دیوه باش وُرالا. دیو قیزی گُردو چوخ سُوُندو، قوجاخلادو آغلادو.
قیز دِئدی:
- نِئیَه آغلورای؟
دِئدی:
- من دیو دَئگیلَم. من اِئلَه سَنئی آنایام. منی نَنه‌لیگئی دوعا جادو اِئلَه‌ییب، بو شیکله چوخادوب. اُ زمان که بیزیم زندگانلوقوموز خُشودو، اُ گُردو بیزیم زندگانلوقوموز یاخچودو، خُشوق، حسودلوقدان، گِئددی دوعا جادو اِئلَه‌دی، منی دیو شیکلینه چوخاددو، منده داها بو شیکله چیخدیم، قِئیییدَه بیلمیردیم اِئوَه. اُیودو که اُزوده گَلدی منیم یِئریمی دوتدو.
شاه اوغلو دِئدی من اُزوم دؤزَلدَه‌رَم. گِئددی شاها دِئدی، شاه دستور وِئردی آروادونان قیزی دوتدولا گَتیردیلَه. دستور وِئردی جادوگری‌دَه گِئددیلَه تاپدولا گَتیردیلُه. دِئدی:
- اَیَه بو دیوی اوول‌کی شیکلینه چوخادمویای، بوینویو وُراجاقام.
جادوگر بیر وردی اُخودو، دیو اوول‌کی شیکلینه چیخدی، گویچگ اُلدو. اُلدو آی‌پارسونون نَنَه‌سی. قیزینَن آروادودا سالدولا دوستاقا. تاجر سفردَن گَلدی، گُردو که بَعله، قیزی شاه اوغلویونان توی آیئلَه‌ییب، آروادونودا که فیکر اِئلیردی دوشوب قویویا اُلوب، دیریلیب‌دی. آیروشدان خوش اُلدولا، جشن دوتدولا، شادلوق اِئلَه‌دیله.
انشاءالله اُخویانلاروموز، اِئشیدَنلَریمیزده شاد و خوشحال اُلسونلا.
هامونون ساغلوقونا
#گلخندان_نقیللری
#عظیم_سرودلیر
#گلخندان_نقیللری
سَمَنبَر قازانو قئینَد(۱)
(یازان: عظیم سرودلیر)
بیر کیشی وارودو کوسه‌لی‌ده، آروادونون آدو سَمَنبَریدی. کیشی بیر گؤن گِئدیردی سوبَی هامماراسوندا جؤت سؤره. شاققول کندی یانوندان گِئچنده، گُردو ایککی دَنَه قورد، بیری اَرکَگ بیری دیشی، چیری چیلپاق گیریبله باش گُولده چیمیلله.
قوردلار کیشینی گُرنده، دؤشدؤله پَرَن پَرَنه، بیری بویاندان قاچدو، بیری اُیاندان. کیشی قاققوللاددو گؤلدؤ، دِئدی:
- داها قاچایوز، قاچمویایوز، بیله‌ایزی گُردوم. گٍئده‌جه‌گَم کندده دِئیَم، بدلام اِئلییَم بیله‌ایزی.
اَرکگ قورد دِئدی:
- گِئدیب دِئمه. دِئسئَی بیزیم آبروموز گِئدَر. اَیَه گِئدیب دِئمه‌سی، من هر نِچچه گؤننَن بیر، بیردَنه داواردان، جیراننان، شکار اِئلَه‌رَم گتیررَم حیط‌ایزین دوفاروننان آتارام ایچه‌ری، بیر یاواشجه‌دَه اولارام، سن بیللَی گَلیب آپاروب باشونو کسیب، دریسینی سویوب اَتینی یِیَرایز.
کیشی دِئدی:
- یاخچو. گِئدیب دِئمَم.
اُ گؤندن سورا باشلاندو. قورد هر نِچچه گؤندن بیر داواردان، جیراندان زاددان دوتوردو، گتیریردی، کیشینین دوفاروندان آتوردو ایچه‌ری، بیر بالاجا اولوردو گِئدیردی. کیشی‌ده دوروب باشونو کسیردی، دریسینی سُیوردو، اَتینی، جیگیرینی، بِوره‌گینی گتیریردی، سَمَنبرینَن پیشیریردیله، یِئیِردیله.
گؤنلرین بیر گؤنونده، سَمَنبَر گِئچدی اَرینین یاخاسونا:
- دی گُروم بو نچچه گؤندن بیر شکار گتیرمَگ ماجراسو نمه‌دی؟
دالو وار.....
