ای نو گُل چمن ختم رسالت اوغول #اکبریه وداع حضرت علی اکبر . . #سبک_ای_آسمان_غمون  . . مرحوم حسینی سعدی زمان . ای نو گُل چمنِ ختم رسالت اوغول واردور باشوندا سنون شوق شهادت اوغول ــــــ واگیرها از #مصیبی_تبریزی سودای دله باخدون اولدوز تک نه تئز آخدون یاندیردون منی یاخدون علی جانم . ای تاج سر لیلا وی بال و پر لیلا سن سن دلبر لیلا علی جانم . محبوب ازلی سن لوح غم غزلی سن لیلانین گوزلی سن علی جانم . آرام دل لیلا نور محفل لیلا حل مشکل لیلا علی جانم ــــــ . . هجره نه نوعی دوزوم آغلار دالونجا گوزوم شامه دونر گونوزوم چوخ ایتمه سرعت اوغول . . بیرجه دانش منیله چوخ حسرتم سوزیوه گیتمه دویونجا باخوم بیرده بو گُل یوزیوه بو زلفه شانه ووروم سرمه چکوم گوزیوه آلُ الَّلهه خوشدور اولا قربانه زینت اوغول . . درد فراقه نجه صبر ایلیوم دایانوم اگلش یره باشوا بیرده دوروم دولانوم پروانه تک علی بو شمع رخونده یانوم قربان اولام سنه گر وار جانه منّت اوغول . . گَتدیم بو حدّه سنی بی حدّ زحمتیله داماد ایدوم سنی تا عالمنده عزّتیله عکس خیالیم اولوب قالدیم بو حسرتیله گوگلیمده قالدی منیم بو درد و حسرت اوغول . . ویردیم فدا سنی من ای ماه پیکر علی چوخ شایقم بویانا قانه بو تِللر علی گیت اهل کین یولوی میداندا گوزلر علی قانون توکَر بُلورم اهل شقاوت اوغول . . بیر بیله حالی علی درک ایلمزدی خیال ایلوب بو حال منی بی حدّ غرق ملال لب تشنه ایلموسن بو چولده عزم قتال ای درّ خوش صدف بحر امامت اوغول . . حاشا دیم سنه من گیتمه جداله علی گیت جانون ایله فدا سن ذوالجلاله علی چون دوشموسن گورورم بیر اوزگه حاله علی حالون شهادتوی ایلر حکایت اوغول . . ایتمزله شرم و حیا بو کوفیان دنی ظلمیله قانه علی غلطان ایده لّه سنی تا وار بو جسمیده جان آغلار قویالّا منی ایلر قیام منه سنسیز قیامت اوغول . . دائم «حسینی» یوزه گوز یاشون ایله روان یاز نوحه شام و سحر بو غمده ایله فغان خوشدور آنا دلینجه بیر بیله ورد زبان ای نو گُل چمن ختم رسالت اوغول 🌴🌴🌱🌴🌴🌱🌴🌴🌱🌴🌴🌱

الهی بیلمورم لیلا نجه اکبردن آیریلدی #اکبریه #کاتب_اردبیلی 3 روز پیش / علی ببیرپور / زبدةالاشعار  0:00:00 ۰٫۸ مگابایت  شهادت حضرت علی اکبر (ع) . 🌴سبک_حسین_ای_شاه_مظلومان … 5 سبک مشابه . مرحوم کاتب اردبیلی . الهی بیلمورم لیلا نجه اکبردن آیریلدی نجه ال چکدی اوغلوندان اوغول مادردن آیریلدی . . گله اکبر کیمی حاشا اوغول بیرده بو دنیایه اولا نور رخی غالب فروغ شمسیله آیه بو غم حشره کیمی نسگیل اولور بیچاره لیلایه نجه بیلمم او بیچاره او مه پیکردن آیریلدی . . دگل انصاف اونا هر کس دئسه که یوسف ثانی که یوز مین یوسف کنعان اولانماز بنده فرمانی او یوسف مصرده قویدی باشینه تاج سلطانی ولی بو یوسفون شیعه باشی پیکردن آیریلدی . . نه نوعی شاه لب تشنه اونون هجرینده تاب ائتدی ائشیدجک یا ابا صوتین او شه چوخ اضطراب ائتدی او قدری آغلادی کلاً جهانی دلکباب ائتدی نه نوعی آغلاماز بیله ملک منظردن آیریلدی . . گزوب میداندااوز اوغلونتاپوب چون شاه مظلومان یارالی جسمینی گوردی اولوبدور قانینه غلطان بویوردی نورعینیم دور گوزون آچ ای مه تابان نجه دؤزسون آتون سن تک مه انوردن آیریلدی . . نقدری دیندیروب گوردی صدا وئرمز