#مطالب ویژه شب شهادت حضرت علی اکبرعلیه السلام راه شام زبانحال حضرت لیلا (س) . مرحوم معزی اردبیلی . چیخوبدور کوفه دن لیلا گلوب افغانه یوللاردا باخوب سر نیزیه قلبی دونوبدور قانه یوللاردا . گوروب دلبندینون باشین چکوبدور آهی آه اوستن بالانین محنتی گتدی آنانی جانه یوللاردا . دیدی ای یوسفیم یومما گوزون حالی پریشانم تکان ویر بیر قدر قانه باتان مژگانه یوللاردا . فلک اون سگّیز ایل قویدی باخام رخسارووه اما صورا دنیانی دوندردی منه زندانه یوللاردا . منیم شمع حیاتیم سن آماندور تز جدادن اَن دولانسون باشوه بیر آز گِنه پروانه یوللاردا . اَسوب یل کاکلون سرنیزه ده اولموش پراکنده نه خوشدور زلفووه ویرسا کنیزون شانه یوللاردا . گلوبدور باش یاروندان قان دوزولموش ماه رویونده یوزونده خشک اولان قان بنذیور مرجانه یوللاردا . ایدوب حُسن عالمی یکسر مسخّر لشکر زلفون کنار ایله باخوم بیرده رخ رخشانه یوللاردا . چیخاندا نیزیه باشون کأنّه آی چیخور سیره باخور افسرده اولدوزلار مهِ تابانه یوللاردا . فلک جان شیشووی چالدی عداوت داشینه بیر دن نظر قیل گور نجه آغلار نچه دُردانه یوللاردا . هانی هاجر گلوب باخسون منیم تک هاجر عصره نه نوعی وورموشام زینت گوره قربانه یوللاردا . دریغا یوسف عصری چکوب بازاره شام اهلی ساتوللار گور نه نوعی قیمت ارزانه یوللاردا . ولی کیمده نه جرأت وار حسینون یوسفین آلسون خریدارم ئوزوم من یوسف دورانه یوللاردا . دیدیم گر چه گوزون یونما ولی یوم مشتری چوخدور آلا گوزلر نهان اولسون باخور بیگانه یوللاردا . یقین ئولم آلنسا قانلی باشون نیزه داروندن ایویمی یخماسن باخما من نالانه یوللاردا . آپارسا هر یره دشمن منی گل سنده دیداره گجه صبحه کیمی سنلن قوروم غمخانه یوللاردا . دیللّر ظالمی آنی یخار بیچاره نین آهی چکوم آهی سالوم اود عالم امکانه یوللاردا . آنالیق مهری جوش ایلراورگیم برگ تک تیترر ترحّم ایلین یوخدور دل لرزانه یوللاردا . طبیبا ناقه اوستونده مریض بی علاجم من منی محتاج ایدوب دردو غمون درمانه یوللاردا . دعا من ایلرم آمین دییَر نازلی رقیّونده باشون تا اولمیا مهمان دنی انسانه یوللاردا . ربابون اوغلی اللرده ئولوب بیلّم چیخار جانی پریشان گوزلری دوشسه قوزی جیرانه یوللاردا . #راه_شام #چیخوبدور_کوفه_دن_لیلا_گلوب_افغانه_یوللاردا #معزی_اردبیلی