#گلخندان_نقیللری
#بیری_واروموش_بیری_یوخوموش
#عظیم_سرودلیر
گلخندان_نقیللری
سمنبر قازانو قئینَد (۲)
کیشی بُیون گلمه‌دی. آما سَمَنبَر اَل چِئکمه‌دی. اُقد دِئدی‌دِئدی که کیشی ذیللَه‌هه گلدی، قوردلارون چیلپاخلانوب چیممگ‌لرینی آروادونا دِئدی. اُیاندان دِئمه‌کی اَرکگ قورد گلیب شیکارو آتاندان سورا گِئدیب یاتوب کیشینین پاجاسو یانوندا قولاق آسورو. اِئله‌کی کیشی اولارون سِرلرینی دِئجگ قورد باشونو پاجادان ساللادو ایچه‌ری دِئدی:
- قادام گُزویه کیشی! اَیَه گَللَی چُلَه دِئیَه‌رم بیلَه‌یه!
کیشی باشلادو تیتیره‌مه‌گی، چیغیردی سَمَنبرین باشونا:
- قورتولدوی! ایننی بوننان بِئله نه اَتدن خبر اولاجاق، نه من چُله چیخه‌بیله‌جَگَم! سنده قال آج و سوسوز!
گؤنلر گلدی گِئچدی، بیر گؤن ، بِش گؤن، اُن گؤن، سَمَنبر گُردو داها اِئوده هِئچ زاد تاپولمورو یِئیَه‌له، آجوندان اُلوللَه. گؤج گلدی کیشی‌یه:
- دور چبخ چُله! بوجورلوقونان که باشا گِئدمز! قوردلارون داها یادلاروندان چیخیب گِئدیب، قُرخماگینَن!
خلاصه که گوجونَن کیشینی چوخاددو چُلَه. کیشی دوردو، قورخا قورخا، جوتو باغلادو، تُخوم جُوالونا بوغدا تُکدو، آتدو چیگنینه، سیغیرلری قاتدو قاباقونا، دؤشدؤ یولا گِئددی سوبی هامماراسونا سارو باشلادو جؤت سؤرمه‌گی.
کیشی جؤتؤنَن بیر ایککی باش گِئدیب گلمیشدی که گُردؤ بیر تؤلکؤ گلیری. تؤلکؤ گلدی کیشی‌یه آللاه قُوات وِئرسین دِئدی و کیشی‌دن سُروشدو:
- کنداییِزده نه خبر؟
کیشی دِئدی:
- سَنَه یاخچو خبر یوخوم.
تؤلکؤنؤن بیر آز اَل آیاقو چاشدو، سُروشدو:
- مَیَه نمه اُلوب؟
کیشی بیر آز اؤز گُزؤنؤ چِئکیشدیردی، دِئدی:
شاه آداملارو گلیب کوسه‌لی‌لَردن کؤمگ ایسته‌ییبله که گَله‌لَه چولده هرنه تؤلکؤ وار دوتالا آپارالا دریلرینی سویالا شاها پَلتِو دؤزَلده‌لَه.
تؤلکؤنؤن اؤزؤندن رنگی قاچدو، بدنینَه تیتیردمه دؤشدؤ، دِئدی:
- بس من نیلییِم؟ سن‌آللاه منه بیر یول یولاخ گُرسَد.
کیشی بیر آز نازلاندو، دِئدی:
- چون سنئینَن قدیم یولداشوق، من سَنَه بیر فیکیر چِئکَه‌رَم. گِئدگینن بیر نِچچه دَنَه سؤپؤرگه پوتاسو یون گَتیر تا دِئییم نمه‌اِئله.
دالو وار ....
#بیری_واروموش_بیری_یوخوموش
#گلخندان_نقیللری
#گلخندان_نقیللری
سمنبر قازانو قییند (۳)
تؤلکؤ گِئددی بیر نچچه‌دَنَه سؤپؤرگه پوتاسو یوندو گَتیردی. کیشی دِئدی
- خوب! قویروقویو اوزاد منه سارو.
تؤلکؤ قویروقونو اوزاددو کیشیه سارو. کیشی جیبیندن بیر آز پَرک چوخاددو، پوتالارو باغلادو تؤلکؤنؤن قویروقونا. تؤلکؤیه دِئدی:
- ایننی گِئد اُ تورپاخلوقدا آتول اُیاندان بویانا، بویاندان اُیانا، توزتورپاق قوزانسو، داهو مأمورلار گلنده سَنئی گُرمه‌سینله.