علی اکبر گئدوبدور تاب طاقتدن شبیه روی پیغمبر خیامه ایستدی نعشین آپارسون اول شه محشر گوروب بیر بیرجوارحدن بدن بیر بیردن آیریلدی . . امان اول وقتدن شیعه گوروب لیلای دلخسته قوشون اهلی برابرده دوروبدور دسته به دسته علّی اکبرین نعشین سالوبلار قوملارون اوسته باشین کسمکلیگه منقذ صف لشگردن آیریلدی . . بس ایله «کاتبا» یازما جفای لشگر شامی اگر حشره کیمی یازسون توکنمز هرگز آلامی یقیناً مُلهم غیبی سنه وئرمیش بو الهامی الهی بیلمرم لیلا نجه اکبردن آیریلدی ◾️🌿◾️🥀◾️🌿◾️🥀🌿◾️🥀

بیر آز یواش یرى اى لیلینین پناهی اوغول #اکبریه ✨✨🌱▪️✨✨🌱▪️ #زبانحال حضرت لیلا در وداع حضرت علی اکبر علیه السلام مرحوم شعاع تبریزی . بیر آز یواش یرى اى لیلینین پناهی اوغول بیله شتابیله گئتمه بو شاهراهی اوغول . او سرو قامته قوی بیر دولی گوزیله باخوم سپه گیدن یولووا سو گوزوم میاهی اوغول . اماندی گتمه اماندی معاینه سنیله گیدیر بو بختی قرانون جلال و جاهی اوغول . منه قالان دگوسن گیت سنه دیمم گتمه دگول آنان بو مقدّس مرامه ناهی اوغول . دایان نقاب سالوم مه جمالیوه بلکه او حسنه دوشمویه تا بدنظر نگاهی اوغول . خدا نکرده على قورخورام که خلق گوروب نظرلسونله بو خال و خط سیاهی اوغول . خمیده قاشلاروون طاقی چوخ گمانیم وار ترحّمه گتوره قوم دین تباهی اوغول . پوزار صفوف عدونی صفوف مژگانون یارار او ناز خدنگی دل سپاهی اوغول . بو یوسف دلین ای یوسف دیار بلا یوزونده چاه زنخدان اولوبدی چاهی اوغول . گورن اوحسنی ایدر یاد حسن پیغمبر اولور بو هاشمی خالون اونا گواهی اوغول . گیدورسن ایمدی که قوى جدّیون عمامه سینی فدای حقّ نئدور باشدا تاس کلاهی اوغول . ساتاشسا بیر گوز او شهلایه ناز ایدن گوزووه بولر نه پایه ده دور قدرت الهی اوغول . گتور نظامیله نظمه سالوم او تللریوی خسوفه سالمیا زلف ابری نور ماهی اوغول . آلوب قراریوی شوق وصال یار الدن دایانما گیت یانا قوی لیلی سال و ماهی اوغول . زجاج عارض احمد نمایه باخدوقجا دل ایستور عرضه ایده سوزلرین شفاهی اوغول . یول اوسته سن دیمرم غملی سوز غمون آرتار گورر ملول سنی شامیان قاهی اوغول . فراقیوه دوزرم قوی منی اوغولسوز گیت ولیک قویما کمکسیز بو پادشاهی اوغول . قویار غمون آناوی بحر غمده سرگردان دولاندورار نجه دریاده موج کاهی اوغول . بویون بلاسین آلوم اولماسان اوزوم بولورم گونوم قرا اولی ای بختیمون ستاهی اوغول . دیسم اگر منی مجنون ایدر غمون دوزدور بو باره ده آناوون یوخدی اشتباهی اوغول . سن اولماسان گیدر الدن عزیزلیقیم بولورم اسیر ایدر منی بو فرقۀ مناهی اوغول . بهار عیشمی غم صرصری خزان ایلر نجه که سولدورار آفت گل و گیاهی اوغول . بو قومه غالب اولوب بسکه نفس امّاره ایدوبله حقّین عَلَیهینده فکر واهی اوغول . ستمله تنگ اولوب عرصه بنات زهرایه دوتوب اور کلرینی وحشت و دواهی اوغول . کسوب سو یولّارین اوچ گوندی اهل کینه دیمور ندور بو السیز ایاقسیزلارین گناهی اوغول . نه وار سودی نه سویی بینوا رباب آناوون یاخندی یاندورا افلاکی سوز آهی اوغول . سالوبدی قلبیمه بیر سونمز اود رباب غمی اودور سبب چکورم آه گاه گاهی اوغول . گوروم على اولا برهم رباب حالی کیمی بنی امّیه قوران ظلم دستگاهی اوغول . دوشوب بلایه «شعاع» ایسته جدّیوه خاطر خدا اولا ایکی دنیاده دادخواهی اوغول . بو رسمدور آقالار نوکره حمایت ایدر توجّه ایله اولا بر طرف رفاهی اوغول

