#عزا_آیی
#محرم
محرم گلدی دوران تازه لندی
عزای شاه عطشان تازه لندی
گلیر سس هر طرفدن وای حسین وای
دئیور اها عزا ایوای حسین وای
نه وار بو آی باتیب عالم عزایه
گلیب یئر گوی بو ماتمده نوایه
حسین گلدی یئتیشدی کربلایه
او چولده عهد و پیمان تازه لندی
دامارلاردا گلیب دیر جوشه قانلار
حسینیم وای دییللر نوحه خوانلار
ورور سینه ائدیر ناله جوانلار
سینیق دیل لرده افغان تازه لندی
بو آی گئچدی شه دین اکبریندن
اوجا بوی قارداشیندان اصغریندن
ولی ال چکمدی اوز باوریندن-
نقدری ظلم عدوان تازه لندی
بو آیدا دین حق تاپدی وجاهت
حسین نوش ائیلدی جام شهادت
وئریب باش ائتمدی ظلمیله بیعت
بو آی معیار و میزان تازه لندی
بو آی شمس امامت تاپدی تکثیر
حسین قانیله عشقی ائتدی تفسیر
جهاد ائتدی وئریب دنیایه تغییر
مسیر کوی جانان تازه لندی
محرم دیر هامی سسلیر حسینی
حسین سسلیر ولی هل من معینی
آچیب مقتلده دانشگاه دینی
رضای حقه عنوان تازه لندی
بو آی تفسیر اولوب انا فدیناه
قالیب حیران بو سرّه ماسوالله
شهید اولدی اولا تا امت آگاه
بیر عالم درده درمان تازه لندی
بو آیدا اهل زور و ذلت ئولدی
اسیر نفس و ملک و شهوت ئولدی
حقیقت زنده قالدی بدعت ئولدی
کلام حقّیده جان تازه لندی
بو آی گل ناله و افغانه شیعه
قرا گیی شاه مظلومانه شیعه
قولاق وئر نغمه قرانه شیعه
اورکده عشق و ایمان تازه لندی
بو آیدا حضرت پیغمبر آغلار
ائدر ناله بتول اطهر آغلار
"چکر قیها قیامت محشر آغلار"
اورکده آه سوزان تازه لندی
بو آیدا سو یولی باغلاندی شیعه
عطشدن خردا قیزلار یاندی شیعه
باخیب سقا سوا اودلاندی شیعه
گوورب هر لحظه بحران تازه لندی
گوروب بو حالی جانه دویدی سقا
گلیب الده علم عرض ائتدی شاها
منه وئر اذن میدان یا بن زهرا
داریخیدیم دردیم هر آن تازه لندی
باخیب قارداشینه حسرتله اول شاه
صورا اخیامه باخدی چکدی بیر آه
بویوردی گئت سنه یار اولسون الله
او تشنه شیریده جان تازه لندی
آلیب اذن جهاد اولدی مهیا
گلیب سو آلماقا لب تشنه دریا
سالیب دیر عرصه میدانه غوغا
فرات اوستونده طوفان تازه لندی
او شیرین هیبتیندن قاچدی لشگر
فراته ووردی پرچم اول دلاور
سو موج ائتدوقجا یاده دوشدی اصغر
قوری مشکینده احسان تازه لندی
سودان دولدوری مشگین دیلده افغان
سو یالواردی گل ایچ قالما لب عطشان
دئدی نفسیم اماندیر ائتمه طغیان
گوزونده ابر نیسان تازه لندی
عطش دن گر چی سولمیشدی گل یاس
حسینسیز ایچمدی بیر قطره عباس
محکدن چیخدی کامل اشجع الناس
عیار دُرّ غلطان تازه لندی
خیامه عزم ائدیب سردار همت
گوزتلیر مشکینی اول کان غیرت
کمان لار سس سسه وئردی او ساعت
جداله بیرده فرمان تازه لندی
یاغیش تک یاغدی اوخ صبری تالاندی
دگنده مشگینه اوخ قلبی یاندی
سو آخدیقجا اورک قانی جالاندی
اورکده درد پنهان تازه لندی
جفادن قول قلم اولدی سینیب باش
باخیب حسرتله مشکه توکدی قانیاش
خیامه دوتدی یوز سسلندی قارداش
یئتیش امداده هجران تازه لندی
دایانموشدی شه دین تلین اوسته
آلیب قارداش سسین اول دل شکسته
گلیب گوردی ییخلمیش زار و خسته
غم و اندوه یاران تازه لندی
دیدی قربانین اولام یاتما قارداش
منی گوزدن بو ساعت آتما قادراش
ایاقه دور منی آغلاتما قارداش
نئجه گور گوزده باران تازه لندی
باخیب سقایه بحر غم ائدیب جوش
او قولسوز جسمیله اولدی هم آغوش
قلم یازدیقجا ائتدی ناله #مدهوش
ردیف عشقه عنوان تازه لندی
هوشمند
#مدهوش
#بوی _محرم
کانال اشعار
@hushmand