تؤلکؤده ایناندو، گِئددی باشلادو توزتوزاناق ایله‌مه‌گی. بوننایودو که قوردون باش قولاقو گُرسَننی. گلدی بیر آز قالموشدو چاتا کیشی‌یه، بیر اوزون اولادو دِئدی:
- یاخچو گَلدئی گیریمه! گِئدیب منیم‌نَن آروادوم سیررینی آروادویا تعریفلیرئَی! بِئله قولاق تُوو وِئریم بیله‌یه که داهو بو ایشلردن گُرمویَی!
کیشی قاققوللاددو گؤلدؤ، دِئدی:
- سن اوّل اُز جانویا بیر فیکیر چِئک، اوننان سورا گل منیم سُراغوما.
قورد دِئدی:
- مَیَه اُز جانوما نَمَه اُلوب که بیله‌سینه فیکیر چِئکَم؟
کیشی دیدی:
- اُ توزتوزاناقا بیر باخ! هِئچ بیلیرئی اُ نمه‌دی؟
قورد دِئدی:
- اُدا بیر جین توزاناقودو که گؤنده بو چولده وار.
کیشی دِئدی:
- یوخ، اُجور دَئگیل. اُ آتلولار توز توزانوقودو که قِوزانوب. کوسه‌لی‌لَر گِئدیب شاها شکایت اِئلی‌یِبله که بیزیم چُلوموزده ایککی‌دَنه قورد عمله گَلیب‌لَه. گؤنده‌گؤنده گَلیب داوارلاروموزو اُغورلایوب آپاروللا. شاه‌دا مأمور گؤننَریب که گَلَه‌لَه سیزی دوتالا آپارالا، حیسسابویوزا چاتالا.
قورد دؤشدؤ تیتیرَدمی‌یَه باشلادو کیشی‌یَه یالوار‌یاخار اِئلَه‌مَه‌گی. کیشی دِئدی:
- چوخ یاخچو. دؤزدؤ که سَن گَلمیش‌ئَی منی پارالویای ولی اَیه قول وِئرئَی که بوندان بِئلَه دؤز عَمَللی تَرپَنئَی منده سَنئی جانویو قورتاررام.
قورد قُوُل وِئردی. کیشی دِئدی:
- خوب هَلَه‌کی قُوُل وِئردئی، گِئد گیر اُ منیم تُخوم جُوالوما، باشویودا چِئک ایچَه‌ری، گیزلَد. آتلولار بورا چاتاندا، مننَن سُروشاللا. من دِئیَه‌رَم اُ قوردلار بو چولدَن گِئدیبلَه. اَیَه سُروشدولا جُوالداکی نَمه‌دی، دِئیَه‌رَم تُخومنو.
قورد بِئچارادا ایناندو، گِئددی گیردی جُوالا، باشونودا چِئکدی ایچَه‌ری. کیشی گَلدی تُربانون آغزونو موحکم باغلادو. جوتو آچدو، گَلدی تؤلکؤ یانونا دِئدی:
- داها بَسدی. من دولت مأمورلارونو باشدان آچدوم گِئددیله. اَیَه قول وِئرئَی کوسه‌لو تُوُق خروزلارونا دَئگیب دولاشمویای، بوننان بِئلَه‌دَه مأمورلار گَلَننَه قویمام گَلَه‌لَه سَن اولان یِئرَه.
تؤلکؤ قُوُل وِئردی. کیشی‌دَه پَرک‌لَری قیردی سؤپؤرگَه پوتالارونو تؤلکؤنؤن قویروقوننان آچدو، تؤلکؤنؤ بیراخدو گِئددی. قِئیِددی گَلدی قوردو جوال ایچینده آتدو سیقیرلَرین بیریسینین اؤستؤنه دؤشدؤ یولا ، کنده سارو.
کیشی گَلدی حَیَطه گیرنده سَسلندی:
- سَمَنبر قازانو قئینَد!
سَمنبر قازانو آسدو اُجاقا، گِئددی چایدان سو گَئتیردی قازانون ایچینی دُلدوردو اجاقون آستونو یاننوردو. قازانون سویو قئیناقا دوشنده، آروادونان کیشی اَل اَله وِئردیله، قوردو جوالونان گُتؤردوله باسدولا قازان ایچینه، باشلادولا تاپلاماقو. بیر یاندان داغ سو، بیر یاندان دؤگَه‌جگ دؤگمَه‌گی قوردو دَریدن چوخاددو. قورد لاپ دَریدن چیخندن سورا کیشی جووالون آغزونو آچدولا، قورد چیخدی ایننی قاچمای هاچان قاچارای؟ حَیَط قاپوسوندان چیخنده قِئیِددی باخدو کیشی‌یَه، دِئدی:
- قادام گُزویه.