گر بابا هجران سنی بو چولده بیتاب ایلدی #اکبریه 🏴💫▪️🏴💫▪️🏴💫▪️ #استمداد شهزاده علی اکبر علیه السلام علومی تبریزی . گر بابا هجران سنی بو چولده بیتاب ایلدی ائتمه غم جدّیم منه سو گتدی سیراب ایلدی . . تشنه لوق آلموشدی طاقت بو سوسوز تندن بابا ایستدیم علّت اودور بیر شربه سو سندن بابا اولمادی ممکن سنه محزونیدون مندن بابا ائتمه غم جدّیم منه سو گتدی سیراب ایلدی . . چوخ اؤزوم شرمنده ام سو ایستدیم اوّلده من چون سنی گوردوم که مندن فوق العاده تشنه سن ساخلیوبدی سو سنه جدّیم رسول ممتحن ائتمه غم جدّیم منه سو گتدی سیراب ایلدی . . اولمادی ممکن خیامه بیرده من سالم گلم یخدیلار آتدان منی بو چولده اشرار ظلم ایسترم گل صورتین بیرده گورم اوندان ئولم ائتمه غم جدّیم منه سو گتدی سیراب ایلدی . . ویردی جدّیم مصطفی ایله گوارا سو منه اولمارام بیرده سوسوز ویردیم خبر بابا سنه صون نفسده گل تماشا ایت بو پوزقون گلشنه ائتمه غم جدّیم منه سو گتدی سیراب ایلدی . . ویر تسلّی خیمه ده لیلایه آز ایتسون نوا قاتلیم ایتسه یارالی باشیمی زیب جدا سربلند ایلر اونی صبر ایله سه بو ماجرا ائتمه غم جدّیم منه سو گتدی سیراب ایلدی . . گل بابا گل پارچالانمیش باشیمی آغوشه آل سایۀ لطفون بو صون دم باشیم اوسته بیرده سال شاد اولوم دیداریویله بو زمان ارتحال ائتمه غم جدّیم منه سو گتدی سیراب ایلدی . . بیرده من گتدیم بابا امر ایله سن زین العبا خاک پایونده منی دفن ایله سین بو چولده تا قبریمه زائر اولانلار گورسون ای شاه ولا ائتمه غم جدّیم منه سو گتدی سیراب ایلدی . . بسدور ال ساخلا علومی مطلبه چوخ ویرمه طول آزدا اولسا خدمتون ایلر علی اکبر قبول بیرده دئ بو مصرعی حضّار اولا دلدن ملول ائتمه غم جدّیم منه سو گتدی سیراب ایلدی

یخیلمیشام یره آتدان یارالیم باباجان #اکبریه ▪️🌱✨▪️🌱✨▪️🌱✨ #شهادت حضرت علی اکبرعلیه السلام . مرحوم نجمی تبریزی و مرحوم حافظی تبریزی . . یخیلمیشام یره آتدان یارالیم باباجان یتیش هرایمه چوخ ماجرالیم باباجان . باشیمدا معجز شق القمر علامتی وار بابام علی کیمی باشدان یارالیم باباجان . یخوبلار قامتیمی سرو تک بو چولده یره دئموبله باغ وفانون نهالیم باباجان . وطن محبّتینی باش یاراسی باشدان آتوب مدینه یوسفیم کربلالیم باباجان . شکسته نی کیمی بیجا دگول نوا ایدورم دولوب نوائیله جسمیم نوالیم باباجان . بو سون نفسده سنی سسلورم بودور نظریم گورم جمالیوی بیرده وفالیم باباجان . آخان ستاره کیمی عرش زین دن آخدیم عنان الیمده دگول دست خالیم باباجان . آنامدا نیزده باخسین آی اوّلی باشیما سپهر عشق و محبّت هلالیم باباجان . باجیم سکینیه ده یول داخی گوزتلمه سین دوشوب بلایه باشیم ابتلالیم باباجان . غمیمده چوللره مجنون اولوب دوشر لیلا بو حالیده ایله بیر حاله حالیم باباجان . شهادت عالمی بیر صورته شبیه اولسا او صورتین لب بالاده خالیم باباجان . کمند دشمنه بند اولموشام جفائیله بو قانلی معرکه نین خوش غزالیم باباجان . ووروب یارا یارالی جسمیمه گروه خطا بولوبله چین و ختانون مارالیم باباجان . اذان سسی ایشیدنده آنام چوخ آغلیاجاق