#برار_نازنین_خواخر_ته_قرون #اربعین_دلگویه_مازنی 🏴🥀🏴🥀🏴🥀🏴🥀 بـرارِ نـازنین خـواخر تِـه قِـروون ته قبرهَسّه کِمین خواخرته قروون کمین قبر ره وِنِه کَشه بَهیرم اَنـه نـاله بَـزنم تـا بَـمیرم خبـر دارنی مـه دل تِسّه کبـابه؟ برارجان مه سلام چه بی جوابه مه یاد دَربُورده که ته سر ندارنی بِـرار جان تِه سر و حنجر نـدارنی برارجان مـره ایـن چه سرگـذشته هرچی که غم دره مه سینه مَشتِه برارجان کاش که من نَهیبوم عَمّه چتی شـه دل دَکِــنم اَنِّــه غَــمّه؟ تِه که بُوردی خـواخر آواره بَیّـه بِــرار تِـوِسّه مِـه دل پــاره بَیّـه غــریب کــربـلا وطـن نِـداشتی خواخِـر بَمیره که کفن نداشتی چهل روز آزگار خواخرته قـروون ته سرنیزه سوارخواخرته قروون اَمان ازشام اَمان از شام بازار اَمــان از مــردمان مـردم آزار بــلا پشـت بــلا بَــدیمه بــرار بــدتـر از کــربلا بَــدیمه بـرار چـی بَهـووم تـه دل شـه پُـرِ درده اَمه جاهرچی شام خواسه هاکرده مه دِل دُونّی کِجه بَهییه کباب؟ بَــوردنـه مِـره مجلـس شـراب هرچی خواسِّنه مره داغ بزونه شه تَشِ کینه ره مه باغ بزونه دیگه قفل دِهُـونّه وا هاکنه یزیده همونجه رِسوا هاکنه از داغ تـه اگـرچـه زار بـزومه ته مظلومی ره برار جاربزومه خِـطابه بَخونِّسـمه علـی وار بِنـالسّنه مــردم تِسّـه زار زار چی بَهووم تِـره از مــردم شـام برار اونجه مِـه عُمر بَهییه تمام تِــه تِکّـه خِیـزَرون رُوشـتِه بمیرم تِه دَندون اِمو خون روشته بمیرم ته بِشکسّه سرره چو زو مِه پَلی یـزیـد نــانجیب لُــو زو مِـه پَلی ته رِز رِزه وَچُــونّه لَــت کَشـینه یتیـمون خَلـه خجـالت کَشـینه یــزیـد دَیّـه مـِه داغّه تـازه کرده ربـــابِ بِـــرمـه مِــه دِلّـه بَورده مِه سرگذشت بَهییه بسکه جانکاه مِــه دلِ دَرده بنـــالِسّـه «مـداح» 🏴🥀🏴🥀🏴🥀🏴🥀 #شعر_علی_اکبر_اسفندیار_مداح