دالو وار....
#بیری_واروموش_بیری_یوخوموش
#گلخندان_نقیللری
#عظیم_سرودلیر
#گلخندان_نقیللری
سمنبر قازانو قئینَد(۴)
کیشی گَنَه قالدو اِئوده چُلَه چیخاجاقو اُلمادو. گَنَه بیر گؤن سَمَنبر بیله‌سینه گوج گَلدی:
- دور چیخ چُلَه!
کیشی ناچار قالدو دوردو سیقیرلری چوخاتدو. جوتو قُشدو، دؤشدؤ یولا که گِئدَه سوبَی هامماراسوندا یِئر سؤرَه. گِئد‌ها‌گِئد، شاققول‌کندی جنگلینه چاتار چاتماز، گُردو بیر سورو قورد گَلیری. دَریدَن چیخمیش قورد گِئدیب همدان اولکهَ‌سینده هر نَمه قورد وارودو ییغیب گَتیرمیشدی.
کیشی باخدو گُردو آراسا داردو، قاچدو یاپوشدو چینارلارون بیریسیندن، دیرماشدو گِئددی یوخارو. قوردلار گَلدیله ییغیشدیله چینارون دِورونه. هی فیکیر‌هافیکیر، دریدَن چیخن قورد دِئدی:
- من یاتارام آغاج دیبینده یِئرَه، سیزده آتولون چیخین منیم دالومنا بیربیر اؤستؤنه تا گِئدین چاتون کیشی‌یَه، بیله‌سینی دوتون گَتیرین آششاقو پارالایون یِئیین. اُزو یاتدو، قوردلاردا بیری آتولدو اُنون اؤستؤنه، اُبیریسی اُنون اؤستؤنه گِئددیله یوخارو. بیر دَنَه‌دَه قورد قالموشدو چاتالا کیشی‌یَه که کیشی آغاج باشوندان چیغیردی:
- سَمَنبر قازانو قئینَد!
آستا یاتان قورد که بیلیردی بو سُز نَمَه‌دی آستان پارتدو قاچدو. اُبیریسی قوردلار تیلیپ تیلیپ تُکولدولَه بیربیر اؤستؤنه، گُردؤلَه اُلارو چاقوروب گَتیرَن قورد قاچورو، اُلاردا دؤشدؤلَه قاچاقا، ایننی قاچمای هاچان قاچارای!
قوردلار قاچاندان سورا، کیشی اَندی گَلدی گِئددی جوتو دالوجه.
داستانوموز بوردا قورتولدو، سیزئی ساغلوقویوز هَممَه‌شه‌لیگ اولسون
قالون ساغلوقونان
#بیری_واروموش_بیری_یوخوموش
#گلخندان_نقیللری
#عظیم_سرودلیر
آدام‌زاد نقیلی (۱)
نقیل دِئیَن: جناب آقای مهدی آغال (از روستای گلخندان )
بیری واروموش، بیری یُخوموش. بیر گؤن بیر نفر آتونان بیر کنددَن گِئچیردی، گُردو بیر بُیوگ اُدون تایاسو دؤزَلدیبله. تایانون باشوندادا بیر دَنَه تلیس (سبد) قُیوبلا. ایستیلله اُ تلیسین ایچیننه‌کینی یاننورالا.
بیر نفردن سُرشدو:
- بوردا نه‌خبردی؟
اُ آدام دِئدی:
- بو تلیس ایچیننه بیر دَنه ایلان وار. بو ایلان نِچچه وختی خالخون داوار مالونو سانجورو. بیزده ایننی‌یَه‌جه بونو تاپا بیلمیردیگ. بوگؤن بیله‌سینی گیره سالموشوق. بیر دَنه‌دَه اینه‌گی بو گؤن چالوب. بیز ایستیریگ بونو اُتلویاق.
آتلو دِئدی:
- بابا، تارونون حیوانونو بوشلایون چیخسین گِئدسین. بیله‌سینه اذیت اِئلَه‌مه‌یین. ایلانون خاصیتی سانجماخدودا. اِئلَه بیر بو دَئگیل که، عقرب‌دَه سانجار. بودا بولارون عادتی‌دی.
دِئدیلَه:
- اَللی بِئلَه‌دَه دِئیَی بیز بونو اُتلویاجایوق. ایننی هرنمه سَن دِئسئَی قولاقوموزا گیرَن دَئگیل.
دِئدی:
- بابا، اذیت اِئلَه‌مه‌یین، بیراخون چیخسین گِئدسین.
دِئدیله:
- سَن چیخ گِئد ایشئی اُلماسون.
دالو وار...