بولور امام زمانون بلالیم باباجان . داغیلمی شام یره خندان اولان قیزیل گل تک خزان گورن گل و غنچه مثالیم باباجان . یارالاریم گل آچوب پیکریمده رنگ به رنگ بهشت گلشنی تک چوخ صفالیم باباجان . عبث دگول بو که عشّاق ایچینده ممتازم حبیب عاشق نیکو خصالیم باباجان . مدینه ده باجیمین حالینی اوزوم بولورم اگر چه فاصله چوخدور آرالیم باباجان . علیله باجیما الله غمیمده صبر ویره بیر عمر اونون سبب اشگ آلیم باباجان . شبیه کامل اولار عرشه فرشیده قبرون اونون کشیدۀ کاف کمالیم باباجان . خیال لیلی ایدوب چوخ خیالی جان اوسته اونون بو حالیده پوزقون خیالیم باباجان . دوتوب بوغازیمی قان لخته سی سسیم گلمور مقال مجلسینون نطق لالیم باباجان . گتورمرم دله سو صحبتی سینار قلبون بو دردی قبره آپارّام وفالیم باباجان . ایدر نمازی شروع اسم میله اهل نماز هامی نمازده لفظ جلالیم باباجان . یارالی باشیمی گل باس یارالی سینه وه تا گوره لر سینۀ شاهین مدالیم باباجان . غمیمده «حافظی» «نجمی» یانار هر آی هر ایل سبب نوا لرینه ماه و سالیم باباجان .

نه هجراندور علی اکبر سالوب تشویشه لیلانی #اکبریه 🍁▪️✨🍁▪️✨🍁 #وداع حضرت علی اکبر علیه السلام زبانحال مادر مرحوم ذوقی تبریزی . نه هجراندور علی اکبر سالوب تشویشه لیلانی دولاندور باشوه گل سن اوغول بو خانه ویرانی . . دیمه هجرانوه بیر آن دوزر بو خانه سی ویران ایدر فرقت آدی صبریم ایوین سن گتمه میش تالان سن ئولسن بس ندور چاره م بو صحراده سنه قربان سالور صحرایه مجنون تک بو هجر آخرده لیلانی . . دییَم صبر ایلرم سن گیت فراقوندا دایانّام من اینانما بو سوزی نار غمونده بلکه یانّام من اوغول ویرسن اجازه باشوه دورّام دولانّام من دولانماق باشه دفع ایلر بولورسن هر بلایانی . . غم هجرانه صبر ایتماق مگر آسان دور عالمده گیدورسن ای اوغول داغون قالور بو اودلی سینه مده بولورسن آغلارام یانّام اثر وار بسکه ناله مده یری وار یاندیرا آهیم شراری کون و امکانی . . ئوزون رحم ایت علی اکبر بو اهل بیت اطهاره توکوللر گوز یاشین بیر گور نجه حسرتله رخساره بو اوضاع غم انگیزون قویوب بو جمعی آواره بو بیر غمدور بئله معلوم اولور یوخ حدّ و پایانی . . نه نوعی ایلیوم اصرار اولوم مانع دیوم گیتمه قویوم فیض شهادتدن دیوم مقصودیوه یتمه بو قدری وار منه رحم ایت منی گل باغریقان ایتمه دیوب بو دللری یاندیرما بو قلبی پریشانی . . آنا دوزمز ئوز اوغلوندان اوغول بیردم کنار اولسون یوزی گولمز آچیلماز قلبی گر مینلر بهار اولسون بو گیزلین درده نه چاره ایدیم تا آشکار اولسون نه گورّم که باتوب قانه بو زلف عنبر افشانی . . گونومی ایلمه قاره دایان ای ماه خوش منظر رضا گل اولما آردینجا قالام آغلار من مضطر چکوم ناله گجه گوندوز دیوم ایوای علی اکبر اماندور قویما گل آغلار دالونجا سن بو نالانی . . آنالیق مهری قویمور من علی جان آیریلام سندن سبب نولدی نه تیز دویدون بو صحراده اوغول مندن گیدورسن گیت سوزوم یوخ چکمرم ال داد و شیوندن حیاتیم تا وار آرتورّام باشیمدا شور و غوغانی . . روادی سن کیمی اوغلى اولان عالمده خوار اولسون الیندن عزّتی گیتسون جلالی تار مار اولسون گوزی یاشلی اورک داغلی اسیر قوم تار اولسون قولی باغلى دولانسون کوفه و شامی بیابانی .

