▪️▪️▪️▪️ اوغلی ئولن ننه ✍ شعر از: محمدی ناعم ▪️▪️▪️▪️▪️▪️ دردیله کو به کو گزر اوغلی ئولن ننه برگ خزان کیمی اسَر اوغلی ئولن ننه آخشام چاقی باخار قاپیا قلبی اودلانار دلدن یانیب دوتار شرر اوغلی ئولن ننه قویماز ئولونجه باشه حنا، قلبی یاندیرار آهی ائده ر دله اثر اوغلی ئولن ننه هر سوز باشی بیان ائلیَر اوغلونون آدین چوخ خاطرااتی یاد ائده ر اوغلی ئولن ننه گئتمز طویا اگر اونی کیم دعوت ایلسه گوزیاشینی یوزه اَلَر اوغلی ئولن ننه گلسه بهار گلشنه آغلار غمین اولار بایرامدادا قرا گییَر اوغلی ئولن ننه تک. اگلشر ائوینده یانیب اوخشاما دیَر آهیله دللری دَلَر اوغلی ئولن ننه اولسا الینده چاره سی ترک وطن ائدر غملی دیاریدن کوچــَر اوغلی ئولن ننه هی گون سایار باشا یئتیشه عمری دهریده ئولسه یقیندی دینــجَلـَر اوغلی ئولن ننه گورسه اگر که اوغلونون هر یئرده تای توشون دریایه گوزیاشی دونــَر اوغلی ئولن ننه بیر شمع تک یانیب اَرییــَر جسمی آب اولار تکلیقدا بیر گئجه سُونــَر اوغلی ئولن ننه ««ناعم»»، چتیندی داغ جوان قلب مادره بو غم نه غمدی، تَک بیلــَر اوغلی ئولن ننه ▪️▪️▪️▪️▪️ ⛔️ نشر بدون نام شاعر ممنوع و فاقد رضایت و حلالیت شاعر میباشد. ✍ شعر از: محمدی ناعم