#گلخندان_نقیللری
#عظیم_سرودلیر
#گلخندان_نقیللری
آدام‌زاد نقیلی (۲)
آتلو ایککی اؤچ دفعه دولاندو تایانون دِورونه، اَلینی آتدو سبدی گُتؤردؤ قویدو آتونون زینی اؤستؤنه میداننان چاپدوردو قاچدو. های دوتون! های قویمایون گِئدَه! دوتون بیلَه‌سینی! آتلو چیخدی گِئددی. بیر آغاج آرالاناندان سورا، سبدین قاپاقونو گُتؤردو، ایلانا دِئدی:
- ایلان جان! خوش گَلدئی! آللاه بیلئَی‌جه. آما داها خالخون داوار مالونو سانجمویای ها!
ایلان اِئلَه‌که سبد ایچیندن چیخَنده، دولاشدو آتون بوینونا، کیشی‌یَه دِئدی:
- ایندی دِء گُروم آتویو چالوم یا اُزویو؟
آتلو دِئدی:
- ای بابا! من سَنی اوتدان قورتارموشام! اُلومدَن قورتارموشام! الآن گَرگیدی سَنئی دُرد بِئش کیلو یاغویو دوتالا اُردا! نیجه یانو اُزویو سانجوم یا آتویو؟
ایلان دِئدی:
- سَن اُزوی دِئمیش‌ئَی که ایلانون عادتی سانجماخدو. آدام‌زادادا یاخچولوق گَلمَه‌ییب. ایندی دِء گُروم اُزویو سانجوم یا آتویو؟
آتلو دِئدی:
- بوجور که اُلماز، قوی بَس بیر ایککی نفردن سُروشاق گُرَگ اُلار نمه دِئیِلله.
گِئددیلَه یولدا چاتدولا بولاغا. گُردولَه بولاغ داش گُزوندن جُشوب گَلیری بیر زلال سو وار دورنا گُزو تَکی. بولاغا دِئدیلَه بیر بوجور سُز گَپ وار. آتلو دِئدی:
- من بو ایلانو اُلومدَن قورتارموشام، ایننی دِئیِری اُزویو سانجوم یا آتویو. ایلان‌دا دِئیِری آدام‌زادا یاخچولوق گَلمه‌ییب. بولاغ دِئدی:
- واللاه آدام‌زادا یاخچولوخ گلیب یا گلمی‌ییب، من بیلمیرم. ولی خوب، آدام‌زاد گَلیری، منیم سویوم‌دان ایچیری، اَل اؤزؤنؤ یوورو، آخوردادا گِئدَن‌دَه، بورنونو آرودورو یا طهارات دوتورو منی بولورو گِئدیری. من بونو گُرموشَم آدام‌زاددان.
ایلان کیشی‌یَه دِئدی:
- گُردوی! سندَن‌دَه یاخچو تعریفلَه‌میری. گُردوی دِئدیم آدام‌زادا یاخچولوق گَلمی‌ییب، گَرَگ بیرئیزی سانجام!
آتلو دِئدی:
- شاید بو بولاخ دؤز دانوشمورو، سویو زادو خَرَه‌لَه‌نیب، اُز حالوننا دَئگیل. گَل گِئدَگ بیر آیرو زادونان صلاحلاشاق!
ایلان دِئدی:
- گِچ گِئدَگ!
دالو وار...
#گلخندان_نقیللری
#عظیم_سرودلیر
#گلخندان_نقیللری
آدام‌راد نقیلی (۳)
نقیل دِئیَن: مهدی آغال گلخندان کندیندن
گِئددیله گِئددیله، گُردولَه یول قیراقوننا بیر دَنَه بُیوگ آغاج وار، قشنگ کؤلگَه سالوب. چاتدولا آغاجا. آدام زاد دِئدی:
- آغاج جان سَن بیزه قاضی‌لیگ اِئلَه! من بو ایلانو اُلومنَن قورتارموشام، ایننی بو دِئیِری آدام‌زادا یاخچولوق گَلمی‌ییب، ایستیری منی سانجا. سَن دِئگینَن بیز نَمه اِئلییَگ.
آغاج دِئدی:
- واللا، آدام‌زادا یاخچولوق گَلیب یا گَلمی‌ییب، اُنو مَن بیلمیرم. آدام‌زاد گَلَر منیم کؤلگَم آستوننا اُتورار، بارومنان استفاده اِئلَر، یاتار یورقونلوقو چیخار، دوروب گِئدنده، شاخامودا سیندیرَر اُزونه اَل آغاجو اِئلَر و چیخر گِئدَر.