ایستیرم جان ویره سن شوقیله جانانه اوغول #اکبریه ▪️🌿✨▪️🌿✨▪️🌿 #زبانحال حضرت لیلا سلام الله علیها در وداع حضرت علی اکبر علیه السلام مرحوم دلریش . ایستیرم جان ویره سن شوقیله جانانه اوغول حق یولوندا باتا بو طرّه لرون قانه اوغول . . تاپار هر چند تسلّی دل زاریم سنیلن مرغ دل الفت ایدر ای گل عذاریم سنیلن گیده سن، سن ، گیده جک صبر و قراریم سنیلن راضیم ایمدی اوزوم بیر بیله هجرانه اوغول . . عالم عشقده غم باده سینی نوش ایدرم تشنه جان ویرماقوی قلبیمه من توش ایدرم اوز الیمله سنی شوقیله کفن پوش ایدرم صف مژگانیله زلفون قیلارام شانه اوغول . . درد هجرانون ائدر باغریمی گر قان، دوزرم کسه لر باشوی لب تشنه بوع دوان دوزرم یوز بیله تازه جوانیم اولا قربان دوزرم راضی اولمام یته غم شاه شهیدانه اوغول . . آنالوق حقّینی قیلّام ای اوغول جمله حلال قویما یتسون شه لب تشنیه بیر ذرّه ملال ممکنون اولسا علی اصغره بیر جرعه سو آل اولمامش حلقی نشان ناوک پیکانه اوغول . . یوخدی بیر کیمسنه اولسون شه بی یاوره یار جهد قیل تازه جوانیم نقدر جانون وار سنی بو گوندن اؤتور بسلمیشم لیل و نهار تا ویروم شوقیله قربان بیله قربانه اوغول . . عشق میدانیدی بو، ترکی شهادت ایلمه نقدر نیزه و اوخ دگسه شکایت ایلمه آناوی فاطمه یانینده خجالت ایلمه گیت سنی تاپشورورام خالق سبحانه اوغول . . ایستمم وصلوی قالّام شب هجران ایچره ویرگلن جانوی مردانه بو میدان ایچره جسم مجروحیله میدانیده یات قان ایچره زینت ایت پیکر صد چاکیله میدانه اوغول . . لیک دردیم بودی بیر ای قد شمشاد، سنی گورمدیم حجله گھ عیشده دلشاد سنی ایتمدیم یثرب آرا شوقیله داماد سنی حیف دوندردیله وصلون بیله هجرانه اوغول . . هر بلا یتسه ره عشقده ایتمم گله من قونارام بلبل حسرت علی سن تک گُله من چکرم فرقتوی عمّه لرونله بیله من دوزرم هر ستم لشگر عدوانه اوغول . . الغرض لیلی سالوب اکبر دلشادی یولا دوزولوب اهل حرم ناله کنان صاق وصولا دیدی شاه شهدا کاش گوروم عالم اولا سن کیمی تازه جواندان صورا ویرانه اوغول . . یوز دوتوب درگه حقّه بدل زار و ملول عرض ایدوب ایله خدایا بیله قربانی قبول اَشبَهُ النّاس بِخَلقٌ وَ بِخُلقٌ بِرَسول ویرمیشم عشق یولوندا بیله مستانه اوغول . . قویسا هر کیم بیله بیر ورطۀ عشق ایچره قدم «دلریشا» هر نه بلا یتسه گرک چکمیه دم نوش جان ایلیه هر نوع یتوشه درد و الم راه حقده بو حسین تک ویره مردانه اوغول

گلیدی لیلی جانینه گوزون فداسی اکبریم #اکبریه 🍁💫▪️🍁💫▪️🍁▪️ #شهادت حضرت علی اکبرعلیه السلام . سیفی اردبیلی . گلیدی لیلی جانینه گوزون فداسی اکبریم اولوبدی باشیوین قانی الون حناسی اکبریم . . تالانمیسان ورق ورق چمنده یاسمن کیمی جهانه بیر اوغول گلر مگر دوباره سن کیمی نه بیر آنا اسیر اولار کمندِ ظلمه من کیمی سالار شراره عالمه اوره ک نواسی اکبریم . . اون سگیز ایلدی من سنون انیس و غمگساریوام دیندیر منی گوزل بالا اسیر داغداریوام سن مست کردگار سن منده سنون خماریوام دور دوت الیمدن ای منیم الیم عصاسی اکبریم . . عبانی یوزدن آچ باخیم تئلینده نقش اولان قانا