از اسب افتادن امام حسین ع و شهادت آن بزرگوار با مقدّمه قتلگاه بو مجلسی ملائکِ نُه کشور آختارور فیض آلماقا تمامِ ملائکلر آختارور شاهِ شهیده مرثیه خوان جَبرئیلدور کُرسیّ عرشی روضه ایچون منبر آختارور بیر سس گلور قولاقیمه آرامیمی آلور گویا آتا اوغول ایتوروب سسلر آختارور بیت الحزن مجاوری یعقوبدور مگر مصرِ بلاده یوسفِ گُل پیکر آختارور یا بیر جوان سسی ایشیدوب شاهِ کربلا آت گزدورور او چولده علی اکبر آختارور ظاهر بودور اوز اوغلونی آختارموری حسین ایتمیش بهانه اکبری ، پیغمبر آختارور اطرافِ رزمگاهی گزر حرمله مگر تیر و کمان الینده علی اصغر آختارور ایتمیش حسین اوز بدنین اوخلارا نشان اوجِ وصاله اوچماقا بال و پر آختارور آتدان دوشنده خیملره قاچدی ذوالجناح گویا غریب صاحیبینه یاور آختارور شیهه چکوب دییردی گَلون ای غریبیلر میداندا بیر یارالینی مین کافر آختارور ناگه نه گوردولر دولانور خیمه نی باجی قارداش گوزونی باغلاماقا معجر آختارور زینب او دمده قارداشین آختارماقا گلوب گوردی کی قارداشی سورونور خواهر آختارور گاهی دونور بقیعه طرف سسلنور آنا گَل کربلایه اوغلون ئولور مادر آختارور کیمدور ویره بو حالیمی عبّاسیمه خبر بیکس حسین تشنه ئولور ساغر آختارور ناگه نه گوردی شمر گوزون قان دوتوب گلور امّا الی بلینده گزر خنجر آختارور خنجر قویاندا گوردی گوزین چوخ دولاندیریر سسلندی یاحسین کیمی بو گوزلر آختارور؟ فرمایش ایتدی منتظرم صون نفسده من زهرانی بیر گوزوم بیریده حیدر آختارور گاهی یرور گهی دایانور صاق صولا باخور خلوتگهِ حسینی پوزا پیکر آختارور باخمیب یارالیدی او دنی چیخدی صَدرینه کسسون باشین نه طرزیله پشتِ سر آختارور زینب نه گوردی باش کسیلیب تیتروری بدن بولدی یقین تازه کسیلمیش سر آختارور تا امّته شفاعت ایده شاهِ کربلا قانلی باشی الینده گزر محشر آختارور ایتدی سبیل گوز یاشینی سلسبیل تک گویا (دخیل) محشر اوچون گوهر آختارور. #دخیل_مراغه_ای