ایلان دِئدی:
- هَه! گُرورئَی؟ سَنی دِئیِری‌‌ها!
اِئلَه آز قالموشدو که ایلان آتلونو سانجا، گُردولَه اُیاننان بیر دَنه تؤلکؤ چیخدی. آتلو دِئدی:
- تؤلکؤ جان! قادای آلوم، گَه‌بورا! گَه‌بورا!
تؤلکؤ دِئدی:
- نَه خبردی؟ نَمه اِئلیریئیز؟
آتلو دِئدی:
- واللا من بونو اُلومنَن قورتاردوم، بونو ایستیردیله بو سبدده پیشیرَه‌لَه. من بونو گَتیریب بیراخاندا، بو دولاشوب آتومون بوینونا، دِئیِری اُزویو سانجوم یا آتویو؟ اُزوده مَنه دِئیِری آدام‌زادا یاخچولوق گَلمی‌ییب. سَن قاضی‌لیگ اِئلَه!
تؤلکؤ دِئدی:
- آدام‌زادا یاخچولوق گَلیب یا گَلمی‌ییب، بونو من بیلمیرَم. ولی بو ایلان یالان دِئیِری.
ایلان دِئدی:
- نیجه من یالان دِئیِرَم؟
تؤلکؤ دِئدی:
- سَن بو اوزونلوقدا نَجور بو سبد ایچینده یِئر اُلدوی؟
ایلان دِئدی:
- یِئر اُلدومنا.
تؤلکؤ دِئدی:
- گِئچ گیر گُروم سبد‌دَه نجور یِئر اُلدوی!
ایلان اِئلَه گِئچدی سبدده غلبیر وُردو ییغیلدی، ییغیلدی، اِئلَه که قویروقودا گِئچدی سبدایچینه، تؤلکؤ آتلویا دِئدی:
- نِئیَه دورموشای؟ باس سبدین قاپاقونو آغزونا. گِئد بیردَنَه‌دَه بُیوگ داش گَتیر وُر سبد‌اینَن ایلان اَزیلسین قاروشسون بیربیرینه.
آتلو سبدین قاپاقونو قُیدو، گِئددی بیر بُیوگ قَیَه گَتیردی، وُردو سبد‌اینَن ایلان اَزیلدی قاروشدو بیربیرینه. تؤلکؤ دِئدی:
- قویایدوی پیشیرَیدیله بیلَه‌سینی. مَیَه بِئکارودی که اُزویه ایش دؤزَلدمیش‌ئَی!
آتلو دِئدی:
- بودا بیر اشتباهودو که من اِئلَه‌دیم.
آتلویونان تؤلکؤ گُروشددولَه، اُپوشدولَه، بیری گِئددی گؤن باتانا سارو، بیر گِئددی گؤن چالانا سارو. آدام‌زاد بیر آز آرالانموشدو، قانشارونا بیر شکارچو چیخدی. شکارچو آتلودان سُروشدو:
- بویاندا بیر تؤلکؤ گؤرمَه‌دئی؟
آدام‌زاد دِئدی:
- نِئیَه اُدو گِئدیری.
شکارچو گِئددی قاراقولا، تفنگ سَسلَه‌نَندَه، تؤلکؤ آتولدو اُیاندان بویانا، بویاندان اُیانا، گؤللَه دَیمَه‌دی بیلَه‌سینه. باخدو کیشی‌یَه، دِئدی:
- اِئلَه بودو که ایلان دِئیِردی آدام‌زادا یاخچولوق گَلمی‌ییب آما من اینانموردوم.
نقیلیمیز بوردا تؤکندی، انشاءالله هاموموز یاخچو اولاق، داها دِئمَه‌سینله که آدام‌زادا یاخچولوق گَلمی‌ییب. بودو که حکیم تیلیم‌خان بویوروب:
دُلدور ایچیم ساقی می مستانه
گِئدَر می ایچَن‌لَر می‌خانا قالور
گِئچَر بو دونیانون یاخچو یامانو
قالسا بیر یاخچولوق انسانا قالور
هامویوزون ساغلوقویوزا
#گلخندان_نقیللری
#عظیم_سرودلیر
#گلخندان_نقیللری
دُققوز پارا بازلاماج یِئیَن قیز (۱)
( نقیل دِئیَن: بانو فاطمه محمدی سیّار همسر زنده‌یاد محمد‌آقا رضایی‌زمان - از روستای چپقلو)
بیری واروموش بیری یُخوموش. آللاه‌دان ساوای هِئچ‌کیم یُخوموش. بیر قیز وارودو، گؤننَه دُققوز و بیر پارا بازلاماج یِئیَردی. بیر گؤننَری یِئیَن‌یِردَه قوناخلارو گَلمیشدی، بوقیز دُققوز بازلاماج یِئمیشدی آما اِئلییَه بیلمه‌میشدی پارا بازلاماجودا یِئیَه. دُققوزونو یِئمیشدی پاراسو قالموشدو. قیز هی گِئددی یازویا، قِئیِددی ایچَه‌ری دِئدی:
- نَنَه! دُققوز پارامو!