آنا دی سسله سن منی هوسله من دئییم جانا اوپوم او قانلی گوزلرون سیزلداییم یانا یانا سالیئدی باشیمه دئییم اوغول قاراسی اکبریم . . قویما او قانلی کیپرگون پرده چکه گوز اوستونه بوندان علاوه غملرون کوز قالییا کوز اوستونه قوی بیر یارالی باشیوی ایندی آلیم دیز اوستونه گور نئجه دیلده لیلی نین وار اوخشاماسی اکبریم . . دیداریوه اگر علی گلنده قالمیشام دالا نفسدن آز قالیر منی بو غملی آیریلیق سالا اجازه ویر یانا یانا ایاقیوی اوپوم بالا یوخ سندن اوزگه لیلی نین بیرآشناسی اکبریم . . دانیش بیر آز دیلونده کی اولان ملالیوی بیلوم هوروگومی آچیم علی دوداقیون قانین سیلوم ثوابی واردی لطف ایله یوزومه گول قیزیل گولوم اولسون گولن یوزون منهوصلت نداسی اکبریم . . درخت باغ عمریدن گُل مرادی درمه دیم طویوندا لاله یاندیروبگلین هوروگی هورمه دیم بخت اوطاقون آچاندا سن الی حنالی گورمه دیم ساغالمیاندی قلبیمون بو بیر یاراسی اکبریم . . منیم اورکده دردیمی فراق اودون چکن بیلر اوغول دالیجا دائمآ یوللارا گوز تیکن بیلر پرپر اولان گولون غمین شیدا بیلر اَکَن بیلر آنانی فوری پیر ائدر هجران بلاسی اکبریم . . باشیوه قاتلون ویروب جدّون علی کیمی یارا اوستومه قیتروب منیم بخت آینامی پارا پارا سن هارا نازنین اوغول قانه باتان عبا هارا؟ یاراشمیور وجودیوه بو طوی لباسی اکبریم . . داریخدی قلبیمون باشی دانیش منیله گول یوزه او قاره زلفیوی بالا بو قدری سالما گول یوزه آدمسیزام کمک سیزام بیر باخ منیله گوزگوزه گلئیدی سینه مه دئیوم گوزون فداسی اکبریم

داده یتیش آلدیلار دوره می لشگر بابا #اکبریه ▪️🌿🔸▪️🌿🔸▪️ #استمداد حضرت علی اکبر . . #سبک_ای_دل_اگر_عاشقی #سبک_می_گذرد_کاروان ( با اضافه کردن واگیر ) . مرحوم نادری میانجی . داده یتیش آلدیلار دوره می لشگر بابا سالدیلار آتدان یره جان ویرور اکبر بابا . . نازیله سن بسلدون ای گل ریحان منی ایله دون آخر بو گون امّته قربان منی ویردولا چوخ یاره لریخدیلار عطشان منی باشمون اوسته دوروب شمر بداختر بابا . . تازه جوانم بابا دادیمه یوخدور گلن قوملارون اوسته دوشوب اکبر گلگون کفن سن گورن اکبر دگول پاره لنوب گُل بدن گیتدی الوندن بوگون شبه پیمبر بابا . . قویما گیلان آی بابا حالیمی لیلا بوله باشی آچوخ قورخورام باشیمین اوسته گله هیچ آنا تاب ایله مز تازه جوانی ئوله تکجه بو حالی بولر اوغلی ئولنلر بابا . . ای بابا تیز داده گل یخدیلار آتدان منی ایله دی بو قوم دون قانیمه غلطان منی گل گور آلوب اورتیا ئولدورور عدوان منی قتلیمه لشگر چکوب گور نجه خنجر بابا . . باشیمی سیندردیلار جانه بابا دویمشام یاره می یوخ باغلیان قانیمه غرق اولمشام سوز عطشدن بابا لاله کیمین سولمشام گلمدی امدادیمه ساقی کوثر بابا . . ئولمه گمه اینجمم ایلمرم واهمه گوزلری یولاردا دور ایندی باجیم فاطمه یاز باجیما اکبرین تابدی ایشی خاتمه حجله سی دور قتلگه شمعدی شش پر بابا . . یاز باجیما باشینه ایندی قرا باغلاسون اکبرون الدن گیدوب یولارا چوخ باخماسون اکبره نا خوش باجی داغلا جگر داغلاسون قالدی طویوم محشره ای مه انور بابا . . ای بابا ساق قالماقا اکبر ه یوخدور گمان ئولمه میش اوغلون بابا قدون اولوبدور کمان کرب و بلا «نادری» اکبره اولدی مکان قالدی اوغلسوز بوگون شافع محشر بابا

