. درد دل با کربلای معلی اي اوركلردن آلان صبر و قراري كربلا سنده دور يئتمش ايكي عاشق مزاري كربلا هر زمان حسرت چكير توپراقيوه اهل ولا تربتینده واردی هر بیر چاره سیز درده دوا فخر ائدیر عالم اولا سنده یاتان شاهه گدا درس عشقين سنده دور آموزگاري كربلا نه جلالت سنده وار افلاك باش اگميش سنه سنده بیر گول وار جهانی دوندریب دیر گلشنه جانيمز قربان او ششگوشه صفالي مدفنه شوق وصلی الدن آلمیش اختیاری کربلا سنده قان اولدي عطشدن اهل بيتين سينه سي خرد اولوب سنگ جفائیله وفا آئینه سی دفن اولوب توپراقيوه اسرار حق گنجينه سي سنده دور اهل ولا باغ و بهاری کربلا اي مقام و رتبه سی عرشيله همپايه اولان غبطه ائیلیر سنده كي جاه و جلاله آسمان قتلگاهونله قیاس اولسا اگر کل جهان رتبه ده افضلدی وار چوخ اعتباري كربلا قتلگاهون با فضیلت دور مناي كعبه دن سنده وار آرتيق صفا ، سعي و صفاي كعبه دن فيض عظمايه چاتوبسان مقتداي كعبه دن سنده دور عشق اهلينین دار و نداري كربلا وار یئری سقا غمینده قلب عالم قان اولا ويرمدی بير مشك سو سنده عدو بیر جوت قولا راضي اولدون اوخ دگن مشگه اورك قاني دولا ائیله دی شرمنده اوخ اول نامداري كربلا ناقه حقی او گون اهل ضلالت پیله دی بی مروتلر اولوب ال بیر ، جنایت ائیله دی بیلمیرم قولسوز گوروب عباسی دشمن نیله دی پهلوانین خرداجا اولدی مزاري كربلا سنده عاشورا گوني قانه باتیب اهل وفا قالدي آغلارهم باجي هجرانه، ياندي هم آنا بیر به بیر دوغراندی تیغ کینه آل مصطفا اوخلادی حتی عدو دلسیز شکاری کربلا شیشه آمال زینب دگدی هجران داشینه اوندا کی گوردی عدو رحم ائیلمیر قارداشینه چاره سیز قالدی بیر آز توپراق سووردی باشینه گوردی دوشموش توپراق اوسته شهریاری کربلا گلدی زینب قتلگاهه گوردی بیر باشسيز بدن گون قباقینده قالیب توپراقلار اوسته بیکفن یوخ بدنده صاف یئری دورین آلیب زاغ و زغن یوخدی جسمینده یارالارین شماری کربلا سسلدی بو پاره پیکر نور عینمدور منیم گر چی یالقیزدیر اوزی ، یار و معینمدور منیم کربلا ائله رعائت بو حسینمدور منیم یاخشی ساخلا زینبین یوخ کیمسه یاری کربلا شوق وصلیله قلم "مدهوش" اولوب ائتدی نوا اشک حسرت گوزده باشدا شور دیلده جان آقا جانیمز اولسون او آلتی گوشه لی قبره فدا دلنشین ائیلیر عجب شعر و شعاری کربلا #مدهوش #هوشمند #کربلا