نَنَه دِئدی:
- هَلَه گِئد، اُننان!
قیز گِئددی گَنَه قِئیِددی دُققوز پارانو ایسته‌دی. نَنَه دِئدی:
- گِئد، آننان!
قیز گِئددی، گَنَه گَلدی دِئدی:
- نَنَه! دُققوز پارامو!
قوناخ سُروشدو:
- بو قیز نمَه ایستیری؟
آرواد چوخ بیلمیش آروادودو. دِئدی:
- بو قیز گؤننَه دُققوز و بیر پارا گوننَگ پامبوق اَگیرَر. بو گؤننَه‌ری دُققوزونو اَگیریب بیر پاراسو قالوب. ایننی اُ پارا گؤننَگی ایستیری.
قوناخ گِئددی فیکره که بوقیز اَیَه گؤننَه دوققوز و بیر پارا گؤننگ اَگیرَه بونون آلانونون اِئو اِئشیگی قیزل‌دَننی‌دا. اویاننان بویاننان اِئلچی زاد گؤننَردیله، قیز صاحاب دِئدی:
- اولماز. وِئرَه بیلمَگ.
دالو وار ....
#گلخندان_نقیللری
#عظیم_سرودلیر
#گلخندان_نقیللری
دُققوز و پارا بازلاماج یِئیَن قیز (۲)
ایستی‌یَن‌لَر چوخ یالوار یاخارونان، چوخ باشلوق وِئرمَه‌گینَن، قیزی آلدولا، عزت و احترامونان آپاردولا. آپاراننان سورا آلانون مَککیه گِئدمه‌گه آدو چیخدی. کیشی مککیه گِئدمَه‌میش بیر ایلین قوت و غذاسونو آلدو ییغدی اِئوَه. بیر ایلین‌دَه پامموقونو، هر گؤننه دُققوز و بیرپارا گؤننَگ آیاقوننان گَتیردی ییغدی اِئوه، آروادونا دِئدی:
- بو قوت و غذای بودا بیر‌ایلین پامموقو. من گَلین‌جه بو پامموقودا اَگیررَی.
کیشی گِئدَندن سورا، آرواد یِئدی، ایچدی، دُلاننو، پامموقودا اَگیره‌بیلمه‌دی. بیرگؤننَری موشدولوقچو گَلدی که حاجولار چاتوبلا زنگانا. آرواد بِئناوا، اُز اُزونَه دِئدی:
- ایننی من نِیلیِم. یونگ‌لَر قالدو اَگیریلیمَه‌میش.
دؤردؤ گَتیردی چرخی قوردو، بیر آز برک بولاماج پیشیردی، داها وقت اِئلَه‌مَه‌دی بولاماجو ایچَه، گَتیردی یاخدو بو چیگنینَه اُ چیگنینه، بویانونا، اُیانونا، باش قولاقونا، باشلادو پامموقو اَگیرمَه‌گی. چرخ باشلادو گِو‌گِوگِو اِئلَه‌مَه‌گی آرواددا داها اِئلییَه بیلمیردی بولاماجو ایچه، بیر بو چینین‌دَن یالوردو بیر اُ چینین‌دَن دِئیِردی:
- دِئییللَه حاجولار چاتوب زنگانا! دِئییللَه حاجولار چاتوب زنگانا! ...
اُیاندان‌دا، بیزدَن ییلَرین اوشاقونون بوغازونان سؤمؤگ قاچموشدو. هر یِئرَه آپاردولا چوخادا بیلمَه‌دیله. دِئدیلَه بو گَرَگ گؤله تا بو سؤمؤگ بوغازوننان چیخه. هر‌یِئرَه آپاردولا بو اوشاق گؤلمَه‌دی.
گِئددیله پاجادان باخدولا آروادون یونگ اَگیرمَه‌گینه، اوشاق باخجاقون باشلادو گؤلمَه‌گی. اوشاق گؤلَنده سؤمؤگ اوشاقون بوغازوندان آتولدو چُلَه. بیریسی دِئدی:
- گَلین گِئدَگ.
بیریسی دِئدی:
- گِئدَگ گُرَگ بو آرواد نَمییَه بوجؤر اِئلیری.