ای قلبیمه یارا اکبر #اکبریه ▪️✨🌾▪️✨🌾▪️✨🌾 #زبانحال امام علیه السلام در وداع حضرت علی اکبر علیه السلام . #سبک_ایوای_یارالی_جان_یارالی . . ستار رزاقی تبریزی . ای قلبیمه یارا اکبر ای زاده لیلا اکبر گِئت حافظون اولسون الله ای عشقیده دریا اکبر . ای جدّیمه بَنزَر جوانیم آهسته گِئت آرام جانیم … . . . ای دین خدا قربانی ای فاطمنون ریحانی بو چولده اَل اوزدوم سندن تا زنده ایدم قرآنی . ای نو گل باغ امامت گِیت نوش اِله جام شهادت … . . . سن معرفته داراسن آرام دل لیلاسن کیم گورسه جمالون سویلر طاها کیمی چوخ زیباسن . بنزر جمالون مصطفایه سن فخرسن آل عبایه … . . . عطشان گیدوسن میدانه جان بذل ایده سن جانانه قربان اولا جان عالم سن تک کسیلن قربانه سن سن منیم آرام جانیم صبح و مسا ورد زبانیم … . . . گُل قدیوه خلعت بیچدیم دین اوسته اوغولدان گیچدیم اولاد بنی هاشمدن اوّل سنی قربان سِچدیم . قوی بیر جمالیندن اُپوم گِئت گوز یاشین آردینجان سپوم گِت …

شاه کربلا علینون پیکرین عباده گتدی #اکبریه 🍁▪️✨🍁▪️✨🍁▪️✨ #شهادت حضرت علی اکبر علیه السلام حاج غلامرضا عینی فرد زنجانی . شاه کربلا علینون پیکرین عباده گتدی دوغرانوب قلجلاریلان قالمیا آراده گتدی . . زینبی سالوب قاباقجا دالجا شاه اؤزی گیدردی اکبرین شهادتینده ناله و فغان ایدردی انس و جنّ آغلاشاردی سانما سوزلریم هدردی کائناتی بو جوانون جانی چخدی، داده گتدی . . خیمه لر برابرینده بیر قدر دایاندی مولا صبر وئر دیدی خدایا ئولمه سین بو غمده لیلا لیلی واریدی یوخیدی بلمورم، ولی بو یولدا لیلی آدینی دلنده شاه کربلاده گتدی . . هاشمیلر آلمشیدی اکبری او دم آرایه گتدیلر خیامه نعشی ناله قوزانوب سمایه سس دوشوب خیمده اکبر گلدی آل مصطفایه قاسمون طویی گر اولسا گول او شاهزاده گتدی . . پیشواز ایدوب حرملر اکبرون جنازه سیندن خیمه لر بوشالدی لرزه کربلایه سالدی شیون قویدولار یره علینون پیکرینی مرکب اوستن تک خدا بلور نه نوعی شه اونی عبادہ گتدی . . صبرینه قالوبدی حیران آسمانیده ملکلر محوریندن آز قالوبدی چخسون اول زمان فلکلر اشگیلن دولوبدی گوزلر آخدی ایسلانوب اتکلر چوخلارینی بو حسینون صبری اعتقاده گتدی . . باشدا اگلشوبدی زینب عمه سی فغان ایدردی چشمه چشمه یاره لردن تپراق اوسته قان گیدردی آرزو باغندا لیلا گل اکوبدی غصّه دردی نقل ایدوبله باشی اوسته اکبرون آناده گتدی . . اکبری گلوب سفردن باغرینا باسوب ایاقون باجیلار آچوبدی باشین اؤپدیلر سوسوز دوداقون سسلنردی دور ایاقه بوش قالوبدی طوى اطاقون قاره پوش ایدوب عیالین چرخ دون عزاده گتدی . . من دیمم ایاقه دور تا قامتون گوروم دوباره هیچ دیمم اوغول دور اگلش چوخدی پیکرونده یاره خواهشیم بودور گوزون آچ لیلیه ائله نظاره باشون اوستونه حرملر لیلینی فتاده گتدی . . قوى اؤپوم یارالاروندان اشبه رسول اکرم آرزولاریم ئورکده قالدی ای شهید اعظم قالمارام جهاندا زنده