زبانحال امام موسی کاظم ع #جدید غریب اولسامدا اولدوم لطفویله آشنا یارب منه خوشدور بو محبس ده، بئله حال و هوا یارب الهی شکر اولا درگاهیوه هر بیر نَفَس مندن که نفس و جسم و جان اولموش منه سندن عطا یارب اولا هر نه عنایت آستانیندن منه خوشدور سعادت دیر منه سن گوندرن جام بلا یارب منی زنجیر عشقیندیر چکیب دیر محبسه اما تمام قیدلردن اولموشام یکسر رها یارب عبادت ائتماقا بو گوشه زندان، بهشتیم دیر وئره ر ذکرین بو داغلی قلبیمه شور و صفا یارب قرانلوق دیر یئریم اما تجلیگاه عشقین دیر تاپار آیینه قلبیم وصالوندن جلا یارب خدایا لطفیویله بو مکاندا راضی اول مندن رضایم هر نه بیر امر اولسا سندن اقتضا یارب منه رحم ائله که سندن اولان احسانه محتاجم فقیرم، مستکینم، مستجیرم، هکذا یارب حریم رحمتین دن وای منه اولسام اگر مهجور چتین دیر منت اغیاره اوللام مبتلا یارب سنین عشقینله انسانه، همیشه شان و عزت وار اسیرم عشقیوه قویما اولوم سندن جدا یارب بلا و صبر سندن دور قصور و عجز مندن دیر منه سنسن مسیر ابتلاده، رهنما یارب منی آیری سالانماز سن دیین یولدان ملامت لر وارام اوز عهدیمه هر قدر اولا ظلم و جفا یارب هدایت سنده دور یارب ، کیمه شامل اولا لطفون تذل من تشا سنسن، تعز من تشا، یارب مدبرسن جهاندا عالم تکوین و تشریعه شریکین یوخ دیلیم اقرار ائدیر صبح و مسا یارب بش اون گونلوق بو دنیانین بیزه سندندی احسانی فقط سنسن که وار ذاتینده مصداق بقا یارب حیات و عمر سندن دیر، اجل سندن مقدر دیر هامی فانی دی سنسن، ابتدا و انتهای یارب منه از بس جسارت ائیلییور زنداندا زندانبان گتوردی جانه غم یورودی منی دار فنا یارب تواندان دوشموشم زهر جفا ائیلیوب منه تاثیر اجل مشتاقیم هیچ ایستمیر گویلوم شفا یارب بو خسته روحیمین تنها سنسن وصلوندی درمانی منی قورتار داخی ای قاضی یوم جزا یارب غریبم خسته یم بیر دادرس یوخ دیر من زاره خوشام بالینیمه گلسه اگر اوغلوم رضا یارب گرفتارم بو غربت ده اسیر دشمنم نیلیوم قالیب حسرت وطنده بیر نئچه نازلی بالا یارب سنه وابسته یم هرفعلیده ، امر مشیت دن یانیب صبر ائیلرم قیزلاریم ائتسه آه و وا یارب دوشوبدور گویلومه یثرب قالیب گوز یولدا قیزلاریم اورکده وار بو محنتدن ساغالماز بیر یارا یارب اولا گر باشیم اوستونده ئولنده قیزلاریم اوخشار نه چاره دشمنیم بیرحم دیر ائتمیر حیا یارب سنین عشقونده یارب خوشدی گر رنج و بلا چکسم ولی بو گوشه زندان اولانماز کربلا یارب