دُندوله آدام صوراتونا، آروادون گُزونه گُرسندیلَه. بیله‌سیندَن سُروشدولا:
- نَمییَه بوجور اِئلیرئَی؟ نِئیَه بوجؤر اُلموشای سَن؟ نِیَه بو گؤننَه‌یَی سَن؟ ایشئی نَمه‌دی؟ حاجتئی نَمَه‌دی؟
دِئدی:
- جریان بوجؤردؤ.
اُز جریانونو تعریف‌لَه‌دی. بیزدَن ییلَر داراشدولا هرنه خالخون اَگیریلمیش ساپو وارودو ییغدیله گَتیردیله دُلدوردولا بو آروادون اِئوینه، پامموخلارو آپاردولا قویدولا اُلارون یِئرینه.
حاجی گَلدی چاتدو. قوناقونو زادو یولا سالدو، باشلارو آیورد اُلدو، آرواددان سُرشدو:
- پامموخلارو اَگیرمیشئَی؟
آرواد دِئدی:
- هَیَه. اَگیرمیشَم.
حاجی گلدی گُردو آممار دُلو اَگیریلمیش پامموخدو. دِئدی:
- اَلئی آرغوماسون آرواد. بَس بولارو قالو اِئلییَک، گَنَه یِئنگیشدن گِئدیم پامموق آلوم گَتیریم.
بیزدَن ییلَر گُرسَندی‌لَه آروادون گُزونه. دِئدیلَه:
- اِئوئی خاراب اُلماسون. بیز هامونون ساپونو پامموقونان عوض اِئلَه‌میشیگ. بیز داهو بو ایشی گُرَه‌بیلمَگ. بو ایشی داها بوینویا آلما.
آرواد دِئدی:
- بَس نیلییِم؟ نَه‌ایشی گُروم؟
دِئدیلَه:
- کیشی‌یَه دِئگینَن گَل گِئدَگ گُرؤمه.
آرواد دِئدی:
- ایندی اِئلَه بیل گِئددیگ گُرؤمَه.
بیزدَن‌ییلَر دِئدیلَه:
- بیز یولدا ییغیللیگ قارا بِوچؤگ‌لرَ(سوسک‌ها) تکی تَززَگ (پیشگل چارپایان) اؤسته. سن اُرا چاتاننا، اُزویو ساللای آششاقو. یِخیللای بیزیم اؤستؤمؤزَه. دِئیَرئی " آی باجو، خالا، نَنَه!" بیزدَه دِئیَریگ "آی باشویا دُنوم، سَن‌دَه آز قالموشای بیزیم‌تَکی بِوجوگ اُلای!"
آرواد دِئدی:
- یاخچو!
آرواد فتیردَن زاددان یاپدو، خورجونو دُلدؤردؤ فتیرینَن زادونان، کیشی‌اینَن دؤشدؤلَه یولا گِئدَه‌لَه گُرومَه.
گِئددیلَه زمییَه چاتاننا گُردؤلَه قارا بِوجؤگلَر قالانوبلا سیقیر تَززَه‌گینین اؤستؤنَه. بویاننان آشوللا اُیانا، اُیاننان بویانا. آرواد اُزؤنؤ اِئششَگ‌دَن سالدو آششاقو. باشلادو شیون واویلانو:
- آی خالا‌جان! آی باجوجان! آی نَنَه‌جان!
بیزدَن ییلَر‌دَه باشلادولا شیون واویلانو:
- جانوم چیخسین بالام! جانوم چیخسین باجوم، ... سن‌دَه آز قالموشای بیزیم‌تَکی بِوجوگ اُلای.
حاجو قورخدو، سُرشدو:
- بولار داها نَمَه‌دی‌لَه؟
آرواد دِئدی:
- بولاردا اِئلَه منیم تَکین‌ایدیله. بولاردا گؤننَه دُققوز بیر پارا گؤننَگ اَگیریبدیله. ایننی بوجور اُلوبلا.
حاجی دِئدی:
- آرواد! داهو بو ایشی گُرمَم. اِئلَه اُنو که اَگیرمیش‌اَی منیم یِئددی پوشتوماجه بَسدی. گرَگمَز دَئگیل منیم آروادوم بِوجؤگ اولا.
اِئولرینه قِئییدنده، پامموقو زادو ییغشیدیردیله قویدولا اُیانا، یِئدیلَه ایچدیلَه مطلب‌لَرینه یِئتیشدیله.
صلوات بر محمد و آل محمد
#گلخندان_نقیللری
#عظیم_سرودلیر