آز زمانیده من ئولّم پیکریمی باشون اوسته دردون ابتداده گتدی . . قامتون یره یخلدی سرولر خجالت اولدی صورتون بویاندى قاندان ماه غرق حیرت اولدی قاره گوزلرون دولاندا قانیلن قیامت اولدی اوّلین شهید سنسن شه بو ابتلاده گتدی . . باشیوون دالیجا گلّم چوللرى دولانّام اوغلوم نیزه لر باشندا باشون گورجاقین اوتانّام اوغلوم شانه زلفوه ورانمام فرقتونده یانّام اوغلوم دشمنون هایاندا گورسم باشیوی جداده گتدی

یوسف باخش دوشنده میدان نینوایه #اکبریه ▪️🌱🏴▪️🌱🏴▪️🌱🏴 #شهادت حضرت علی اکبر علیه السلام رضوی زنجانی . یوسف باخش دوشنده میدان نینوایه بیلمم نلر اولوبدی یعقوب کربلایه سسلندی اکبریم وای شبه پیمبریم وای . . ماه مدینه دوشدی اول دمده که خسوفه مخیمده شمس یثرب دوشدی غم کسوفه بیلدی وجود اکبر آماج اولوب سیوفه مقصودینه چاتوبدی اشرار شام و کوفه آل عبایه خامس دلدن گلوب نوایه . . اکبر بویاندی قانه غم یاغدی خیمه گاهه غم غصّه لر سپاهی حمله گتوردی شاهه صدمه یتیشدی قلب شاه جهان پناهه ای وای علی صداسی قوزاندی مهر و ماهه یوز قویدی اهل معنا اوُل دشت غم فضایه . . باشدان یارا دگوبدی شهزاده دوشدی آتدان زهرا دیدی بالام وای معناده اولدی گریان اول دشتیده اولوبدی شقّ القمر نمایان طاها فغانه گلدی سسلندی وای علی جان جنّت باغی دولاندی بیر مجلس عزایه . . ابر بلا او چولده یاغدیردی غصّه و غم دولدی غمیله الحق قلب شه دو عالم یوز قویدی قتلگاهه قدّ خمیده اوُل دم تپراقه گوردی دوشموش شبه رسول اکرم قدّی خمیده نیلر صدمه یته عصایه . . یکسر باتوبدی قانه اول ماه منظر اکبر منشق اولوبدی باشدان مانند حیدر اکبر پرپردی گل مثالی طاهایه بنزر اکبر قلبی یانوب او شاهین سسلندی اکبر اکبر سس گلمدی علی دن فرزند مصطفایه . . یدّی قدم قالاندا شاهنشه خجسته گوردی او شاهزاده چون لاله تپراق اوسته حال دگر ویروب ال اول شاه حق پرسته یدّی قدم سؤروندی لب تشنه دلشکسته گلدی غرض یتشدی اوُل دوغرانان فدایه . . حبل متین حُسنی قان ایچره پاره گوردی تپراقدا پاره پاره، ماهی ستاره گوردی حمل ایلسون عباده اول جسمه چاره گوردی حیدر باشندا گویا یاره دوباره گوردی باشدا یاراسی اوخشور ئوز جدّی مرتضایه . . باشین آلوب دیز اوسته شبه رسولین اوّل قانلی یوزوندن اؤپدی فرزند ختم مرسل سسلندی سینه سی ای جای کتاب منزل جدّا چتیتن گونومدی امدایمه ئوزون گل گیتدی عزیزیم الدن گل دشت پر بلایه . . بیرده بویوردی اوغلوم دلده سنه سوزوم وار سندن صورا جهاندا بیر غملی گوندوزوم وار گلّم دالینجا اکبر منده مگر دوزوم وار آچ قانلی گوزلریوی سنده اوغول گوزوم وار غم غصّه ابری سنسیز سالموش خیامه سایه . . سیننده اوخلار اکموش بیر باغ لاله اکبر مه دورینه سالوبدی قان مثلی هاله اکبر باخسون نجه حسین بو قانلی جماله اکبر گلمزدی هیچ بو حالین هرگز خیاله اکبر ایش بیله دوشدی امّا غرق اولموسان دمایه . . روح على خلاصه پر ووردی نخل نوره پیشواز ایدوبدی زهرا شهزاده ی غیوره گُل سینه مثل قرآن اولموشدی سوره سوره اولدوز افول ایدوبدی غم چاتدی ماه و خوره زینب او دم گلوبدی قارداشینه هرایه