❣نوحه و جوشی - جناب مسلم(ع)❣ گلمَه گلمَه ای شاهِ مشرقین گورمَدیم وفا شهر کوفه ده غُربت ئولکه ده آز قالور اولا مُسلمون فدا شهر کوفه ده ائتدیلر خیانت دیانته نامه لَر یازانلار سنه حسین میهمانیدیم من بو شهریده چوخ ستَملَر اولدی منه حسین نیلیوب منه گور بو کوفیان گَلدی فاطمه شیوَنه حسین گلَه گلَه کفتاریلَر گلوب شیری یخماقا شهر کوفه ده هاردا وار بِله رَسم و قاعده بیر آدامسیزی هر گلن وِرا خسته بیر یارالی غَریبه نی هم گلَن وِرا هَم گِئدن وِرا پَر شکسته تَرلانه اوخشارام توپلاشوبدی زاغ و زَغن وِرا مُسلمون قولون باغلیوبدیلار داش وِرا وِرا شهر کوفه ده آز قالور شهادت زمانیمه عالَم بَقادن گلور نَسیم من وصیَّته گورمَدیم وَصی حَبس اولوبدی بو سینَه ده سَسیم گور نِجه عم اوغلی آدامسیزام سَعدون اوغلی اولدی منیم کَسیم دعوت ایلین یان به یان دوروب ائتمیوب حیا شهر کوفه ده گلمَه ای گُل باغ مصطفی بو جماعتین یوخ مُروَّتی اکبرین او شِبهِ پیمبرین گُل کیمی سولار رَنگِ صورتی قاسمون باتار طُرَّه سی قانا حیف اولار اونون خوش طراوتی بیر ایچیم سو وئرمَزله اصغره قوم اَشقیا شهر کوفه ده قورخورام علمدارووَه حسین اهل کینه مَکرین عَیان ائده سَروِ قامتین بَد نَظر گوره سجده گاهین اَلوان قان ائده ماهِ وَش جماله خطر یِتَه اول آلا گوزی اوخ نشان ائده قولّاری قلم اولسا باشلیار قیزلارون نَوا شهر کوفه ده قورخورام که زینب باجون گورَه بو دیاریده بی حیالَری دَف چلانلاری ، کول سَپن لَری صف به صف باخان آشنالَری نازدانه قیزلار اگر گورَه تازیانَه لَردن  بلالری نیزه ده باشون اَل به اَل گَزه شاهِ مُقتدا شهر کوفه ده سیف آل هاشمسن ای آقا مُسلمِ غَریبِ وطن آدون ایلده عید اَضحی گَلن زمان ذِهنیمه تَداعی اولار یادون روضه خوانم ای صاحب کَرم روضه لَرده چوخدور سَنون دادون (نادره) بو تهراندا وِئر صِله قویما تا قالا شهر کوفه ده #استاد_نادر_بابای ﷽🍁 ﷽🍁 ✨اَللّهُمَّ عَجِّل لِوَلیِّکَ الفَرَج✨

🍁 وصیت حضرت فاطمه(س) 🍁 آز قالدی مزاره گِئدم ای شاه خُجسته گَل بیردانیشاق سون نَفَسیمده سفر اوسته یوخ ذَرّه بو دنیاده گوزوم گرچه جوانم شوقیله بو گون ساحَت معبوده روانم سندن بو سفر اوسته عم اوغلی نگرانم مندن صورا غم باشووَه سایه سالاجاقدی عَدلین دَدَه سی ائوده کمکسیز قالاجاقدی دنیایه گوره آخرتی ساتدی بو اُمّت کور ایلدی ظُلّامی نَدن حُبّ ریاست باغلاندی غریبانه بو گون بابِ امامت ظُلمون عَلمی‌ عَدلین آدیلا اوجالوبدور خیبر شِکنون اَللَری قوینوندا قالوبدور مندنصورا بیرده بِله بیر کشمکش اولسا وحشی لَر اگر اِئتسه تَهاجم اِئوه دولسا باغلانسا قولون گُللریمیز صحنه ده سولسا اِمدادووَه آردونجا سنون کیم قاچاجاقدور باغلی قولووِی اوندا  کیم آیا  آچاجاقدور عِرفانین حِجاباتیده مَفهومی سنیدون غم دفترینون باشداکی مَغمومی سنیدون مَظلوملرین  دَهریده  مَظلومی سنیدون ایکاش ائله امکانیم اولیدی دایانیدیم گوزیاشلی سنون باشووه بیرده دولانیدیم  اَسرار مِحن فاش اولوری غملی سوزوندن بیر هالِه ی ماتم گورونور ایندی یوزوندن من گِئتدیم عم اوغلی سن ئوزون گوزلَه ئوزوندن هرچند گئدور فاطمه ای خسرو خوبان باشون ساق اولا آغلاما گوزیاشووه قربان ای فَخر ائلیَن عِزَّتینه آدم و حوا دوققوز ایل ائووندَه سنه غمخواریدی زهرا بومُدّتی حَقّونده قُصوریم اگر اولسا اِغماضِ نَظر گَل منه ای نیک خِصال ائت سن بیل بوحسینین جانی زهرانی حلال ائت نِسگیل لَریمون ایندی بو نِسگیلدی کَبیری واضحدی قزیم زینب اولار غملر اَسیری زهرایه گورَه یاخشی دانیشدیر او صَغیری بیرگون که قَدَرایستدی طوی قسمتی اِئتسون اولمازنَنَه سی سن گَلینی سال یولا گِئتسون بیرده سنه بیر سوز دیورم ای شه مَحشر وئرکوینگیم اوستَن منه غسل اولسا مُیسّر تَدفینیمی ساخلا گجیَه اولما مُکدّر گیزلینده عم اوغلی منی حمل ایله مزاره تادردیمه ائتسون گجه نون قاره سی چاره حُرمت بیزایچون ساخلامیوب شهریده اُمَّت خوشدور که اِحاطه ائلیَه قبریمی غُربت تا محسنیمون قاتیلینه دوشمیه فُرصت مَکتوب غمی ایله نهان قوی قالا بسته تیترر بدنیم گَلسه عُمر قبریمون اوسته (نادر) دیوری خامه دایان یوخدی توانیم حیدر حالینون ذکرینه عاجزدی بیانیم واردور یری قوزانسا اگر عَرشه فغانیم  قبره قویولاندا گجه نون عالمی زهرا آغلاردی  علی حالتینه   گُنبد مینا #استاد_نادر_بابای